აჭარის ფინანსთა სამინისტრო ურბანული განვითარების დაგეგმარებას იწყებს
აჭარის ტერიტორიაზე არსებული საკურორტო-სარეკრეაციო ადგილების ურბანული განვითარების დაგეგმარებაზე 2017 წელს აჭარის ფინანსთა და ეკონომიკის სამინისტრო იმუშავებს. პროგრამაში ამჯერად მოექცა ზღვისპირა ზოლი და მთა ღომა; მოეწყობა ასევე დასასვენებელი-საპიკნიკე ადგილები ცენტრალურ მაგისტრალებთან. პროგრამა ურბანული განვითარების დაგეგმარების დოკუმენტების შედგენასთან ერთად განაშენიანების რეგულირების გეგმის შემუშავებასაც გულისხმობს, რისთვისაც აჭარის ბიუჯეტში ნახევარ მილიონზე მეტი ლარი იქნება გათვალისწინებული, რაც მომდევნო სამ წელზე გადანაწილდება.
ბობოყვათი-ციხისძირი-ჩაქვისა და სარფი-გონიოს განაშენიანების რეგულირება
„პროგრამა ითვალისწინებს განსავითარებელი ტერიტორიების დაგეგმარებას აჭარის სანაპირო ზოლში და იმის განსაზღვრას, თუ როგორ უნდა განვითარდეს ეს ტერიტორიები. ინვესტორს, კერძო მესაკუთრეს, ეცოდინებათ საინვესტიციო თუ კერძო მშენებლობის სახე, ტიპი და სხვა ქალაქმშენებლობითი პირობები,“ – აცხადებს ნუგზარ ძნელაძე, ფინანსთა და ეკონომიკის სამინისტროს ქალაქმშენებლობის დეპარტამენტის უფროსი.
სარფი. თედო ჯორბენაძის ფოტო
პროგრამა შეეხება როგორც უშუალოდ ავტონომიური რესპუბლიკის საკუ თრებაში არსებულ ტერიტორიებს, ასევე კერძო საკუთრებასაც. კერძო და სახელმწიფო ინტერესების თავსებადობა იქნება ერთ-ერთი მნიშვნელოვანი თემა – აცხადებენ სამინისტროში. ეს ტერიტორიებია: ბობოყვათი [ყოფილი სამთავრობო რეზიდენციის გაგრძელება, ქალაქ ქობულეთის მიმართულებით] და გონიოსა და სარფის მთიანი ზონა. რაც შეეხება უშუალოდ ქალაქ ქობულეთის სივრცითი მოწყობის დოკუმენტს და გენგეგმას, ის უკვე არსებობს. სამინისტროს ინფორმაციით, დასრულებულია ხელვაჩაურის სივრცით მოწყობაზე მუშაობაც.
„დოკუმენტი, რაც პროგრამის ფარგლებში შემუშავდება, არ შეეხება უკვე არსებულ მშენებლობებს. არავითარი, ასე ვთქვათ, დანგრევა თუ წართმევა არ მოხდება, ყველაფერი იქნება სახელმწიფო და კერძო ინტერესთა ჰარმონიაში და თანხვედრაში განხილული. მოეწყობა საჯარო განხილვებიც, იქნება გათვალისწინებული მოსაზრებები და ა.შ.“ – ამბობს ნუგზარ ძნელაძე.
განაშენიანების რეგულირების გეგმაში მოექცევა კერძო საკუთრებაში არსებული ტერიტორიებიც, ძირითადად სარფისა და გონიოს მთიან ზონაში და ქობულეთის მუნიციპალიტეტის სანაპირო ზოლში. ასეთ ზონაში კერძო ტერიტორიის განვითარება-ათვისებას ექნება თავისი კონკრეტული პარამეტრები. „გვინდა ეს ტერიტორიები ისე განვითარდეს, რომ ჯანსაღი გარემო შეიქმნას და არ იყოს ქაოსი და ფუნქციაარეული მოშენების მქონე დასახლებები… ეს ეხება არქიტექტურას, ფუნქციას, განაშენიანების დაგეგმარებას, საინჟინრო კომუნიკაციებს და სხვა,“ – ამბობს ქალაქმშენებლობის დეპარტამენტის უფროსი.
მთა ღომა – საზაფხულო და ზამთრის სამთო კურორტი?
ღომას მთა. სულხან სალაძის ფოტო
მთის კურორტების განვითარების პროგრამაშია შუახევის მუნიციპალიტეტის ტერიტორიაზე არსებული მთა ღომაც.
ღომას მთის კურორტად გადაქცევაზე საუბარი ადრეც იყო, ოღონდ ადგილობრივების თქმით, აქ ყველაფერი მხოლოდ მისასვლელი გზის შეკეთებით დასრულდა.
დღეს დეპარტამენტში ამბობენ, რომ კონცეპტუალური პროექტი დამუშავებულია და ახლა საუბარია დეტალურ დაგეგმარებაზე, რათა განვითარების გეგმა დაისახოს.
ამ ეტაპზე ღომა განიხილება როგორც საზაფხულო სამთო კურორტი, ხოლო პერსპექტივაში – როგორც ზამთრის კურორტი.
დასასვენებელი-საპიკნიკე ადგილები ავტომაგისტრალებთან
2017 წელს აჭარაში „ტურისტული ინფრასტრუქტურის განვითარების ხელშეწყობის“ მიზნით, იგეგმება საავტომობილო გზების გასწვრივ დასასვენებელი-საპიკნიკე ადგილების მოწყობის საპროექტო დოკუმენტაციის შედგენა. პროექტის მიხედვით გათვალისწინებულია ასეთი რვა ობიექტის პროექტის მომზადება.
ნუგზარ ძნელაძე
„კონკრეტული ადგილები განსაზღვრული არ არის, თუმცა მონახაზი გვაქვს. როცა პროგრამა დამტკიცდება და კონკრეტულად შეირჩევა ადგილი, გამოცხადდება ტენდერი. პროგრამა გულისხმობს ბათუმი-სარფისა და ბათუმი-ახალციხის მაგისტრალების გასწვრივ დასასვენებელი და საპიკნიკე ადგილების ორგანიზებას. ასეთ მოწესრიგებულ ადგილებში მგზავრი შეძლებს ავტოტრანსპორტის თუ ველოსიპედის გაჩერებას, ასევე მოსვენებისა თუ მოწესრიგებისთვის ყველა პირობა იქნება. ფეხით მოსიარულე ტურისტის დროებით დასვენებისთვის იქნება მაგიდებიც, რომ ტურისტი თავისი საგზალით შეჩერდეს, დაისვენოს და შემდეგ გააგრძელოს გზა,“ – ამბობს ნუგზარ ძნელაძე.
მისივე თქმით, ასეთი ადგილების ექსპლუატაციის ფორმა ჯერ გადაწყვეტილი არ არის: „ვფიქრობთ, კერძო სტრუქტურებთან ერთად მოხდეს, ან შესაძლოა სახელმწიფომ აიღოს თავის თავზე მისი მოვლა-პატრონობა, რამდენიმე ვარიანტია და შევჯერდებით“.
„ბათუმელების“ ინფორმაციით ასეთი დასასვენებელი-საპიკნიკე ადგილები მოეწყობა ციხისძირში, ერგეში, გონიოში, ასევე ქედის, შუახევისა და ხულოს მუნიციპალიტეტებში ოღონდ არა დაბებში, არამედ მაგისტრალის გასწვრივ.
- შავი ზღვის სანაპირო ზოლში არსებული საკურორტო-სარეკრეაციო ადგილების ურბანული განვითარებისთვის გეგმის შემუშავებისთვის აჭარის მომავალი წლის ბიუჯეტის პროექტში 240 ათასი ლარია გაწერილი;
- ღომას მთისთვის – 100 ათასი;
- დასასვენებელი-საპიკნიკე ადგილების მოწყობის საპროექტო დოკუმენტაციის შედგენასა და მოსაწყობი ობიექტების მშენებლობის ღირებულების განსაზღვრისთვის – 35 ათასი ლარი.
