საარჩევნო ყუთი უსკო

საია უსკოს სასამართლოში უჩივის

ბათუმის საქალაქო სასამართლომ უკვე დაარეგისტრირა “ახალგაზრდა იურისტთა ასოციაციის” [საია] სარჩელი. ადმინისტრაციული წესით საია აჭარის უმაღლეს საარჩევნო კომისიას [უსკო] ედავება. საჩივრის მიზეზი საიას განცხადებაა, რომელიც უსკომ განუხილველი დატოვა.

საუბარია 31 ივლისს „ერთიანი ნაციონალური მოძრაობის“ ბათუმის მაჟორიტარი დეპუტატობის კანდიდატების წარდგენაზე, სადაც მიხეილ სააკაშვილმა მემედ აბაშიძის ქუჩაზე, პარტიული ოფისის წინ შეკრებილებს ვიდეოჩართვის საშუალებით მიმართა.  “ახალგაზრდა იურისტთა ასოციაციის” შეფასებით, ეს ვიდეომიმართვა წინასაარჩევნო აგიტაცია იყო, რაც უცხოეთის მოქალაქეს საქართველოში ეკრძალება.

უმაღლესმა საარჩევნო კომისიამ საიას განცხადების განხილვაზე უარი თქვა, რის მიზეზადაც შესაბამისი უფლებამოსილების არქონა დაასახელა. უსკოს შეფასებით, საკითხი ცესკომ უნდა განიხილოს.

„ვფიქრობთ, რომ ეს პასუხი იყო უკანონო. საჩივრის განხილვა არის მნიშვნელოვანი იმისთვისაც, რომ წინასაარჩევნო აგიტაციის წესების დარღვევაზე იქნას გადაწყვეტილება მიღებული,” – უთხრა “ბათუმელებს” გიორგი ხიმშიაშვილმა, “ახალგაზრდა იურისტთა ასოციაციის” აჭარის ფილიალის თავმჯდომარემ.

საიას სარჩელის მოთხოვნაა სასამართლოში უმაღლესი საარჩევნო კომისიის გადაწყვეტილების ბათილად ცნობა. სარჩელის დაკმაყოფილების შემთხვევაში, უსკოს ასევე მოუწევს სავარაუდო წინასაარჩევნო აგიტაციის შემთხვევაზე გადაწყვეტილების მიღება.

ავტორი