ახალი სასწავლო წელი რამდენიმე კვირის წინ დაიწყო, თუმცა აჭარის მთიანეთის ბევრ სკოლაში ზოგიერთ საგანში გაკვეთილი ჯერაც არ ჩატარებულა. გასული წლის მსგავსად აქ, ძირითადად, ინგლისური ენის პედაგოგები არ ჰყავთ.
აჭარის მთიანეთში, ხულოსა და შუახევის სკოლები მასწავლებლების გარეშეა დარჩენილი. 29 სექტემბრის მონაცემებით, ხულოს მუნიციპალიტეტის 14 საჯარო სკოლაში 24 ვაკანსიაა. ერთსა და იმავე სკოლაში ზოგჯერ რამდენიმე საგნის პედაგოგი არ ჰყავთ, მაგალითად, ხულოს მუნიციპალიტეტის სოფელ ტუნაძეების საჯარო სკოლაში არ ჰყავთ როგორც ინგლისურისა და ქიმიის, ასევე დაწყებითის პედაგოგი. ტუნაძეების სკოლის მსგავსად ფუშრუკაულის სკოლასაც რამდენიმე საგნის პედაგოგი არ ჰყავს. სკოლას ინგლისური ენისა და გეოგრაფიის პედაგოგი სჭირდება. ინგლისურისა და ქიმიის პედაგოგი არ ჰყავთ სოფელ ჩაოშიც.
ხულოს 14 სკოლიდან 8 სკოლას ინგლისური ენის პედაგოგი, ოთხს – ქიმიის, სამს – ფიზიკის, თითოს კი – რუსულის, მუსიკის, გეოგრაფიის, დაწყებითის, ისტორიის, ქართულის, სახვითი და გამოყენებითი ხელოვნების პედაგოგი ესაჭიროება.
იგივე პრობლემაა შუახევის სკოლებშიც. თუმცა გასულ წელთან შედარებით პედაგოგების დეფიციტი აქ საგრძნობლად შემცირდა. 27 სექტემბრის მდგომარეობით პედაგოგის დეფიციტი შუახევის მუნიციპალიტეტის 5 სკოლაშია _ ჩანჩხალოს, ჯაბნიძეების, მაწყვალთის, მახალაკიძეებისა და დაბაძველის სკოლებში.
2015 წელს პედაგოგების დეფიციტი შუახევის 13 სკოლაში იყო, დეფიციტურ საგნებში პირველ ადგილს გასულ წელსაც ინგლისური იკავებდა.
გასულ წელთან შედარებით მდგომარეობა გაუმჯობესებულია ხულოშიც – თუ წელს 14 სკოლაში სულ 24 ვაკანსიაა, შარშან 20 სკოლაში 45 ვაკანსია იყო. ვაკანსიების ნაწილი საქართველოსა და აჭარის განათლების სამინისტროს მიზნობრივი პროგრამებით შეივსო.
„ინგლისურისა და ქიმიის პედაგოგი გვჭირდება. სანამ ქიმიის პედაგოგს გამოვნახავთ, ვაკანტური 10 საათიდან ხუთ-ხუთი საათი მათემატიკის მასწავლებლებს შევუთავსე, ისინი ატარებენ გაკვეთილებს და არ ცდება“, – ამბობს სკოლის დირექტორი ავთანდილ ძირკვაძე.
ქიმიის, როგორც საგნის შესწავლას, ამ მუნიციპალიტეტის ჩაოს საჯარო სკოლის მოსწავლეები 1-ელი ოქტომბრიდან დაიწყებენ. სკოლის დირექტორი იოსებ აბულაძე ამბობს, რომ კვირის განმავლობაში ინგლისურში 14 საათი ჩატარდება, დარჩენილი 14 საათი კი ისევ გაცდება“.
შუახევის მუნიციპალიტეტის სოფელ დარჩიძეების სკოლას ინგლისურის პედაგოგი ჰყავს, მაგრამ ჩაოს სკოლის მსგავსად არასაკმარისად. „ინგლისური ენის პედაგოგი მყავს, მაგრამ დამატებით მეორეა საჭირო, ბევრია საათები და ერთი პედაგოგი ვერ გაწვდება. მასწავლებელს დღეში 5-6 გაკვეთილის ჩატარება უწევს. გაკვეთილი ინგლისურ ენაში არ ცდება, მაგრამ ეს მასწავლებლის დამატებით მუშაობის ხარჯზე ხდება“, – ამბობს დირექტორი.
ამავე მუნიციპალიტეტის ჯაბნიძეების სკოლის დირექტორი ჯემალ ივანაძე კი ამბობს, რომ მათგან წასული ინგლისური ენის პედაგოგი „მთის კანონმა“ შემოაბრუნა. „სკოლაში კვირის განმავლობაში მხოლოდ ხუთი საათი მრჩება ვაკანტური, პედაგოგი, რომელიც ჩვენთან 2011 წლიდან მუშაობდა და წავიდა, მას შემდეგ დაბრუნდა, რაც მთის კანონი ამოქმედა“, – ამბობს დირექტორი.
უცხო ენა ბარიერი რომ არის აჭარის მთის სკოლების მოსწავლეებისთვის, ეს საატესტატო გამოცდებმაც აჩვენა, წელს აქ გამოცდები ძირითადად ინგლისურში ვერ ჩააბარეს.
ხულოს რესურსცენტრის უფროსი ედუარდ მიქელაძე განმარტავს, რომ განათლების მოქმედი სქემით სკოლას უფლება არ აქვს ის მასწავლებელი აიყვანოს, რომელსაც ან გამოცდილება არ აქვს, ან სერტიფიკატი. ის აქვე აღნიშნავს, რომ სტუდენტებს, რომლებმაც წელს დაამთავრეს ბაკალავრიატი თუ მაგისტრატურა, სურთ სოფლის სკოლებში მუშაობა. დამწყები პედაგოგების სკოლით დაინტერესების მიზეზად რესურსცენტრის უფროსს „მთის კანონი“ მიაჩნია. ამ კანონით, მაღალმთიანი სოფლების საჯარო სკოლებში დასაქმებული პედაგოგები შეღავათებით სარგებლობენ.
ედუარდ მიქელაძე: „დასაქმების მიზნით რესურსცენტრს არაერთმა პირმა მოგვმართა, მაგრამ არსებული სქემა საშუალებას არ გვაძლევდა ასეთი პედაგოგები აგვეყვანა. საკითხზე მინისტრთან გავიარეთ კონსულტაცია, რომლის მიხედვითაც ახალდამთავრებული პედაგოგები დროებით მოვალეობის შემსრულებლად, ხელშეკრულებით შეგვიძლია დავასაქმოთ. ვფიქრობთ, ასე დეფიციტს აღმოვფხვრით. პირველი ოქტომბრიდან დროებითი მოვალეობის შემსრულებლად ხელშეკრულებით აყვანილი პედაგოგები გვეყოლება საციხურისა და რაგვთის სკოლებში“.
