როდის აღადგენენ გარეგანათებას ბათუმის ქუჩებში

როდის აღადგენენ გარეგანათებას ბათუმის ქუჩებში? -კითხვაზე “ბათუმელებს” ზუსტი პასუხი ბათუმის მერიაში ვერ გასცეს. მერიის პრესსამსახურის ცნობით, გაფრთხილეს კომპანია “ზიმო 7-ი”, რომელიც ტენდერის მიხედვით ე.წ. ჭაობის უბანში სარეაბილიტაციო სამუშაოებს აწარმოებს.

„რეაბილიტაციის დროს დაზიანდა ელექტროსადენები. ბოლო დროს კომპანია ორიენტირებული იყო მაქსიმალურად გზის მოასფალტებაზე და ამიტომ ვერ მოხერხდა გარეგანათების აღდგენა,” – უთხრეს “ბათუმელებს” ბათუმის მერიის პრესსამსახურში.

ამავე პრობლემაზე “ბათუმელებს” 11 მაისს მერიაში უთხრეს, რომ გარეგანათება ორი კვირის ვადაში აღდგებოდა. გარეგანათების გარეშეა ამჟამად გრიბოედოვის, ლერმონტოვის, თაყაიშვილისა და თავდადებულის ქუჩები პუშკინის ქუჩიდან გიორგი ბრწყინვალეს ქუჩამდე, ასევე ლუკა ასათიანი ბაგრატიონიდან – მთის ძირის ქუჩამდე.

გუშინ, 21 ივნისს, გარეგანათება გამორთული იყო ბარათაშვილის ქუჩაზეც. მერიის პრესსამსახურის ინფორმაციით, ამ შემთხვევაში მორიგი ტექნიკური პრობლემა დაფიქსირდა და განათების სისტემა უკვე აღდგენილია.

ნეტგაზეთის მასალების სხვა გამოცემებში გადაბეჭდვის წესი


ავტორი