არჩევნების შემდგომი დეპრესია პარტიების რეგიონულ ოფისებში

არჩევნების შედეგების შემდეგ იმედგაცრუება პარტიების რეგიონულ ორგანიზაციებზეც აისახა. ზოგიერთმა რეგიონულმა თავმჯდომარემ პარტიაში თანამდებობა, ზოგიერთმა კი საერთოდ პარტიაც დატოვა. რეგიონული ორგანიზაციების ოფისების უმეტესობა დაკეტილია. ემოცია, ფსიქოლოგიური ფაქტორი, დეპრესია და ტრაგედია – დღეს ამ სიტყვებს იყენებენ პარტიებში ლიდერებისა თუ წევრების მიერ არჩევნების შემდეგ მიღებული გადაწყვეტილებების შეფასებებისას.

კობა ჩხეიძე – აჭარაში „თავისუფალი დემოკრატების“ რეგიონული ორგანიზაციის თავმჯდომარე, მას შემდეგ, რაც თანამდებობა დატოვა და პარტიაც [საპარლამენტო არჩევნების შემდეგ], ბათუმის საკრებულოს სხდომაზე აღარ გამოჩენილა. ამჯერად კობა ჩხეიძემ ინტერვიუზეც უარი თქვა. სხდომაზე არ გამოჩენილა არც ფრაქცია „თავისუფალი დემოკრატების“ მეორე წევრი ჯაბა ბერიძე, არჩევნების შემდეგ პარტია მანაც დატოვა. შედეგად ბათუმის საკრებულოში ფრაქცია „თავისუფალი დემოკრატები“ დაიშალა.

პარტიაში დარჩა ფრაქციის მესამე წევრი და ბათუმის საკრებულოს განათლების კომისიის თავმჯდომარე ნინო ბერაძე. ის ამავდროულად საქართველოს პარლამენტში პარტიის მაჟორიტარი კანდიდატი იყო ბათუმის 69-ე საარჩევნო ოლქიდან.

ნინო ბერაძის თქმით, მას შემდეგ, რაც კობა ჩხეიძემ პარტია დატოვა, რეგიონულ ორგანიზაციაში პარტიის ახალი ლიდერი თამარ კეკენაძე ჩამოვიდა და პარტიის წევრებს მასთან „ემოციური შეხვედრა“ ჰქონდათ:

„განვიხილეთ სამომავლო გეგმები. გადავინაწილეთ საქმე და ვმუშაობთ, რომ აღვწეროთ, ვინ დავრჩით. არჩევნების პერიოდში განსაკუთრებით გვეხმარებოდა ახალგაზრდული ჯგუფი. მიუხედავად შედეგისა, ისინი რჩებიან პარტიაში. ახლა ჩვენ რიგითი წევრები გავხდით ლიდერები და თვითორგანიზების პრინციპით ვხელმძღვანელობთ. რაც შეეხება ლიდერს, ის დემოკრატიულად უნდა ავირჩიოთ. ვინც გამოთქვამს ლიდერობის სურვილს, წარმოადგენს სტრუქტურის გამართვა-ჩამოყალიბების და შემდგომში განვითარების გეგმას, შეიძლება დავასახელოთ ლიდერი – ამ გეგმის მიხედვით, სანამ ყრილობაზე ვინმეს ავირჩევდეთ“, – აცხადებს ნინო ბერაძე.

ნინო ბერაძე ამბობს, რომ მას „კარგი ხელმძღვანელის გვერდში დგომა“ უკეთ გამოსდის, ვიდრე ლიდერობა. თუმცა, თუ ეს საკითხი დღის წესრიგში დადგება, არც ლიდერობაზე იტყვის უარს.

ნინო ბერაძე უარყოფითად აფასებს კობა ჩხეიძის გადაწყვეტილებას არჩევნებში მარცხის შემდეგ პარტიიდან წასვლასთან დაკავშირებით: „ჩემი აზრით, მან არასწორი გადაწყვეტილება მიიღო. ეს იყო ემოციურ დონეზე მიღებული გადაწყვეტილება.

თუნდაც ის ათასობით ხმა, რაც აჭარაში მივიღეთ, არ მაძლევს უფლებას დავტოვო პარტია. ყველა ძლიერი პარტიის ცხოვრებაში ბუნებრივი მომენტია წაგება და ეს არ უნდა გახდეს ტრაგედიისა თუ უპასუხისმგებლო გადაწყვეტილების საფუძველი. როცა პარტიის ხელმძღვანელი ხარ, ემოციების მართვა მოგეთხოვება“, – ამბობს ნინო ბერაძე.

