აჭარის ტურიზმის დეპარტამენტის ცნობით, 2016 წლის 10 თვის მონაცემებით, აჭარაში ტურისტების 4,7% -იანი ზრდა ფიქსირდება, რაც 435 585 ტურისტს გულისხმობს. მათ შორის უცხოელი ტურისტების რაოდენობა 19,5 -ითაა [295 269 ტურისტი] გაზრდილი.
აჭარის ტურიზმის დეპარტამენტის ტურისტების რაოდენობის კვლევა რეგიონში არსებულ რეგისტრირებული განთავსების ობიექტების მიერ მიწოდებულ ინფორმაციას ეყრდნობა.
დეპარტამენტის ინფორმაციით, საერთაშორისო მოგზაურების რაოდენობის განსაკუთრებული მატება ბათუმის საერთაშორისო აეროპორტში დაფიქსირდა. 11 თვეში საჰაერო გზით აჭარაში შემოსული საერთაშორისო მოგზაურების რაოდენობა 70%-ით გაიზარდა, რაც 126 474 უცხოელ ვიზიტორს გულისხმობს.
მოგზაურების უმრავლესობა რეგიონს ისევ თურქეთიდან (962 382), აზერბაიჯანიდან (114 177), რუსეთიდან (62 150), უკრაინიდან (36 922) და სომხეთიდან (16 158) ესტუმრა. გასულ წელთან შედარებით 2016 წელს აჭარაში განსაკუთრებით გაიზარდა ებრაელი საერთაშორისო მოგზაურების რაოდენობა. რეგიონს 11 თვეში 28 982 საერთაშორისო მოგზაური ეწვია ისრაელიდან, რაც 3-ჯერ აღემატება გასული წლის ანალოგიურ პერიოდს. აჭარის ტურიზმის დეპარტამენტის ცნობით, ისინი ძირითადად – 28 498 ტურისტი – აჭარაში ბათუმის საერთაშორისო აეროპორტიდან შემოვიდა.
გასულ წელთან შედარებით 87%-ით გაიზარდა მოგზაურების რაოდენობა ირანიდან, საიდანაც რეგიონში 11 თვის განმავლობაში 32 340 ვიზიტორი შემოვიდა.
მიმდინარე წელს ასევე გამოიკვეთა საერთაშორისო მოგზაურების რაოდენობის ზრდა არაბეთის გაერთიანებული საამიროებიდან (+5%) და საუდის არაბეთიდან (+44%).
