მეწარმე ქალთა ბიზნეს ფორუმი ბათუმში [ანონსი]

წარმატებული ქალი – ძლიერი ეკონომიკა! – ამ სლოგანით ბათუმში, მეწარმე ქალთა ბიზნეს ფორუმი გაიმართება. ფორუმს „აჭარის ქალ ბიზნესმენთა ასოციაცია“ აჭარისა და საქართველოს სავაჭრო-სამრეწველო პალატებთან ერთად მართავს.

ასეთი ბიზნეს ფორუმი აჭარაში პირველად იმართება და მასში ოთხმოცამდე მეწარმე ქალი მიიღებს მონაწილეობას.

ორგანიზატორთა განცხადებით, ბიზნეს ფორუმის მთავარი მიზანია „ქალთა შესაძლებლობების გაძლიერება ქვეყნის ეკონომიკაში, კერძოდ კი, მცირე და საშუალო ბიზნესში, მათი ჩართულობის გაზრდით, საქმიანი ურთიერთობების გაღრმავებით და ახალი ბიზნეს კონტაქტების შეძენით“.

„აჭარის ქალ ბიზნესმენთა ასოციაციაში“ ასევე აცხადებენ, რომ მუნიციპალურ „ქალთა ოთახებთან“ პარტნიორობით უკვე დაიწყეს მუშაობა სოფლად მცხოვრები ქალების მცირე და საშუალო ბიზნესში ჩართვაზე. „ქალთა ოთახების“ კოორდინატორებს ჩაუტარდათ ბიზნეს გეგმისა და ბიზნეს პროექტის წერის ტრენინგები და სხვ.

ბიზნეს ფორუმი ბათუმში, სასტუმრო „შერატონში“ 31 იანვარს, 10 საათზე გაიხსნება.