ბარათაშვილის #24

ბათუმის მერია: ბარათაშვილის #24-ში დემონტაჟზე ნებართვა არ გაგვიცია, თუმცა პროექტი შეთანხმებულია

ბათუმის მერიის არქიტექტურის სამსახურის უფროსი ირაკლი ახალაძე ამბობს, რომ ბათუმის მერიას არ გაუცია ბარათაშვილის #24-ში მდებარე შენობის დემონტაჟის ნებართვა.

ქალაქის არქიტექტურის სამსახურის უფროსი აქვე დასძენს, რომ სახლის პროექტი, რომელიც უნდა აიგოს ბარათაშვილის #24-ში, შეთანხმებულია, თუმცა კომპანიას მერიაში ჯერ არ შეუტანია განაცხადი მშენებლობის ნებართვაზე.

„პროექტი შეთანხმდა შარშან. მშენებლობის ნებართვა გაიცემა სამ სტადიად. პირველი და მეორე სტადია გავლილი აქვს, მათ შორის კულტურული მემკვიდრეობის სააგენტოში, მაგრამ მშენებლობის ნებართვაზე ჯერ არ მოუმართავთ. მოგვმართეს მხოლოდ დემონტაჟის ნებართვაზე, რაზეც ჯერჯერობით არ გვაქვს გაცემული.“

ბარათაშვილის #24-ში კომპანია „დარ ბილდინგი“ გეგმავს 7-სართულიანი სახლის მშენებლობას.

ბათუმის მერიის ზედამხედველობის სამსახურის უფროსის, ზაალ მამუჭაძის თქმით, ამ წუთებში ბარათაშვილის #4-ში მუშაობს ზედამხედველობის სამსახურის ჯგუფი, დემონტაჟი შეჩერებულია და სავარაუდოდ, კომპანია დაჯარიმდება.

ამავე თემაზე: 

ბათუმში ბარათაშვილის #24-ში ისტორიული სახლი დაანგრიეს

ავტორი
ნანა კვაჭაძე, ჟურნალისტი ტელ: [0422] 27 45 12 ელფოსტა: kvachadze.n@gmail.com