დღეს, 3 აგვისტოს, აჭარის ჯანმრთელობისა და სოციალური დაცვის, ფინანსთა და ეკონომიკის სამინისტროებსა და ბათუმის შოთა რუსთაველის სახელმწიფო უნივერსიტეტს შორის ურთიერთთანამშრომლობის მემორანდუმი გაფორმდა.
მემორანდუმი ბსუ-ს საბუნებისმეტყველო მეცნიერებათა და ჯანდაცვის ფაკულტეტის სტუდენტების ბათუმის რესპუბლიკურ კლინიკური საავადმყოფოს სასწავლო ბაზად გამოყენებას ითვალისწინებს. ამასთანავე, მემორანდუმის ფარგლებში, საავადმყოფო აუცილებელი ტექნიკით აღიჭურვება.
შეთანხმება გულისხმობს თითოეული მხარის წარმომადგენელთა მონაწილეობით სამუშაო ჯგუფის შექმნას. ჯგუფის მიზანი კონცეფციის შემუშავებაა.
როგორც აჭარის ჯანდაცვის მინისტრის პირველი მოადგილე ლევან გიორგაძე განმარტავს, აღნიშნული მემორანდუმი ითვალისწინებს მშენებარე რესპუბლიკური საავადმყოფოს მაქსიმალურად ადაპტირებულ მოწყობას ბათუმის სახელმწიფო უნივერსიტეტის კლინიკური საუნივერსიტეტო ნაწილის გამოყენების თვალსაზრისით. მემორანდუმი ასევე მოიცავს სამუშაო ჯგუფის შექმნას, რომელის მთავარი დანიშნულება კადრების კვალიფიცირებასა და გადამზადებაზე ზრუნვაა.
„მემორანდუმი აგრეთვე ითვალისწინებს აღნიშნული კადრების რესპუბლიკურ საავადმყოფოში დასაქმებას. ისეთი დარგის სპეციალისტები, რომლებიც არ არაიან ამჟამად რესპუბლიკურ საავადმყოფოში დასაქმებული, შესაძლებელია მოწვეულ იქნეს სხვადასხვა სამედიცინო დაწესებულებებიდან. ასევე მნიშვნელოვანია გაიზარდოს ახალგაზრდა კადრები, ვისთვისაც იქნება ადაპტირებული ეს ახალი სამედიცინო კლინიკური დაწესებულება“ – აღნიშნა „ბათუმელებთან“ ლევან გიორგაძემ.
სანამ რესპუბლიკური საავადმყოფოს მშენებლობა დასრულდება მანამდე სტუდენტები პრაქტიკას გაივლიან ბათუმის სხვადასხვა სამედიცინო დაწესებულებებში.
კითხვაზე, თუ რატომ შეარჩიეს რესპუბლიკური საავადმყოფო, ლევან გიორგაძემ გვიპასუხა, რომ ეს სახელმწიფო კლინიკაა და დიდი გამოცდლებას აქვს.
ამავე თემაზე:
