იაგო შარაძის დედამ შიმშილობა დაიწყო

ზღვაში დაკარგული სამხედრო მოსამსახურის – იაგო შარაძის დედამ გონიოში შიმშილობა დაიწყო. ელენე შარაძე ზღვაში დაკარგული შვილის ძებნის სამუშაოების განახლებას მოითხოვს. სამხედრო წვრთნის დროს დაკარგული სამხედროების ახლობლები გონიოში ავტომაგისტრალის გადაკეტვასაც აპირებენ. ამ დროისთვის ისინი თავდაცვის სამინისტროს გენერალური ინსპექციის წარმომადგენლებს ელოდებიან. იაგო შარაძის ნათესავების თქმით, მათ ამ უწყებიდან ტელეფონით დაუკავშირდნენ და შეხვედრა სთხოვეს.

იაგო შარაძის მეუღლემ – მარიკა შარაძემ “ბათუმელებს” უთხრა, რომ მას დღეს დილით სთხოვეს მოეწერა ხელი განცხადებისთვის, სადაც ეწერა, რომ სამხედრო მოსამსახურეები უგზო-უკვლოდ დაიკარგნენ. განცხადებაზე ხელი დაკარგული სამხედრო მოსამსახურეების ახლობლებს არ მოუწერიათ. დღეს, 31 აგვისტოს თავდაცვის სამინისტრომ განაცხადა, რომ ზღვაში დაკარგული სამხედროების სამძებრო-სამაშველო ღონისძიებები შეწყდა.

16 აგვისტოს სპეციალური ოპერაციების ძალების ორმა სამხედრო მოსამსახურემ, კაპრალმა იაგო შარაძემ და I კლასის რიგითმა გიორგი ნანეტაშვილმა შავ ზღვაზე გეგმური საზღვაო სპეცდანიშნულების სწავლების დროს, ზღვაში სიღრმითი ჩაყვინთვის შემდეგ, ვერ შეძლეს ზღვის ზედაპირზე ამოსვლა.

samxedroebis axloblebi

ზღვაში დაკარგული სამხედროების ახლობლები, გონიო. როინ გუნდაძის ფოტო

ნეტგაზეთის მასალების სხვა გამოცემებში გადაბეჭდვის წესი
როინ გუნდაძე