არჩევნების შემდეგ პარტიის ბათუმის ოფისის თავმჯდომარის თანამდებობა დატოვა „რესპუბლიკელმა“ ზაურ ახვლედიანმა. გადაწყვეტილება ჯერ მოუცლელობით ახსნა, შემდეგ კი დააკონკრეტა, რომ „პარტიაში სხვაგვარად უნდა წასულიყო პროცესები და არ წავიდა“. მისივე თქმით, ამას დაემატა ისიც, რომ კულტურული მემკვიდრეობის სააგენტოში, სადაც ის ძეგლებზე ნებართვების განყოფილებას ხელმძღვანელობს, სამსახურებრივი მოვალეობის შესასრულებლად უფრო მეტი დრო სჭირდება. თავმჯდომარის გარეშე დარჩენილმა „რესპუბლიკელებმა“ ცოტა ხანში პარტიის ოფისიც დაკეტეს. მიზეზად ფინანსური პრობლემები დაასახელეს.

ამ პარტიაში თავმჯდომარის მოადგილის თანამდებობა თემურ ყურაშვილს უკავია. ის ბათუმის საკრებულოს წევრი და „რესპუბლიკელების“ ფრაქციის თავმჯდომარეცაა. თემურ ყურაშვილის თქმით, ყოფილი თავმჯდომარე პარტიიდან წასვლას არ გეგმავს: „აქამდე ის ორ ფრონტზე იყო გაჭრილი და ახლა გადაწყვიტა მეტი დრო საჯარო სამსახურს დაუთმოს.“ თემურ ყურაშვილი ფიქრობს, რომ თავმჯდომარის გადაწყვეტილება „ფსიქოლოგიურმა ფაქტორებმა განაპირობა“.

თემურ ყურაშვილის შეფასებით, არჩევნების შედეგების შემდეგ პარტიაში რთული სიტუაციაა – „რესპუბლიკელები“ ახლა კრებისთვის ემზადებიან, სადაც ბევრ კითხვას უნდა გაეცეს პასუხი: `ჩვენ ვერ მივიტანეთ ჩვენი სათქმელი და ამომრჩეველმა ვერ დაგვინახა. ხან მივდიოდით ოპოზიციაში და მინისტრები რჩებოდნენ, შემდეგ გადადგნენ და დრო აღარ დაგვრჩა იმისთვის, რომ ჩვენი სახე გვეჩვენებინა ამომრჩევლისთვის. ამიტომ ოპოზიციურ ფლანგზე და ვერც სახელისუფლებო ფლანგზე ამომრჩეველმა ვერ დაგვინახა. ახლა უკვე გამოკვეთილი ოპოზიციური ძალა ვართ, დავრჩებით ამ ფლანგზე და მოვემზადებით თვითმმართველობის არჩევნებისთვის.“

არჩევნების შედეგების მიხედვით „ერთიანმა ნაციონალურმა მოძრაობამ“ უმაღლეს საბჭოში პროპორციული სიით ხუთი წევრის შეყვანა შეძლო. პარტიაში შედეგით კმაყოფილები არ არიან და მიიჩნევენ, რომ ხელისუფლებამ არჩევნები გააყალბა, ერთ-ერთ არგუმენტად კი გაბათილებული ბიულეტენების რაოდენობას ასახელებენ. პარტიის აჭარის ორგანიზაციის ლიდერი ლევან ვარშალომიძე, რომელიც უმაღლესი საბჭოს არჩევნებზე პარტიის პროპორციულ სიაში პირველი ნომერი იყო, უმაღლეს საბჭოში არ შედის: „მე არ შევდივარ უმაღლეს საბჭოში, რაც იმას არ ნიშნავს, რომ მივდივარ. მე ვრჩები ბათუმში და ვაპირებ ვიმუშავო განახლებაზე. მე ვიქნები აქ და მოვუსმენ თითოეულ მოქალაქეს, თითოეულ ამომრჩეველს,“ – განაცხადა მან.

ბათუმში დაკეტილია პაატა ბურჭულაძის პარტიის ოფისიც. პარტიის წევრის მალხაზ ნაკაშიძის თქმით, პარტია ოფისს შეიცვლის, განახლებაზე იმუშავებს და თვითმმართველობის არჩევნებისთვის მოემზადება.

თვითმმართველობისთვის მომზადებას გეგმავს „გირჩიც“. ამ პარტიის ადგილობრივი ლიდერის, ჯემალ ბერიძის თქმით, მომავალ არჩევნებზე პარტია ცუდ გამოცდილებას გაითვალისწინებს და არც ერთ პარტიასთან ბლოკში არ გაერთიანდება. პარტია ოფისის გახსნას და ახალი სტარტით მუშაობას ახალი წლის შემდეგ გეგმავს.

არც საკრებულოში ჩანს და არც ტელეფონს პასუხობს ნინო ბურჯანაძის პარტიის „დემოკრატიული მოძრაობის“ აჭარის ორგანიზაციის ლიდერი გიორგი ცინცქილაძე.

ნეტგაზეთის მასალების სხვა გამოცემებში გადაბეჭდვის წესი
ავტორი