ბათუმის ბიუჯეტი კიდევ 898 ათასი ლარით გაიზრდება

არჩევნების დღის გამოცხადებიდან დღემდე პერიოდში ბათუმის ბიუჯეტი უკვე მესამედ იზრდება. ამჯერად, 898 100 ლარით.

ბათუმის მერიის შესაბამისი გადაწყვეტილება ქალაქის საკრებულომ 4 აგვისტოს რიგგარეშე სხდომაზე უნდა დაამტკიცოს.

მერიაში აცხადებენ, რომ ბიუჯეტის გადასხდელების ზრდა, ბიუჯეტში შემოსავლების ზრდითაა განპირობებული. რაც შეეხება იმას, თუ რას მოხმარდება დამატებითი თანხა, მერიაში გვითხრეს, რომ დაფინანსდება სხვადასხვა ინფრასტრუქტურული პროექტები – ჭაობის დასახლებაში გაგრძელდება ქუჩების რეაბილიტაცია, მათ შორის მთლიანად დასრულდება თავდადებულისა და ლერმონტოვის ქუჩები, ასევე გაიზრდება საახალწლო აქსესუარებისა და ნაძვის ხის შეძენისთვის საჭირო თანხა… გარდა გადასახდელების გაზრდისა, თანხა, ასე ვთქვათ, „გადათამაშდება ბიუჯეტის შიგნით“ – გარკვეული დაგეგმილი ღონისძიებები აღარ დაფინანსდება და გამოთავისუფლებული თანხა სხვა ღონისძიებებს მოხმარდება.

წინასაარჩევნო აგიტაციის დაწყებამდე ერთი დღით ადრე ბათუმის ბიუჯეტი 1 მილიონ 570 ათასი ლარით გაიზარდა. აქედან თითქმის ერთი თვის შემდეგ კი, საკრებულომ 12 ივლისის სხდომაზე, ბიუჯეტის 1 მილიონზე მეტი ლარით გაზრდას დაუჭირა მხარი.

ახალი ღონისძიებების დაფინანსება თუ სხვა ცვლილებების შეტანა ბიუჯეტებში, კნონით, არჩევნებამდე 60 დღით ადრე, ანუ ფაქტობრივად, 8 აგვისტოდან, უკვე აკრძალულია. ამიტომ, საკრებულოს ზოგი ოპოზიციონერი წევრი ამბობს, რომ მმართველი ძალა ცდილობს ამ დრომდე მოასწროს საბიუჯეტო ცვლილების შეტანა. ამასთან, „საერთაშორისო გამჭვირვალობა  – საქართველომ“  მოუწოდა საქართველოს მთავრობას, წინასაარჩევნო კამპანიის პერიოდში თავი შეიკავოს მის მიერ დაგეგმილი თუ განხორციელებული პროექტების რეკლამირებისგანაც კი.

წინასაარჩევნო კამპანია 2016 წლის 8 ივნისს დაიწყო. საქართველოს პარლამენტისა და ასევე აჭარის უმაღლესი საბჭოს არჩევნები, მიმდინარე წლის 8 ოქტომბერსაა დანიშნული.