მთავარი,სიახლეები

ბათუმში კამელიების ხეივანი გაშენდება

17.03.2017 • 4770
ბათუმში კამელიების ხეივანი გაშენდება

ბათუმში, გორგილაძის ქუჩის გაგრძელებაზე, კამელიების ხეივანი გაშენდება – ამის შესახებ „ბათუმელებს“ ქალაქის მერიის გამწვანებისა და ლანდშაფტური დაგეგმარების სამსახურის უფროსმა, ლევან ჭანუყვაძემ უთხრა. ამ ტერიტორიაზე  50 ძირზე მეტი, სხვადასხვა ფერის კამელია დაირგვება.

„ორმოების ამოღება დავიწყეთ უკვე, ძალიან ცუდი სიტუაცია დაგვხვდა, სულ დაბეტონებულია ირგვლივ ყველაფერი. დღეში ათ ორმოზე მეტს ვერ ვიღებთ“ – ამბობს ლევან ჭანუყვაძე.

ბათუმში, თამარ მეფის ქუჩაზე, ბენზინგასამართი სადგურის წინ განახლდა სკვერი, სადაც კვიპაროსი, ირმის რქა, ფიჭვი, ტუია, აზალია, სხვა ბუჩქოვანი და სეზონურად მოყვავილე მცენარეები დარგეს.

სკვერი თამარ მეფის ქუჩაზე

სკვერი თამარ მეფის ქუჩაზე

ქალაქის განწვანების სამსახურის უფროსის თქმით, ბათუმში ეტაპობრივად იგეგმება სხვა სკვერების და გამწვანებული ადგლების განახლებაც:

„უნდა განვაახლოთ იუნკერების სკვერი, გამწვანება აეროპორტის ტერიტორიაზე, სასტუმრო „რედისონთან“.  პუშკინის ქუჩის ბოლოს ახალი ქუჩა გაიჭრა, სადაც ერთი ძირი ხე არ არის, იქ ვგეგმავთ ლიკვიდამბარების დარგვას, ძალიან ლამაზი მცენარეა,  ძალიან ჰგავს ნეკერჩხალს, ზაფხულში მწვანეა, შემოდგომით იწყებს გაყვითლებას, გაწითლებას, გაჩახჩახებას.

ლიკვიდამბარი

ლიკვიდამბარი

ასევე, „არკასთან“ იგეგმება გამწვანების რეკონსტრუქცია,  ძველ ბათუმში, „ვაიკიკის“ მიმდებარე ტერიტორიაზე სკვერი ცუდ მგომარეობაშია და მის რეკონსტრუქციასაც ვგეგმავთ, რეფერალურ საავადმყოფოსთან არსებული გზაგამყოფის რეკონსტრუქციას,  „მონატრების სკვერს“ რომ ეძახიან, ბაგრატიონის ქუჩის ბოლოს – მის რეკონსტრუქციას,  ბარცხანაში, ველობილიკის გასწვრივ გვინდა რომ კანების ზოლი გავაკეთოთ. ეს ძალიან ლამაზი მცენარეა, რომელიც მთელი ზაფხული ყვავილობს. ბლაგოევგრადის ქუჩაზე, ვგეგმავთ კონუსისებური კიპარისების დარგვას და მერიის ირგვლივ სკვერების რეკონსტრუქციას.  გრიბოედოვის ქუჩაზე, სადაც მცენარეების სიხალვათეა, გვინდა გამწვანება შევიტანოთ. ესაა ჩვენი ამ წლის გეგმა.“ – ამბობს ლევან ჭანუყვაძე.

მისივე თქმით, ქალაქში ასევე იგეგმება ვერტიკალური გამწვანების, აივანზე გადმოკიდებული ქოთნების განახლება.

ამჟამად ბათუმის გამწვანებისა და ლანდშაფტური დაგეგმარების სამსახურს ტენდერი აქვს გამოცხადებული 200 ათას ლარზე ხე-მცენარეების შესაძენად. გამწვანების სამსახური ბათუმისათვის ტუიას, არყის ხეების, ფიჭვების, ლავანდების, ზამბახების, ჰორტენზიების და სხვა მცენარეების შეძენას გეგმავს.

გამწვანებისა და ლანდშაფტური დაგეგმარების სამსახურის უფროსის თქმით, მათი გეგმების განსახორციელებლად არსებული ფინანსური რესურსი არ იქნება საკმარისი, ამიტომ დამატებით ითხოვენ დაფინანსებას, რომ შემოდგომაზე კიდევ ერთ ტენდერი გამოაცხადონ. „თუ ეს მოხერხდება, ქალაქი შეიცვლება გამწვანების კუთხით“ – ამბობს ლევან ჭანუყვაძე.

გადაბეჭდვის წესი


ასევე: