აჭარის ტელევიზიაში დასრულდა მრჩეველთა საბჭოს რიგგარეშე სხდომა, სადაც საზოგადოებრივი მაუწყებლის აჭარის ტელევიზიისა და რადიოს დირექტორობის მსურველთა დოკუმენტაციის შესაბამისობას განიხილავდნენ კანონმდებლობასთან. მრჩეველთა საბჭოს გადაწყვეტილებით, 10 პრეტენდენტიდან შემდეგ ეტაპზე გადავიდა მხოლოდ – 7. დირექტორობისთვის ბრძოლას გამოეთიშნენ თამილა დოლიძე, თეიმურაზ დიასამიძე და გიორგი გიორგაძე.
აჭარის ტელევიზიის იურისტის, გია ქარცივაძის განცხადებით, ზემოთ ჩამოთვლილი კანდიდატების დოკუმენტაცია იყო პრობლემური. მაგალითად – თეიმურაზ დიასამიძეს, რომელიც წლების განმავლობაში ხელმძღვანელობდა აჭარის ტურიზმის დეპარტამენტს, არ ჰქონდა შესაბამისი სამუშაო გამოცდილება: აჭარის ტელევიზიის დირექტორობის მსურველს უნდა ჰქონდეს ხუთწლიანი გამოცდილება ჟურნალისტიკაში, ან ადამიანის უფლებების ან კიდევ პედაგოგოგიურ-სამეცნიერო მიმართულებით.
სხვა ორი კანდიდატს [თამილა დოლიძე, გიორგი გიორგაძე], რომლებიც გამოეთიშნენ დირექტორობისთვის ბრძოლას, როგორც გია ქარცივაძე აცხადებს, “წარმოდგენილი არ ჰქონდათ აკადემიური ხარისხის დამადასტურებელი დოკუმენტი”.
მეორე ეტაპზე გადასულ შვიდ კანდიდატთან ტელევიზიის ოთხკაციანი მრჩეველთა საბჭო [ნატა იმედაიშვილი, ბეჟან გობაძე, ირაკლი დარცმელიძე და გიორგი ირემაძე] გასაუბრებას გამართავს 23-24 ოქტომბერს. თავის გადაწყვეტილებას დირექტორის არჩევასთან დაკავშირებით მრჩეველთა საბჭო გამოაცხადებს 24 ოქტომბერს 19:00 საათზე.
თუ ვერც ერთი კანდიდატი ვერ მოაგროვებს ხმების სათანადო ოდენობას [ამ შემთხვევაში სამ ხმას], ტელევიზიის ბორდს უფლება აქვს, იგივე კანდიდატებთან, განმეორებითი კენჭისყრა ჩაატაროს 27 ოქტომბრის ჩათვლით.
აჭარის ტელევიზიის დირექტორობისთვის შემდეგი შვიდი კანდიდატი აგრძელებს ბრძოლას:
- სოსო სტურუა – საზოგადოებრივი მაუწყებლის აჭარის ტელევიზიისა და რადიოს მოქმედი დირექტორი;
- გიორგი მოისწრაფიშვილი- საზოგადოებრივი მაუწყებლის რადიო და ინტერნეტ-მაუწყებლობის განვითარების სამსახურის უფროსი;
- ვლადიმერ ჭელიძე – ტელეკომპანია “იბერიას” გადაცემა “იბერია და იბერიელების” წამყვანი;
- დავით ჩხარტიშვილი – ბათუმის მერიის საერთაშორისო და საზოგადოებასთან ურთიერთობის დეპარტამენტის მთავარი სპეციალისტი;
- ფირუზ ბოლქვაძე – აჭარის საზოგადოებრივი მაუწყებლის ჟურნალისტი;
- დავით დიასამიძე – რეჟისორი;
- ნათია კაპანაძე – საზოგადოებრივი მაუწყებლის განვითარების მენეჯერი, მედიაექსპეტი.