მთავარი,სიახლეები

რკინიგზელები „საქართველოს რკინიგზას“ შეუსრულებელ პირობებს ახსენებენ და გაფიცვით იმუქრებიან

11.08.2016 • 1517
რკინიგზელები „საქართველოს რკინიგზას“ შეუსრულებელ პირობებს ახსენებენ და გაფიცვით იმუქრებიან

დღეს, 11 აგვისტოს, რკინიგზელთა ახალი პროფკავშირის პირველადი ორგანიზაციის წევრებმა, სადგურ „ბათუმის“ წინ გამაფრთხილოებელი აქცია გამართეს.

როგორც „ბათუმელებს“ სადგური ბათუმის რკინიგზელთა ახალი პროფკავშირის პირველადი ორგანიზაციის თავმჯდომარემ, გელა გოგელიამ უთხრა, დღეს მცირე აქციით შეახსენეს საქართველოს რკინიგზის ადმინისტრაციას იმ ვალდებულებებისა და რვაპუნქტიანი შეთანხმების შესახებ, რომელიც 2014 წლის გაფიცვის დროს დაიდო.

„გაფიცვიდან მერვე დღეს შემოგვთავაზეს ლამაზი სიტყვებით დაწერილი რვაპუნქტიანი შეთანხმება, რომლის არცერთი პუნქტი დღემდე არ სრულდება. ერთ-ერთი მთავარი პუნქტი – ყოველ კვარტალში, სამი თვის ხელფასის 30%-ის პრემიის სახით გაცემა თავად შემოგვთავაზეს, შემდგომ 15%-ზე ჩამოიყვანეს და ამ 15%-საც გასცემენ თანამშრომელთა მხოლოდ 30%-ზე. ეს არის დისკრიმინაციული მიდგომა, როდესაც ხელმძღვანელი საკუთარი შეხედულებებით გასცემს პრემიებს“, – განაცხადა გელა გოგელიამ და იქვე აღნიშნა, რომ სხვა შეთანხმებებიც, რომლებიც ჯერ კიდევ 2013 წელს დაიდო რკინიგზის სადგურის ადმინისტრაციასთან, შეუსრულებელია.

„ჩვენ გვინდა მუშაობა და ჩვენი შრომის შესაბამისი ანაზრაურება. გაფიცვა არ წარმოადგენს ჩვენს თვითმიზანს, ამიტომაც დღეს მხოლოდ ის თანამშრომლები შევიკრიბეთ, ვინც ცვლაში არ ვართ. არ გვინდა, რომ სახელმწიფომ ნახოს ზარალი, გვესმის, რომ საქართველოს რკინიგზას სახელმწიფო ბიუჯეტში ყველაზე დიდი თანხა შეაქვს, მაგრამ ყველაფერს აქვს საზღვარი“, – თქვა გელა გოგელიამ და იქვე დაამატა, რომ მსგავსი გამარფრთხილებელი აქციები სხვა ქალაქებშიც გაიმართება, ხოლო თუ შედეგს ვერ მიაღწევენ და იძულებულები გახდებიან, რკინიგზელები კვლავ გაიფიცებიან.

რკინიგზელების აქცია / 11.08.2016 / ფოტო: პროფკავშირები

რკინიგზელების აქცია / 11.08.2016 / ფოტო: პროფკავშირები 

რკინიგზელების აქცია / 11.08.2016 / ფოტო: პროფკავშირები

რკინიგზელების აქცია / 11.08.2016 / ფოტო: პროფკავშირები

გადაბეჭდვის წესი


ასევე: