მოსწავლეები სკოლის გარეშე, კერძო სახლში

დაწყებითი საფეხურის 16 მოსწავლე, რომლებიც ზემო დაგვაში ცხოვრობენ, სკოლის გარეშე არიან დარჩენილნი. ამორტიზებულია შენობა, ანუ მათი ყოფილი სკოლა, რომელიც 1978 წელს აიგო. ამ სკოლის პედაგოგი ამბობს, რომ შენობაში ბავშვების გაჩერება სახიფათოა, ამიტომ კლასები კერძო მშენებარე სახლის პირველ სართულზე განათავსეს. პედაგოგებიცა და ბავშვებიც მოკლებულნი არიან არა მარტო ინფრასტრუქტურას, არამედ თითქმის ყველა საჭირო საგანმანათლებლო რესურსს.

ქობულეთის მუნიციპალიტეტის სოფელ დაგვაში ერთი საშუალო სკოლა არსებობს, თუმცა ზემო დაგვის მოსახლეობა საშუალო სკოლას ხუთი კილომეტრითაა დაშორებული. ამიტომ სოფლის ამ ნაწილში რვაკლასიანი სკოლა წლების განმავლობაში ფუნქციონირებდა. წინა ხელისუფლების დროს, როცა საჯარო სკოლების გამსხვილების პროცესი დაიწყო, ზემო დაგვაში მხოლოდ ოთხწლიანი სკოლა დარჩა.

ადგილობრივები ამბობენ, რომ ამ სკოლის შენარჩუნება მათთვის ძალიან მნიშვნელოვანია, რადგან პირველი და მეორე კლასის მოსწავლეების შორ მანძილზე ტარება ბევრ პრობლემას უკავშირდება.  „ჩემი შვილი მომავალ წელს შედის პირველ კლასში. მირჩევნია ამ სკოლაში იაროს, რადგან ქვემო დაგვა შორსაა და არც ჩემთვისაა იქ სიარული მისაღები“, –  გვეუბნება სკოლის პედაგოგი ლიანა გორაძე.

დაწყებითი განათლების სკოლის შენობა წინა საუკუნეშია აგებული. შენობა ორსართულიანია და როგორც პედაგოგები გვეუბნებიან, კარგად არის ნაშენი.  „სკოლას ორმაგი კედლები აქვს“. თუმცა, დროთა განმავლობაში შენობის ჭერი და იატაკი დაზიანდა – სახურავიდან ჩამოსული წყლის გამო. სიძველისგან ჩამოშლილია კარები და ფანჯრებიც. ერთ დროს ცისფრად შეღებილი კედლები ფერდაკარგულია და დაჭუჭყიანებული.

იატაკზე წიგნებია მიმოყრილი, კედლებზე კი რამდენიმე ადგილას ბავშვების ნახატები და თვალსაჩინოების ნაგლეჯებია შემორჩენილი. ერთ ოთახში ძველი პიანინოც დგას, რომლის კლავიშების დიდი ნაწილი დაზიანებულია.  „თუ შენობას კაპიტალურ რემონტს გაუკეთებენ, ძალიან ლამაზი იქნება“, –  გვეუბნება სოფლის ერთ-ერთი მცხოვრები, რომელიც ერთ დროს სკოლაში დამლაგებლად მუშაობდა.

სკოლის გარეშე დარჩენილ მოსწავლეებს, გაკვეთილები კერძო სახლში უტარდებათ.

სკოლის გარეშე დარჩენილ მოსწავლეებს, გაკვეთილები კერძო სახლში უტარდებათ.

„შენობა 15 წელია რეკონსტრუქციას ექვემდებარება. ბავშვებისთვის წელს განსაკუთრებით სახიფათო მდგომარეობა შეიქმნა – გვეშინოდა იატაკი არ ჩავარდნილიყო, რადგან სისველისგან დალპა. იგივე მდგომარეობაშია ჭერიც  –  შესაძლებელია ჩამოვარდნილიყო და ბავშვები დაეზიანებინა. ამიტომ, დროებით, მეზობელი სახლის პირველ სართულზე გადაგვიყვანეს, თუმცა კეთილმოწყობილი არც ის ოთახებია“, –  გვეუბნება  ლიანა გორაძე.

