კვირის ამბები,მთავარი,სიახლეები

სპორტსმენები და პარტიებთან ასოცირებული დამკვირვებლები არჩევნებზე

03.10.2016 • 2348
სპორტსმენები და პარტიებთან ასოცირებული დამკვირვებლები არჩევნებზე

სპორტსმენები, მათ შორის კორცხელის ინციდენტში მონაწილე პირებად დასახელებულები, პარტიებთან ასოცირებული პირები და მათი ორგანიზაციები 2016 წლის 8 ოქტომბრის საპარლამენტო არჩევნებზე დამკვირვებლებად დარეგისტრირდნენ.

„სპორტისა და სამხედრო ვეტერანთა ასოციაცია“ 2016 წლის 8 ოქტომბრის არჩევნებისთვის დამკვირვებელ ორგანიზაციად დარეგისტრირდა. ეს იმას ნიშნავს, რომ შესაძლოა ნებისმიერ საარჩევნო უბანზე დამკვირვებლის სტატუსით ერთი სპორტსმენი მაინც შევიდეს. ასოციაციის ხელმძღვანელი მძლეოსანი ილია მარტყოფლიშვილია. ის იმ სპოტსმენებს შორისაა, რომელიც 2016 წლის 26 მაისს კორცხელში მომხდარი ინციდენტის შემდეგ „ქართულმა ოცნებამ“ მოიხსენია „ნაციონალური მოძრაობის“ ზონდერად [თუმცა, კორცხელში სპორტსმენები „ნაციონალური მოძრაობის“ ლიდერებს დაუპირისპირდნენ ფიზიკურად]. ამ განცხადებიდან ხუთი თვის შემდეგ ილია მარტყოფლიშვილმა სხვა სპორტსმენებთან ერთად კორცხელის ინციდენტში მონაწილეობა უარყო და ბოდიშის მოხდა მოითხოვა.

ასევე ინციდენტიდან ხუთ თვეში „სპორტისა და სამხედრო ვეტერანთა ასოციაცია“ არჩევნებზე დამკვირვებელ ორგანიზაციად დაარეგისტრირა.

ილია მარტყოფლიშვილი „ბათუმელებთან“ სატელეფონო საუბარში განმარტავს, რომ მაშინ ცრუ ბრალდების მსხვერპლი გახდა. „ამიტომაც გადავწყვიტე შემექმნა კანონიერი მანდატი ამისთვის, რომ ამა თუ იმ ბრალდების მსხვერპლი აღარ გავმხდარიყავი.  იურისტი ვარ და აკადემიური პოლიტიკური პროცედურების მსოფლმხედველობის საკითხები მაინტერესებს. აქედან გამომდინარე შევქმენი სპორტსმენთა ასოციაცია. ასეთი ორგანიზაცია თუ არ გაქვს, ცესკოში ვერ დარეგისტრირდები. ყველა ადამიანს აქვს ცნობისმოყვარეობა. მე პატრიოტი ვარ“, – განმარტავს ილია მარტყოფლიშვილი. „სპორტისა და სამხედრო ვეტერანთა ასოციაცია“, როგორც არასამეწარმეო იურიდიული პირი, სპორტსმენებმა კორცხელის ინციდენტამდე ერთი წლით ადრე, 2014 წლის მაისში დააფუძნეს. ოქტომბრის საპარლამენტო არჩევნები პირველია, რომელსაც ისინი დააკვირდებიან.

კითხვაზე, რატომ დაინტერესდით სპორტსმენები საარჩევნო პროცედურით? – ძალოსანი მარტყოფიშვილი პასუხობს:  „არაკონსტიტუციურს ხომ არაფერს ვაკეთებთ? აბა, ეგ რა შეკითხვაა? ყველას გვაქვს კონსტიტუციური მანდატი, რომ ამა თუ იმ სამოღვაწეო სფეროს მივუდგეთ. პრობლემები რომ ხდება ცხოვრებაში, დავინტერესდით ამ მოღვაწეობის სისუფთავის დასაკვირვებლად შეგვექმნა ასეთი კავშირი, რომ მიგვეღო კონსტიტუციური მანდატი, რომ ჩვენ სპორტსმენებს ჩვენი ადგილი გვქონოდა ცხოვრებაში, არ ვყოფილიყავით უმანდატოები;

აკადემიურად მოაზროვნეები რომ ვართ და არ დამსგავსებოდა ჩვენი ჩარევა იმ მომენტს მაშინ, რაც მოხდა [კორცხელში], ამიტომ გადავწყვიტეთ [ორგანიზაციის გაკეთება]. ამას ლოგიკა ხომ აქვს…“

მარტყოფლიშვილის თქმით, მისი ორგანიზაციის წევრები არ არიან კორცხელის ინციდენტში მონაწილე პირები.

მარტყოფლიშვილი ზუსტად არ ასახელებს, თუ რომელ საარჩევნო ოლქებში გეგმავს ორგანიზაცია არჩევნებზე დაკვირვებას. „როგორც მოგვეხერხება“, – ასეთია მისი პასუხი.

