მთავარი,სიახლეები

წყლის მონიტრინგის საერთაშორისო დღე

18.09.2016 • 3035
წყლის მონიტრინგის საერთაშორისო დღე

წყლის მონიტრინგის საერთაშორისო დღესთან დაკავშირებით, დღეს, 18 სექტემბერს, „ბათუმის წყალმა“ პრესტური მოაწყო. ტურს შპს „ბათუმის წყლის“ გენერალური დირექტორის მოვალეობის შემსრულებელი თეიმურაზ ბედინაძე ხელმძღვანელობდა. ჟურნალისტებმა დაათვალიერეს ჩაისუბნის წყლის სათავე ნაგებობა, ინჯალოს წყლის რეზერვუარი და ადლიის ჩამდინარე წყლების გამწმენდი ნაგებობები.

ჩაისუბნის სათავე

ჩაისუბანი. წყლის სათავე ნაგებობა / ფოტო: როინ გუნდაძე

„აქ, ჩაისუბნის სათავე ნაგებობაზე, ხდება წყლის გაწმენდა და დაქლორვა. შუმდეგ  გაწმენდილი წყალი მიედინება სალიბაურში, სადაც ხდება მეორადი დაქლორვა და მხოლოდ ამის შემდეგ მიეწოდება მოსახლეობას“ – განაცხადა თეიმურაზ ბედინაძემ. მისივე განმარტებით, ბათუმში სასმელი წყალი არის სრულიად უსაფრთხო და მას არანაირი პრობლემა არ გააჩნია.

ჩაისუბანი. წყლის სათავე ნაგებობა / ფოტო: როინ გუნდაძე

ჩაისუბანი. წყლის სათავე ნაგებობა / ფოტო: როინ გუნდაძე

თეიმურაზ ბედინაძის განცხადებით, „ჩაისუბნის სათავე ნაგებობა აშენებულია გერმანიის რეკონსტრუქციის  და განვითარების ბანკის მიერ და აკმაყოფილებს ევრო სტანდარტებს. ამის გარდა არის კიდევ ჩაქვის წყალის სათავე ნაგებობა. ჩაქვის წყლის წარმადობა  არის 1050 ლიტრი წამში, მეჯინისწყლის ჭაბურღილების წყლის  წარმადობა –  250 ლიტრი წამში, ხოლო ჩაისუბნის წყლის სათავე ნაგებობის წყლის წარმადობა – 400 ლიტრი წამში. თუ წყალი გადააჭარბებს სიმღვრივის დაშვებულ  მაჩვენებელს, ხდება წყლის გადაკეტვა სათავეზე და შემდეგ ვრთავთ უკვე რეზერვუარებს, 48 საათის განმავლობაში შესაძლებელია რეზერვის წყლით მოსახლეობის მომარაგება“.

მეჯინისწყალი. წყლის ჭაბურღილები / ფოტო: როინ გუნდაძე

მეჯინისწყალი. წყლის ჭაბურღილები / ფოტო: როინ გუნდაძე

ინჯალო. წყლის სათავე ნაგებობა / ფოტო: როინ გუნდაძე

ინჯალო / ფოტო: როინ გუნდაძე

რაც შეეხება ადლიის წყალარინების  გამწმენდ ნაგებობებს, სატუმბი სადგურების უფროსის, მარიკა გვიანიძის განმარტებით, ადლიის წყალარინების გამწმენდი ნაგებობა 2012 წლის მარტიდან ფუნქციონირებს, მისი მშენებლობა დაფინანსებულია  ასევე გერმანიის რეკონსტრუქციისა და განვითარების ბანკის მიერ: „გამწმენდი ნაგებობა მნიშვნელოვანია გარემოს დაცვის თვალსაზრისით. აქ ჩაედინება  ახალსოფლიდან, გონიოდან,  კვარიათიდან, სარფიდან და ქალაქის ტერიტორიიდან  საკანალიზაციო წყლები და ხდება მისი მექანიკური და ბიოლოგიური გაწმენდა. გამწმენდ ნაგებობას ზღვრული ნორმები დაწესებული აქვს ევროსტანდარტებით, აღნიშნული ნაგებობიდან გაწმენდილი წყალი 1090 მეტრი სიგრძის მილით ზღვის სიღრმეში -40 მეტრზე, ჩაედინება. დღის განმავლობაში ზღვაში ჩაედინება 60 ათასი კუბური მეტრი გაწმენდილი წყალი. ლაბორატორიაში მიმდინარეობს წყლის გაწმენდის ხარისხის კონტროლი და ხდება ზღვრული ნორმების შენარჩუნება.“

ადლია. წყლის გამწმენდი ნაგებობა / ფოტო: როინ გუნდაძე

ადლია. წყლის გამწმენდი ნაგებობა / ფოტო: როინ გუნდაძე

გამწმენდ ნაგებობაში ბათუმის მცირე ნაწილია ჩართული, ძირითადად ცენტრალური უბნები. ე.წ. ჭაობის უბანში, გოროდოკის, ბარცხანის, თამარის დასახლებასა და მახინჯაურში ცენტრალიზებული საკანალიზაციო სისტემა არ არსებოს. არ არსებობს ასეთი სისტემა არც ადლიასა და სხვა ქალაქსშემოერთებულ ტერიტორიებზე. სამუშაოები ახლა მიმდინარეობს ან ზოგან მხოლოდ დაგეგმილია.

გადაბეჭდვის წესი


ასევე: