უამინდობა ბათუმში: გადაკეტილი წყლის სათავე ნაგებობები, დატბორილი ქუჩები და სადარბაზოები

ბათუმში წუხელ მთელი ღამის განმავლობაში წვიმდა. უხვი ნალექის გამო, შპს „ბათუმის წყლის“ ინფორმაციით, დროებით გადაიკეტა ჩაისუბნისა და ჩაქვის სათავე ნაგებობები და წყლის მიწოდება შეუწყდათ: დაბა ჩაქვის, მახინჯაურის, ბენზეს, გარადოკის, განთიადის, თამარის და ბარცხანის დასახლებებს, ასევე მაიაკოვსკის, ფაღავას და ნონეშვილის ქუჩაზე მცხოვრებ აბონენტებს.

წყლის მიწოდება დღეს დილიდან უნდა აღდგენილიყო, მაგრამ „ბათუმის წყალში“ ამბობენ, რომ უხვი ნალექის გამო წყლის მიწოდების აღდგენა ამ დრომდე ვერ ხერხდება. მათივე თქმით, სამუშაოები საგანგებო რეჟიმში მიმდინარეობს და ცხელ ხაზზე შესულ ყველა ზარზე გასულია ბრიგადები:

„კონკრეტული ქუჩების ჩამონათვალი არ გვაქვს, მაგრამ გასულია ბრიგადები, ტარდება ამოტუმბვითი სამუშაოები“, – თქვეს „ბათუმის წყლის“ პრესსამსახურში და აღნიშნეს, რომ ოფიციალურ განცხადებას შპს „ბათუმის წყალი“ დღის ბოლოს გააკეთებს.

ბათუმში ამ დროისათვის დატბორილია რამდენიმე ქუჩა; ასევე დატბორილია აღმაშენებლის ქუჩაზე მდებარე რამდენიმე მაღაზია.

ადიდებული მდინარე მეჯინისწყალი ავტომაგისტრალსა და მიმდებარე ქუჩებში გადმოვიდა. უამინდობამ ავტომაგისტრალის ჩაქვი-ქობულეთის მონაკვეთზე [უღელტეხილი] საცობი გამოიწვია.

მოსალოდნელი უამინდობის შესახებ წინასწარ იყო ცნობილი. არასტაბილური ამინდი აჭარის სანაპირო ზოლსა და მაღალმთიანეთში 4 სექტემბრის ჩათვლით შენარჩუნდება.

ადიდებული მდინარე მეჯინისწყლის კალაპოტი და დატბორილი გზის სავალი ნაწილი / ფოტო: ცაგო კახაბერიძე

ადიდებული მდინარე მეჯინიწსყალი, გზის სავალ ნაწილზე / ფოტო: ცაგო კახაბერიძე

აღმაშენებლის ქუჩაზე მაღაზიებში წყალი ჩავიდა / ფოტო: ირმა დიმიტრაძე

აღმაშენებლის ქუჩა / ფოტო: ირმა დიმიტრაძე

აღმაშენებლის ქუჩა / ფოტო: ირმა დიმიტრაძე

მაიაკოვსკის ქუჩა / ფოტო: შორენა ამაღლობელი

მაიაკოვსკის ქუჩა. დატბორილი სადარბაზო. აქ მცხოვრებლებს „ბათუმის წყალში“ უთხრეს, რომ ამოსატუმბ მანქანებს ვერ გამოუშვებენ, „სამაშველო სამსახურში“ კი ეუბნებიან, რომ ყველა მანქანა გამოძახებაზეა  / ფოტო: შორენა ამაღლობელი