ფატი ხალვაში თავისი ბიუროსთვის ბათუმის მერიას ოფისს სთხოვს



ფატი ხალვაში, როგორც ბათუმის N68 ოლქის მაჟორიტარი პარლამენტის წევრი, თავისი ბიუროსთვის ბათუმის მერიისგან საოფისე ფართობს ითხოვს. შესაბამისი წერილით პარლამენტარმა ქალაქის მერს, გიორგი ერმაკოვს, მიმდინარე წლის 6 თებერვალს მიმართა.

IMG_20170223_075602

ბათუმის მერი მზადაა ბათუმში, მაიაკოვსკის ქუჩაზე, N23-ში მდებარე 23, 33 კვ.მ ფართობი, რომელიც ბათუმის მუნიციპალიტეტის საკუთრებაშია, ფატი ხალვაშს [პარლამენტის წევრის უფლებამოსილების ვადით] მიაქირაოს წელიწადში 3950 ლარად, ანუ, თვეში დაახლოებით 329 ლარად.

მერს ამ გადაწყვეტილების მისაღებად საკრებულოს თანხმობა სჭირდება. ბათუმის საკრებულო საკითხს უახლოეს, სავარაუდოდ, 27 თებერვლის სხდომაზე განიხილავს.

„26,33 კვ.მ არასაცხოვრებელი ფართი შეადგენს 119,58 კვ.მ ძირითადი ფართის ნაწილს და შედგება ორი ოთახისგან, განთავსებულია მრავალსართულიანი საცხოვრებელი შენობის პირველ სართულზე… გამოდგება ოფისად ან სხვა სახის კომერციული დანიშნულებით. ფართი განარემონტებია უახლოეს წარსულში, კარ-ფანჯარა მეტალო-პლასმასისა, იატაკი ლამინატისა, შიგა და გარე კედლები შებათქაშებული და შეღებილია, ფართს ქუჩის მხრიდან გააჩნია შემოსასვლელი ორფრთიანი რკინის კარი“ – აღნიშნულია „რიალ აუდიტის“ დასკვნაში, რომლის მიხედვითაც ამ საოფისე [კომერციული] ფართობის 1 კვ.მ საწყისი საბაზრო ფასი „აუდიტის შეფასებით განისაზღვრა 3 000 ლარის ოდენობით, ხოლო შესაფასებელი 26,33 კვ.მ ფართის საბაზრო ფასი შეადგენს 78 990 ლარს“.

აღნიშნულ კომპანიას კომერციული ფართობის შეფასება ბათუმის მერიამ მიმდინარე წლის 13 იანვარს დაუკვეთა. შეფასება კი მერიას 15 თებერვალს ჩაბარდა.


ფატი ხალვაში საქართველოს პარლამენტის წევრია „ქართული ოცნებიდან“.

საქართველოს პარლამენტის 2016 წლის 8 ოქტომბრის არჩევნებში, აჭარაში, „ქართული ოცნების“ მხოლოდ ერთმა მაჟორიტარმა კანდიდატმა, ანზორ ბოლქვაძემ გადალახა 50%-იანი ბარიერი. მმართველი გუნდის დანარჩენი კანდიდატები პარლამენტის წევრები მეორე ტურის შემდეგ გახდნენ.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com