მთავარი,სიახლეები

გვენეტაძის გადაწყვეტილებით, საკრებულოს თავმჯდომარის ყოფილ მოადგილეს პატიმრობის ვადა რვა წლით გაეზარდა

03.02.2017 • 26295
გვენეტაძის გადაწყვეტილებით, საკრებულოს თავმჯდომარის ყოფილ მოადგილეს პატიმრობის ვადა რვა წლით გაეზარდა

გადაწყვეტილება, რომელსაც უზენაესი სასამართლოს თავმჯდომარე, ნინო გვენეტაძე აწერს ხელს, სასჯელის მნიშვნელოვნად გახანგრძლივებას ითვალისწინებს. რევაზ კარალიძეს, ქობულეთის საკრებულოს თავმჯდომარის ყოფილ მოადგილეს, მანამდე, პირველი და მეორე ინსტანციისგან შეფარდებული სასჯელი – 3 წლით თავისუფლების აღკვეთა, 11.5 წლამდე გაეზარდა.

რევაზ კარალიძესთან ერთად ამავე საქმეში კიდევ ერთი მსჯავრდებულია, მისი ნათესავი – ავთანდილ ცეცხლაძე. მას სასამართლომ თავისუფლების აღკვეთა 3 წლიდან 11 წლამდე გაუხანგრძლივა. პირველი ინსტანციის და სააპელაციო სასამართლოებმა ორივე მსჯავრდებულს „ზეგავლენით ვაჭრობა“ დაადასტურა. უზენაესმა სასამართლომ ამჯერად პროკურატურის მოთხოვნა დააკმაყოფილა და კვალიფიკაცია შეცვალა – დიდი ოდენობით ქრთამის აღება. ნინო გვენეტაძესთან ერთად, ეს გადაწყვეტილება უზენაესი სასამართლოს სისხლის სამართლის პალატის კიდევ ორმა მოსამართლემ მიიღო: პაატა სილაგაძემ და გიორგი შავლიაშვილმა.

ქობულეთის საკრებულოს თავმჯდომარის მოადგილე, რევაზ კარალიძე და მისი ნათესავი, ავთანდილ ცეცხლაძე ქრთამის აღების ფაქტზე სახელმწიფო უსაფრთხოების სამსახურის ანტიკორუფციულმა სააგენტომ დააკავა 2013 წლის 22 ივლისს. გამოძიების ვერსიით, ვინმე რუსლან ცეცხლაძემ ავთანდილის [რევაზ კარალიძის ნათესავი] დახმარებით გაიცნო რევაზ კარალიძე და დახმარება სთხოვა – რუსეთში მცხოვრები ბიზნესმენისთვის ქობულეთში, ფიჭვნარის ტერიტორიაზე მიწის ნაკვეთის შეღავათიან ფასად შეძენა. რევაზ კარალიძე რუსლან ცეცხლაძეს 6 ათასი კვადრატული მეტრი მიწის ნაკვეთის მიყიდვას დაჰპირდა. პროკურატურის მტკიცებით, თუ საბაზრო ფასი მიწის ნაკვეთზე 120 დოლარად ფასობდა, ბიზნესმენი ერთ კვადრატულ მეტრს 55 ლარად შეიძენდა, ხოლო ქრთამის სახით რევაზ კარალიძეს და ავთანდილ ცეცხლაძეს 120 ათასს ლარს გადასცემდა. პოლიციელებმა ავთანდილ ცეცხლაძე მაშინ დააკავეს, როცა მას რუსლან ცეცხლაძემ ქრთამის სახით მისაცემი ფულიდან 30 ათასი ლარი წინასწარ გადასცა. გამოძიებას არ წარმოუდგენია მტკიცებულება, სადაც ჩანს უშუალოდ რევაზ კარალიძის მხრიდან ქრთამის აღების ფაქტი.

„ეს არის საინტერესო, თუ რევაზ კარალიძე ქრთამის აღებას აპირებდა, მაშინ გადაეღოთ ესეც და პირდაპირი მტკიცებულება იქნებოდა,“ – გვიყვება ელენე ლაზარიაშვილი, რევაზ კარალიძის ადვოკატი. ის ყურადღებას ამახვილებს იმაზე, რომ გამოძიების მიერ წარმოდგენილი აუდიო და ვიდეო ჩანაწერებიდან სასამართლო, ძირითადად, ერთ აუდიო ჩანაწერს დაეყრდნო, რომლის ნამდვილობა ექსპერტიზამ ვერ დაადასტურა:

„ამ ჩანაწერში ისმოდა რუსლან ცეცხლაძის და ავთანდილ ცეხლაძის საუბარი. ისინი ბათუმიდან ქობულეთისკენ მიემგზავრებოდნენ. ამ დროს რუსლანი აძლევს ფულს ავთანდილს და ეუბნება, თუ რამდენი უნდა გადასცეს რეზო კარალიძეს. ქობულეთში ავთანდილი პოლიციელებმა დააკავეს. ამ ჩანაწერით იქნებოდა შესაძლებელი ქრთამის აღების დადასტურება, მაგრამ თავად შსს-ს ექსპერტიზამ ვერ დაადგინა მისი ნამდვილობა. აუდიო ფაილი დისკზე იმ ფორმატით იყო ჩაწერილი, რომ მისი ავთენტურობის განსაზღვრა იყო შეუძლებელი. ექსპერტიზამ შინაგან საქმეთა სამინისტროს მიმართა, თავდაპირველი ვერსია წარმომიდგინეო, მაგრამ შსს-ს პასუხი ამაზე იყო ის, რომ მოწმემ, რუსლან ცეცხლაძემ მათ ჩანაწერი გადასცა და გაუჩინარდა. ჩვენი ინფორმაციით, ეს რუსლან ცეცხლაძე იყო შსს-ს აგენტი, რადგან რთულია დაიჯერო, რაც პროკურორებისგან მოვისმინეთ: რუსლანი შეესწრო ქრთამის აღების შემთხვევას და საკუთარი სურვილით მივიდა არა, მაგალითად, პროკურატურაში, ან შსს-ში, არამედ პირდაპირ ანტიკორუფციულ სააგენტოში. გამოძიების ვერსიით, იმ ბიზნესმენის იდენტიფიცირებაც ვერ მოხერხდა, ვისაც ფიჭვნარში თითქოს მიწის შეძენა სურდა“, – ამბობს ელენე ლაზარიაშვილი.