„გაერთიანებული საზოგადოება“ ერთ-ერთია მათ შორის, რომელიც 2016 წლის 8 ოქტომბრის არჩევნებისთვის დამკვირვებელ ორგანიზაციად დარეგისტრირდა. ორგანიზაციის ხელმძღვანელი ანა გეგეშიძეა. ის მედიაკავშირ „ობიექტივზე“ გადაცემა “გაერთიანებული საზოგადოების საათის“ წამყვანია. „ობიექტივის“ ერთ-ერთი დამფუძნებელი კი პოლიტიკური პარტია „პატრიოტთა ალიანსის“ ლიდერი ირმა ინაშვილია.

გადაცემა „გაერთიანებული საზოგადოების საათი“ ობიექტივის ეთერში პირველად გასული წლის დეკემბერში გავიდა. პირველივე გადაცემაში წამყვანმა ანა დარსალიამ, რომელიც ასევე ორგანიზაცია „გაერთიანებული საზოგადოების“ ხელმძღვანელია, თქვა, რომ მისი ორგანიზაცია არც ერთ პოლიტიკურ ჯგუფს არ მიეკუთვნება. ორგანიზაცია 2015 წელსაა დარეგისტრირებული.

არჩევნებს დააკვირდება „ქალთა პოლიტიკური რესურსის ცენტრიც“. ცენტრის ხელმძღვანელია ლია ნადარაია. 2014 წლის ივნისში ლია ნადარაია ქალთა მიმართ დისკრიმინაციის აღმოფხვრის კომიტეტის წევრად აირჩიეს ნიუ-იორკში. რეესტრის მონაცემებით, ამ ორგანიზაციის მმართველობის წევრია ასევე მანანა ხაჩიძე, სოციალური მომსახურების სააგენტოს ადამიანური რესურსების მართვის უფროსი.

დამკვირვებლად დარეგისტრირდა ასევე „საქართველოს ახალგაზრდა ინტელექტუალთა გაერთიანება – ლაზარე“. 2016 წლის სექტემბრამდე ამ ორგანიზაციას ჯონი კვარაცხელია ხელმძღვანელობდა, ის ახლა პაატა ბურჭულაძის პარტიის „სახელმწიფო ხალხისთვის“ წარდგინებით თბილისის საკრებულოს წევრობისთვის იბრძვის. რეესტრის მონაცემებით, ის ორგანიზაციაში იაგო ბიგვავამ ჩაანაცვლა. თუმცა, ცესკოს მონაცმებით, ჯონი კვარაცხელია ისევ ორგანიზაციის დირექტორია. ამავე მონაცემებით, ორგანიზაციას არჩევნებზე 723 დამკვირვებელი ეყოლება.

აჭარის უმაღლეს საარჩევნო კომისიაში [უსკო] დამკვირვებლად სამი ორგანიზაცია დარეგისტრირდა, მათ შორის ერთს რეგისტრაცია გაუუქმდა. აჭარაში ყველა დონის საარჩევნო ადმინისტრაციაში დაკვირვების უფლება ექნებათ ორგანიზაციებს: „მშვიდობა, თანადგომა და სოლიდარობა“, „ახალგაზრდული ინიციატივა მომავალი საქართველოსთვის“. „კორუფციასთან ბრძოლის ცენტრს“რეგისტრაცია ორგანიზაციის ხელმძღვანელების, მერაბ ღოღობერიძის მიმართვის საფუძველზე გაუუქმდა. მერაბ ღოღობერიძე არჩევნებს ინდივიდუალურად დააკვირდება. ის „ნაციონალური მოძრაობისა“ და ასევე საკონსტიტუციო სასამართლოს მოსამართლეების წინააღმდეგ გამართული არაერთი აგრესიული აქციის ორგანიზატორი იყო.

ორგანიზაციას „ახალგაზრდული ინიციატივა მომავალი საქართველოსთვის“ ლაშა ადამია ხელმძღვანელობს. ბათუმში მას იცნობენ, როგორც „ერთიანი ნაციონალური მოძრაობის“ მხარდამჭერს. ამ ინფორმაციას თავად უარყოფს. „არც ერთი პარტიის წევრი არ ვარ. „ნაციონალურ მოძრაობაში“ მეგობრები მყავს მხოლოდ. მასე მეგობრები სხვა პარტიებშიც მყავს“, – ამბობს ლაშა ადამია.

საერთო ჯამში, 2016 წლის საპარლამენტო არჩევნებს 90 ადგილობრივი და ორმოცდაათი საერთაშორისო ორგანიზაცია დააკვირდება. ადგილობრივ ორგანიზაციებს შორის არიან საია, „სამართლიანი არჩევნები“ და „გამჭვირვალობა საქართველო“, ხოლო საერთაშორისო დამკვირვებლებს შორის არიან საელჩოები.


ღია საზოგადოება საქართველოსტატია ქვეყნდება პროექტის ფარგლებში „გაცნობიერებული არჩევანი – დემოკრატიის ფუნდამენტი“. ავტორის/ავტორების მიერ საინფორმაციო მასალაში გამოთქმული მოსაზრება შესაძლოა არ გამოხატავდეს ფონდ „ღია საზოგადოება-საქართველოს“ პოზიციას. შესაბამისად, ფონდი არ არის პასუხისმგებელი მასალის შინაარსზე.

გადაბეჭდვის წესი


ასევე: