ცხოვრება სიცოცხლისთვის საშიშ სახლში

გიორგი ბრწყინვალისა და 26 მაისის ქუჩების კუთხეში, ავტოსამრეცხაოს უკან, ძველი, ქვის კედლებზე ჩამოშლილი კრამიტებიანი სახურავია. ამ სახურავის ქვეშ, ქვის კედლებში (რომლებიც ნელ-ნელა იშლება), ლპობაშეპარულ ხის იატაკსა და ჭერს შორის ორი ოჯახი ცხოვრობს. შესასვლელი ხის ფიცრებით შეჭედილი პატარა ხიდულაა, სადაც ჩამოშლილი სახურავის ბოძებისა და ფიცრებისგან, ისევე, როგორც ამ სახურავიდან გადმოწეული კრამიტებისგან, თავის ასარიდებლად სიფრთხილე გმართებთ. ვიწრო დერეფნის ხის იატაკი დაწეულია, ალაგ-ალაგ ჩანს სარდაფიც… ჭერის ბოძები ნახევრად ჩამოშლილია, შესაძლოა სწრაფი მოძრაობის ან სიბნელის გამო სიცოცხლისათვის საშიში დაზიანება მიიღო.

სწორედ ამიტომ ხშირად გვიმეორებს გულნარა სალუქვაძე, რომ ფრთხილად ვიყოთ, შემობრუნების დროსაც კი. თან საკუთარი ბინის კარისკენ მიგვიძღვება, სადაც დედამთილი და მეუღლე ელოდებიან. ბინაშიც არ არის განსხვავებული მდგომარეობა, ჩამოსული წყლის კვალი, ხვრელები ჭერში…

შესასვლელი კარის პირდაპირ გულნარა სალუქვაძის დედამთლი, 82 წლის მარია ლეონოვა ზის. ის გიორგი ბრწყინვალის 48 ნომერში ყველაზე დიდი ხნის მკვიდრია. როგორც ყვება, ტყავის ქარხანაში მუშაობდა მთავარ ბუღალტრად. იმ სახლში, სადაც ახლა ცხოვრობს, ბუღალტრების „კანტორა“ ყოფილა. როცა სხვა მისამართზე გადაუტანიათ ეს „კანტორა“, ძველ შენობაში მარია ლეონოვასთვის, რომელიც ნაქირავებში ცხოვრობდა, ბინა გადაუციათ. ეს იყო 1959 წელს. მარია ლეონოვა დღემდე ინახავს მაშინ გაცემულ ორდერს.

სახლი, რომელშიც ორი ოჯახი დღემდე ცხოვრობს

ამ დროისთვის მარია ლეონოვა 62 წლის ვაჟთან და 56 წლის რძალთან ერთად ცხოვრობს. შვილიშვილები არ ჰყავს. მხედველობისა და სმენის პრობლემები აქვს, ჯანმრთელობის სხვა პრობლემებთან ერთად. ამბობს, რომ სამი წელია სახლიდან ვერ გადის და რძალი – გულნარა სალუქვაძე უვლის. ოჯახს არც სოციალურად დაუცველის სტატუსი აქვს, არადა, შემოსავალი მხოლოდ მარიას პენსიაა. ახლა ყველაზე დიდი პრობლემა მათთვის სახლია, რომელიც ყოველდღიურად თავზე ენგრევათ.

გულნარა სალუქვაძე სადარბაზოს შესასვლელთან

„არ მინდა მაგათი ფული, გაგვიყვანონ აქედან ჩვენი ბინის სანაცვლოდ, ან ეს გაამაგრონ და გაარემონტონ. ყოველდღე რისკის ქვეშ ვცხოვრობთ. ერთი ძლიერი ქარი დაანგრევს ყველაფერს“, – ყვება გულნარა სალუქვაძე.

მათ ისედაც ძველ და სარემონტო სახლს სახურავი იანვრის დიდთოვლობაზე ჩამოექცა. გულნარა სალუქვაძე ამბობს, რომ მას შემდეგ სხვადასხვა ინსტანციას არაერთხელ მიმართა – დახმარება არსაიდან ჩანს. ახლა იხსენებს, რომ დიდთოვლობამდე რამდენიმე წლით ადრე სახლის გასამაგრებელი სამუშაოების ჩატარება უნდოდა, მაგრამ შესაბამის სამსახურებში უთხრეს, რომ მხოლოდ ხის კონსტრუქციები შეეძლო გამოეყენებინა, ხოლო ბეტონის ჩამოსხმის შემთხვევაში მას დააჯარიმებდნენ.

სადარბაზოში შემოსასვლელი ხის ფიცრებით შეჭედილი პატარა ხიდი

სადარბაზოს იატაკი გადახრილია, ჩამოცვენილია ჭერის საყრდენი ბოძები

შუა სადარბაზოში ჩამოვარდნილი წვეტიანი ბოძი

„30 იანვარს მივმართე მერიას, მას შემდეგ ექვსი განცხადება მაქვს და წესიერი პასუხი არ მიმიღია. ხან იმას გადააწერეს, ხან მეორეს, არ ვიცი პასუხი სადაა. მანველიძესთან [ბათუმის ვიცე-მერი ბაგრატ მანველიძე] ვიყავი მისული, ერთხელ შემხვდა და მერე აღარ მხვდებოდა, ხან ვითომ ის მიზეზი, ხან – ეს… მერე მთავრობაშიც ვიყავი მისული და დამირეკა მანველიძემ მოდიო. სიტყვიერად დამპირდა ნაქირავებში გაგიყვანთ და სამი თვე 350 ლარს გადაგიხდითო.

მართლაც ასე იყო, გასული ვიყავით ნაქირავებში. ორი თვის ფული დაგვიანებით ირიცხებოდა და ბინის მეპატრონემ გამოგვიშვა. ისევ ძველ სახლში დავბრუნდით. მეოთხე თვე მიდის და მესამე თვის ფული ჯერაც არ არის დარიცხული, როგორ არ დავბრუნდებოდი… სადმე ხომ უნდა ვიცხოვროთ?! ეს მოხუცი სად წავიყვანო?! ჩემმა ქმარმა სამსახური დაკარგა, რაც ჰქონდათ იქაც 150 ლარამდე იყო ხელფასი. ის ეთნიკურად რუსია, ჩვენთან ქართველს უჭრის მუშაობა და მას ვინ ამუშავებს… „ბალკები“ ჩამოშლილი, ყოველდღე ცვივა კრამიტი და ხის კონსტრუქციის ნამსხვრევები, წყალი დიდი ხანია ჩამოგვდის… ცოტა ხნის წინ, ძლიერი ქარის დროს, მეზობლებთან შევაფარეთ თავი“, – ყვება გულნარა სალუქვაძე.

მისი თქმით, მერიამ მთავრობასთანაც გადაამისამართა, მაგრამ მათგან მიიღო პასუხი, რომ მთავრობაში მხოლოდ ეკომიგრანტებისთვის იყო გამოყოფილი მსგავსი დახმარება და კვლავ მერიასთან გადაამისამართეს. 

ჭერში ხვრელებია და წყალი ჩამოდის

ადგილებზე, სადაც წყალი დიდი ოდენობით ჩამოდის, ტაშტები აქვთ დადგმული

მარია ლეონოვა ცდილობს აგვიხსნას, რომ მთელი ცხოვრება შრომაში გაატარა და ახლა, როცა დასვენებისა და მშვიდი სიბერის დრო უნდა ჰქონდეს, გარეთ გაუსვლელად ცხოვრობს საკუთარ სახლში, რომელიც იქცა ერთგვარ საფრთხედ. იმეორებს, რომ მხოლოდ გაცვლა უნდა საკუთარი ბინის ან უსაფრთხოების უზრუნველყოფა.  რომ ამ ქვეყანაში მისი ასაკის ხალხი არავის სჭირდება, ბოლო დროინდელმა ამბებმა კი ყველა იმედი გადაუწურა და ყურის სასმენ აპარტზე ოცნებაც შეაწყვეტინა. ახლა ის აწუხებს, მისი წამლების ხარჯებთან ერთად ამდენი პრობლემა დააწვა თავის რძალ-შვილს.

82 წლის მარია ლეონოვა

„ბათუმელებს“ მერიაში უთხრეს, რომ პირი, ვისაც მარია ლეონოვასა და გულნარა სალუქვაძის განცხადებებზე შეუძლია ინფორმაციის მოწოდება, შვებულებაში იმყოფებოდა და ინფორმაციას მოგვიანებით მოგვაწვდიან.