აჭარის უმაღლესი საარჩევნო კომისია მიხეილ სააკაშვილის ვიდეომიმართვის საკითხს არ განიხილავს. საუბარია ბათუმში 31 ივლისს „ერთიანი ნაციონალური მოძრაობის“ ბათუმის მაჟორიტარი დეპუტატების წარდგენაზე, სადაც მიხეილ სააკაშვილმა მემედ აბაშიძის ქუჩაზე, პარტიული ოფისის წინ შეკრებილებს ვიდეოჩართვის საშუალებით მიმართა.
„უკრაინის მოქალაქემ, ოდესის გუბერნატორმა, მიხეილ სააკაშვილმა ჩაიდინა სავარაუდო წინასაარჩევნო აგიტაცია“ – ასე შეაფასა „ახალგაზრდა იურისტთა ასოციაციამ“ ექსპრეზიდენტის ვიდეომიმართვა და ადმინისტრაციული წარმოების დაწყების მოთხოვნით წერილობით აჭარის უმაღლეს საარჩევნო კომისიას [უსკო] პირველ აგვისტოს მიმართა.
დღეს, 3 აგვისტოს, უსკოს იურისტმა, ფრიდონ ბათნიძემ „ბათუმელებს“ უთხრა, რომ კომისია სააკაშვილის ვიდეომიმართვის საკითხს არ განიხილავს: „ჩვენ არ გვაქვს უფლებამოსილება, ადმინისტრაციული წარმოება დავიწყოთ მსგავს საკითხებზე. ეს ცესკოს პრეროგატივაა. შესაბამისად, ხვალ, დღის ბოლომდე გადავაგზავნით ამ განცხადებას ბათუმის N79 საარჩევნო ოლქში, რომელმაც უნდა დაიწყოს მოკვლევა და მიიღოს გადაწყვეტილება“.
კითხვაზე, რატომ გაწელა პროცესი უსკომ, თუკი ის სავარაუდო აგიტაციის ფაქტს ვერ განიხილავს, ფრიდონ ბათნიძემ გვითხრა, რომ სხვა მნიშვნელოვან საკითხებზეც მუშაობენ და ამასთან, „კანონმდებლობით 5 დღე გვაქვს ვადა. ეს დრო ჯერ არ გასულა…“
„გავეცნობით ოფიციალურ დასაბუთებას, რის გამო არ უნდა განიხილოს ეს საკითხი უსკომ და შემდეგ შევაფასებთ მათ გადაწყვეტილებას,“ – ამბობს გიორგი ხიმშიაშვილი, “ახალგაზრდა იურისტთა ასოციაციის” აჭარის ფილიალის თავმჯდომარე. მისი განმარტებით, უსკოს კომპეტენციაა სავარაუდო აგიტაციის საქმის შესწავლა, რადგან მიხეილ სააკაშვილის ვიდეომიმართვა აჭარის უმაღლესი საბჭოს არჩევნებსაც შეეხებოდა: „კანონში არსებობს ხარვეზი, მაგრამ უსკოს არაფერი უკრძალავს ამ საკითხის შესწავლას და გადაწყვეტილების მიღებას“.
პირველ აგვისტოს ცენტრალურ საარჩევნო კომისიას მიმართა „სამართლიანმა არჩევნებმა“. ორგანიზაციამ განცხადებაში მიხეილ სააკაშვილის სამი ვიდეომიმართვა გააერთიანა – ახალქალაქის, მარნეულის და ბათუმის. ცესკოს გადაწყვეტილების მისაღებად ერთი თვე აქვს. თუკი ცესკო აგიტაციის შემთხვევას დაადგენს, საბოლოოდ იგი სასამართლომ უნდა დაადასტუროს. ჯარიმის ოდენობა წინასაარჩევნო აგიტაციაზე 2000 ლარს შეადგენს.
მიხეილ სააკაშვილის ვიდეომიმართვას გამოეხმაურა პრეზიდენტ გიორგი მარგველაშვილის საპარლამენტო მდივანიც. „უკრაინის მოქალაქე მიხეილ სააკაშვილს საქართველოს პოლიტიკურ საქმიანობაში ჩარევის უფლება არ აქვს” – განაცხადა ანა დოლიძემ. მან მიხეილ სააკაშვილს მოუწოდა თავი შეიკავოს ქართულ პოლიტიკურ პროცესებში ჩარევისგან.