აუდიო ფაილის ჩანაწერის ნამდვილობას პასუხობს უზენაესი სასამართლოც თავის გადაწყვეტილებაში: „პალატას მიაჩნია, რომ ხსენებული ფარული აუდიო ჩანაწერის შინაარსის ნამდვილობა დასტურდება სხვა ფარული ვიდეო ჩანაწერებით, რომელთა შინაარსი სრულიად უდავოდ ადასტურებს იმ გარემოებას, რომ მსჯავრდებულები სწორედ მართლსაწინააღმდეგო მიზნებით და მოტივებით ახორციელებდნენ თავიანთ დანაშაულებრივ ქმედებებს“.

ადვოკატის შეფასებით, საშიშ ტენდენციასთან გვაქვს საქმე, როცა უზენაესი სასამართლო, განსაკუთრებით კი მისი თავმჯდომარე დასაშვებად მიიჩნევს დაეყრდნოს მტკიცებულებას, რომლის ნამდვილობა ვერ დგინდება. „სისხლის სამართლის ამოსავალი პრინციპია არის ის, რომ ნებისმიერი მტკიცებულება, რომელიც გამოიყენება ბრალდებულის წინააღმდეგ, უნდა იყოს უტყუარი. საიდან შეიძლება დადასტურდეს სხვა ვიდეო ჩანაწერით იგივე? მარტივი ლოგიკაა, რომ ასე ვერ იქნება. სხვა ჩანაწერებში არსად პირდაპირ ქრთამის აღებაზე საუბარი არაა. იმ ჩანაწერების მიხედვით, რევაზ კარალიძე საუბრობს ფულზე, მაგრამ ეს არის თანხა, რომელიც ბიზნესმენს უნდა გადაეხადა აუქციონში მისაღებად. რაც შეეხება ავთანდილ ცეცხლაძეს, ის ადასტურებს იმას, რომ შუამავლობისთვის უნდა მიეღო გარკვეული თანხა, მაგრამ ეს არ იყო ქრთამი და ამას არ ჰქონდა კავშირი რევაზ კარალიძესთან“, – გვიყვება ელენე ლაზარიაშვილი.

უზენაესმა სასამართლომ არ გაიზირა სააპელაციო სასამართლოს დასაბუთება, რომლის მიხედვითაც: „რევაზ კარალიძის უშუალო უფლებამოსილებაში არ შედიოდა მიწის საკითხის გადაწყვეტა და მას არ შეეძლო ერთპიროვნულად გადაეჭრა ქობულეთის ტერიტორიაზე არსებული მიწის ნაკვეთის ნორმატიული ფასის განსაზღვრისა და პრივატიზაციის საკითხი.“

რევაზ კარალიძე საკრებულოს თავმჯდომარის მოადგილის გარდა, იყო ქობულეთის საკუთრებაში არსებული ქონების განკარგვის და აუქციონის ორგანიზების მუდმივმოქმედი სააუქციონო კომისიის თავმჯდომარის მოადგილე. სააპელაციო სასამართლომ გაიზიარა იმ მოწმეთა ჩვენებები, რომლის მიხედვითაც რევაზ კარალიძე ერთპიროვნულად მიწის შეღავათიან ფასად გასხვისებას ვერ მოახერხებდა. იმ დროისთვის არსებული რეგულაციით, საკუთრების კომისიას კოლეგიურად უნდა მიეღო გადაწყვეტილება მიწის ნაკვეთის აუქციონზე გატანის შესახებ, საბოლოო გადაწყვეტილებას კი, ქობულეთის საკრებულო იღებდა.

ეს გარემოება აღმოჩნდა მთავარი პირობა წინა ინსტანციების სასამართლოებისთვის,  რის გამოც მათ პროკურატურის მოთხოვნის დაკმაყოფილებაზე უარი თქვეს და ქრთამის აღების ნაცვლად, „ზეგავლენით ვაჭრობა“ დაადგინეს. ეს მუხლი გაცილებით მსუბუქ სასჯელს ითვალისწინებს, ვიდრე დიდი ოდენობით ქრთამის აღება, რაც 11-დან 15 წლამდე თავისუფლების აღკვეთით ისჯება.

„რევაზ კარალიძის საქმეზე“ უზენაესმა სასამართლომ გადაწყვეტილება გასული წლის 28 ივლისს მიიღო. რეზო კარალიძის ოჯახის ინფორმაციით, მზადდება სარჩელი ევროპის ადამიანის უფლებათა დაცვის სასამართლოში შესატანად.

 

 

გადაბეჭდვის წესი


ასევე: