ბატონო ჯემალ, „ტელეარხ 25“-თან დაკავშირებით მინდა გკითხოთ…
გუშინ ჩემთან „ასავალ-დასავალიდან“ იყვნენ, ყველა არხი იყო ჩემთან, კი მივეცი ინტერვიუ.
ჩვენ სხვა გაზეთი ვართ. თუ შეგიძლიათ დაასახელოთ თანხა, რაც გადაიხადეთ ტელევიზიაში?
მე გუშინ ტელევიზიას მივეცი ინტერვიუ და იციან მაგი, საქმის კურსში არიან…
გუშინ ტელეარხის ჟურნალისტებმა პროტესტის ნიშნად შეწყვიტეს მუშაობა. მათ არ სურთ იმ ტელევიზიაში მუშაობა, სადაც ერთ-ერთი მესაკუთრე არის პოლიტიკური პარტიის წარმომადგენელი პარლამენტში. თუ შეხვდით ჟურნალისტებს?
გუშინ იყვნენ ჩემთან „25 არხის“ ჟურნალისტები და კი ვუთხარი, არავითარი სამსახურის დატოვება, ჩვეულებრივ რიტმში იმუშავებენ და ჩვეულებრივი სახე ექნება ტელევიზიას.
ვის შეხვდით?
ნუ, „არხი 25“-დან იყვნენ ჟურნალისტები. მათ გავესაუბრე, ვუთხარი, რომ არავითარი ზეწოლა არ იქნება, არავითარი პოლიტიზებული არხი არ იქნება.
თქვენი ინფორმაციით, ჟურნალისტები დარჩებიან თუ წავლენ?
აუცილებლად, აუცილებლად.
იმ სახლში, რომელიც თქვენ ფარნავაზ მეფის ქუჩაზე ააშენეთ, „ტელეარხი 25“-ის ყოფილმა მფლობელებმა ბინები იყიდეს. ფული გადაიხადეს თუ ბინებიც ტელევიზიის ფასში შევიდა?
არავითარი, არავითარი.
ფული გადაიხადეს?
რა თქმა უნდა.
ახალ მთავრობაში ამბობენ, რომ აუცილებლად შეისწავლიან ამ ტელევიზიის დამფუძნებლების ახლობლებისთვის სახელმწიფო ქონების ჩუქების საკითხს. ამ გარიგებით გამოძიება თუ დაინტერესდება, პასუხისმგებლობის აღება თქვენც ხომ არ მოგიწევთ?
მაგი მოკითხეთ „არხი 25“-ის მეპატრონეებს, მათ აღიარონ, რა მიიღეს და რა არა. მე ეგ არ ვიცი და არც დაინტერესებული ვარ, რომ მაგათმა რა გარიგება და რა ქონებები მიიღეს. არ ვარ ინფორმირებული და ვერაფერს გეტყვით.
მე რამდენიც გადავიხადე, იმისი პასუხისმგებელი ვარ.
პასუხისმგებლობა მე რატომ უნდა დამეკისროს… ეს ტელევიზია რომ შეცვლილიყო, სხვანაირი ფორმატით რომ წასულიყო… არავითარი. გამოვრიცხავ. მე შევიძინე ეს ნაღდ ფულში და არავითარი იგი არ მქონია…
არსებობს ვერსია, რომ თქვენ ამ გარიგებაში წარმოადგენთ თემურ პატარიძეს, აჭარის კუდის ყოფილ უფროსს. შეგიძლიათ ამ მოსაზრების გაბათილება?
ბატონ თემურის მე ვერც ვიცნობ და არც მქონია შეხვედრა. სახით რომ დავინახო, ვერ ვიცნობ.
არიან ადამიანები, რომლებიც ამბობენ, რომ თქვენ პატარიძესთან ლამის ყოველდღიური ურთიერთობა გქონდათ…
გამორიცხულია. ნებისმიერმა პიროვნებამ დამიდგეს წინ და მითხრას, რომ მე თემურ პატარიძესთან მქონდა რამე ურთიერთობა და რამე გარიგება. თქვენ წარმოიდგენთ, რომ თემურ პატარიძეს სახით ვიცნობ ქალაქიდან.
ხომ არ აპირებთ ტელევიზიის გაყიდვას?
ჯერ არ მიფიქრია მაგაზე.
როდის აპირებთ ტელევიზიაში მისვლას?
უახლოეს დღეებში მივალ, გავესაუბრები ჟურნალისტებს, თანამშრომლებს და ყველას.
პარტნიორს თუ ესაუბრეთ?
არა. არ დავინტერესებულვარ იმისათვის, რომ არ ყოფილა ხელის შეშლა, ტელეფონის ზარი, რომ რამე შევცვალოთ ტელევიზიაში.
რატომ მალავდით ტელევიზიის ყიდვას?
მეპატრონეების სალაპარაკოს მე ვერ ვილაპარაკებ. მაგათ შეეკითხეთ პრესკონფერენცია რატომ არ ჩაატარეს და არ მოიწვიეს ჟურნალისტები. მე ვიყავი მყიდველი.
და თქვენ რატომ არ თქვით?
არ ჩავთვალე მიზანშეწონილად და არ გავაკეთე. რა ვიცი.
/იბეჭდება სტილის დაცვით/