გარდა იმისა, რომ დაწყებითი საფეხურის მოსწავლეები განათლებისთვის სრულიად შეუფერებელ გარემოში სწავლობენ, ისინი მოკლებულნი არიან სხვა რესურსებსაც. მაგალითად, მოსწავლეების მერხებზე არ დევს  „ბუკები“, მხოლოდ წიგნები აქვთ გადაშლილი.

„არანაირი საგანმანათლებლო რესურსი არ გვაქვს, ინტერნეტზე ხომ საუბარიც ზედმეტია. ეს მაშინ, როცა პროექტების შედგენა, დამატებითი რესურსების მოძიება შეუძლებელია ინტერნეტწყაროების გარეშე. არც სკოლაში და არც სახლში ბავშვებს ინტერნეტთან წვდომა არ აქვთ, მაშინ, როცა ეროვნული სასწავლო გეგმა ტექნოლოგიებთან მუშაობას გვავალდებულებს.

მე თვითონ ან ნათესავთან მიწევს ქალაქში ჩასვლა, ან რომელიმე მეზობელთან უნდა გადავიდე, რომ ვიმუშაო. სხვასთან ყოველთვის ვერ მიხვალ, რადგან სოფელში ძალიან ცოტას თუ აქვს ინტერნეტზე წვდომა“, – გვეუბნება პედაგოგი.

მშენებარე სახლში ოთხი კლასი ორ ოთახშია განთავსებული. პირველი და მეორე კლასის მოსწავლეები ერთად სხედან, მესამე და მეოთხე – ერთად.

სკოლაში წლების განმავლობაში არც ინვენტარი განახლებულა.  „განსხვავებული ასაკის ბავშვები ერთი სტანდარტის მერხებზე სხედან. ეს, ბუნებრივია, სახიფათოა მათი ხერხემლისთვის და, ზოგადად, ჯანმრთელობისთვის“, –  გვეუბნება ლიანა გორაძე.

კეთილმოწყობილი გარემო მოსწავლეებს არც ახალ  „სკოლაში“  აქვთ. შესასვლელში, რომელიც ასევე კლასად მიიჩნევა, სიბნელეა – აქ ნათურა არ ანთია. მშენებარე სახლის აივანზე, სადაც სკოლაა განთავსებული,  „ქართული ოცნების“  დროშა ჰკიდია, აივნის შიგნით კი ამავე პარტიის საარჩევნო პლაკატებია მიკრული.

„სამინისტროს აქვს თუ არა ინფორმაცია, ვერ გეტყვით. ქობულეთის რესურსცენტრის ხელმძღვანელი იყო მოსული და შენობას ფოტოები გადაუღო. ამ სახლის ქირას იხდიან თუ არა არც ეს ვიცი“,  –  ამბობს პედაგოგი.

ზემო დაგვის ოთხწლიანი სკოლა რეაბილიტაციას საჭიროებს

ზემო დაგვის ოთხწლიანი სკოლა რეაბილიტაციას საჭიროებს

ოთხწლიან სკოლას ადმინისტრირებას დაგვის საშუალო სკოლის დირექცია უწევს. სკოლის დირექტორი ხათუნა დუმბაძე შვებულებაში იმყოფება. სკოლის სასწავლო ნაწილის ხელმძღვანელი მაია კიკნაძე კი ამბობს, რომ მისთვის უცნობია არსებობს თუ არა სკოლასა და კერძო მესაკუთრეს შორის ქირის გადახდაზე ხელშეკრულება.

აჭარის განათლების სამინისტროს ოფიციალური ინფორმაციით, სოფელ დაგვაში 2017 წლისთვის დაგეგმილია ოთხწლიანი სკოლის შენობის პროექტის შესყიდვა. სამინისტროს პრესსამსახურის განცხადებით,  „პროექტის შესყიდვის შემდეგ გაირკვევა რა თანხაა საჭირო მისი რეაბილიტაციისთვის“.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com