შენობას ძეგლის სტატუსი არ ჰქონდა – სააგენტოს განმარტება და მშენებლობა ზუბალაშვილის #37-ში

ზუბალაშვილის 37გაზეთ „ბათუმელების“ N15-ში გამოქვეყნდა სტატია სათაურით – „ბიზნესი მორიგი ძეგლის განადგურების ხარჯზე“, რომელშიც საუბარია ბათუმში, ზუბალაშვილის N37-ში მდებარე შენობის დემონტაჟზე. „ბათუმელების“ ინფორმაციით, შენობას კულტურული მემკვიდრეობის ძეგლის სტატუსი ჰქონდა, რასაც ადასტურებდა სააღრიცხვო ბარათი N0103320, რომელშიც აღწერილი იყო ძეგლის მახასიათებლები.

სტატიის მომზადების პროცესში „ბათუმელები“ დაუკავშირდა აჭარის კულტურული მემკვიდრეობის დაცვის სააგენტოს ხელმძღვანელს, მირანდა ჩარკვიანს, რომელმაც აღნიშნა, რომ კომენტარს დოკუმენტაციის შესწავლის შემდეგ შეძლებდა. სტატიის გამოქვეყნების შემდეგ მირანდა ჩარკვიანმა განაცხადა, რომ აღნიშნულ შენობას არ გააჩნია ძეგლის სტატუსი და საქართველოს კულტურის, ძეგლთა დაცვისა და სპორტის მინისტრის ბრძანებაში [რომლის თანახმადაც ერთ-ერთ სახლს ძეგლის სტატუსი მიენიჭა], შეცდომითაა მითითებული მისამართი და ფაქტობრივად აღნიშნული საცხოვრებელი სახლი მდებარეობს არა ზუბალაშვილის ქ. N37-ში, არამედ ზ. გამსახურდიას ქ. N39/ხულოს ქ. N9-ში:

აჭარის კულტურული მემკვიდრეობის დაცვის სააგენტოს მიერ მოწოდებული ინფორმაცია

აჭარის კულტურული მემკვიდრეობის დაცვის სააგენტოს მიერ მოწოდებული ინფორმაცია

კომპანია „გეოგრაფიკმა“ ასევე მოგვაწოდა სია, [„სამინისტროს მიერ  საგანგებოდ გამოყოფილი სამუშაო ჯგუფისა და ტენდერის მონაწილეთა ერთობლივი განხილვის შედეგად შეჯერებული სტატუსი და კატეგორია“], სადაც ზუბალაშვილის 37-ში ორი ძეგლია: სიითი ნომრები – 239 [ამჟამინდელი „თიბისი“ ბანკის შენობა] და 259.

siaaa

ამონარიდი „გეოგრაფიკის“ მიერ მოწოდებული სიიდან

dzeglis agwera

ზუბალაშვილის 37-ში დანგრეული შენობის დახასიათება

„სტატუსთან დაკავშირებით ამ ეტაპზე ვერაფერს გეტყვით, იქნებ მოუხსნეს კიდეც, ან რაღაც ეტაპზე არ ჰქონდა, თუმცა, ზუბალაშვილის 37-ში მდებარე ერთსართულიანი შენობა, რომელიც მე-20 საუკუნის პირველ ნახევარში იყო აგებული, ნამდვილად წარმოადგენდა კულტურული მემკვიდრეობის თვალსაზრისით ღირებულ ობიექტს – ის შეიცავდა მოდერნის ელემენტებს“ – აცხადებენ კომპანია  „გეოგრაფიკში“, რომელმაც ამჯერად აჭარის კულტურული მემკვიდრეობის დაცვის სააგენტოს დაკვეთით, აჭარის მუნიციპალიტეტებში არსებული ძეგლების ინვენტარიზაცია უნდა ჩაატაროს.

„ბათუმელები“ გთავაზობთ გაზეთში დაბეჭდილი სტატიის კორექტირებულ ვერსიას:

ბათუმში, ზუბალაშვილის ქუჩაზე, #37-ში მდებარე შენობა კერძო კომპანიამ დაანგრია. კომპანიაში აცხადებენ, რომ შენობის დემონტაჟზე ნებართვა ბათუმის მერიამ დაახლოებით ორი თვის წინ გასცა.

ზუბალაშვილის ქუჩაზე, #37-ში, 3392 კვ/მ მიწის ნაკვეთზე სამშენებლო სამუშაოებს დღეს შპს „დს გრუპი“ აწარმოებს, რომელსაც ეს ნაკვეთი საკუთრებაში შპს „კ.მ გრუპმა“ გარიგების საფუძველზე გადასცა.

აქ მდებარე შენობის აღწერის ბარათი კომპანია „გეოგრაფიკმა“ მოამზადა გასულ წელს, ბათუმის კულტურული მემკვიდრეობის ძეგლების ინვენტარიზაციის დროს. ბარათის მიხედვით, ბათუმში, ზუბალაშვილის #37-ში მდებარე [უკვე დანგრეული] ერთსართულიანი შენობა, აგებული იყო მე-20 საუკუნის პირველ პერიოდში და წარმოადგენდა კულტურული მემკვიდრეობის არქიტექტურულ ძეგლს, კატეგორიის გარეშე. ბარათი შედგენილია 2015 წლის 15 სექტემბერს. სააღრიცხვო ბარათის თანახმად, ამ დროისთვის შენობა საშუალო მდგომარეობაში იყო, მხოლოდ სახურავიდან ჩადიოდა წყალი.

ზემოაღნიშნული ნაგებობა, როგორც არქიტექტურული ძეგლი, დატანილია „გეოგრაფიკის“ მიერ შედგენილ რუკაზეც. „გეოგრაფიკმა“ კი ქალაქ ბათუმში არსებული კულტურული მემკვიდრეობითი ძეგლების ინვენტარიზაცია, ბათუმის განვითარების ფონდის დაკვეთით, გასულ წელს ჩაატარა და შედეგების საჯარო პრეზენტაცია გასული წლის დეკემბერში – ზუბალაშვილის 37-ში შენობის დანგრევამდე სამი თვით ადრე, – ბათუმის მუნიციპალიტეტის შენობაში გამართა.

რატომ ვერ მოხერხდა შენობის დაცვა; რა ინფორმაციას ფლობს აჭარის კულტურული მემკვიდრეობის დაცვის სააგენტო? – „ბათუმელები“ სააგენტოს ხელმძღვანელს, მირანდა ჩარკვიანს დაუკავშირდა, რომელმაც სატელეფონო საუბარში განაცხადა, რომ სააგენტოში საკითხს სწავლობენ და კომენტარს მიმდინარე მშენებლობასთან დაკავშირებულ ყველა დოკუმენტის გაცნობა-შესწავლის შემდეგ გააკეთებენ.

DSCN9884„ჩვენი ინფორმაციით, არავითარი კულტურული მემკვიდრეობის ძეგლის სტატუსი მანდ შენობას არ გააჩნდა. ჩვენ სხვა კომპანიისგან შევისყიდეთ ტერიტორია და გამზადებული პროექტი გვაქვს აღებული. რაც შეეხება მშენებლობის ნებართვას – ჯერ არ არის გაცემული, ამას აქვს თავისი პროცედურა, რომელიც ტერიტორიის გასუფთავების შემდეგ დაიწყება. რაც შეეხება შენობების დემონტაჟს, შესაბამისი ნებართვა დაახლოებით ორი თვის წინ გაიცა,“ – განაცხადა „ბათუმელებთან“ სატელეფონო საუბარში კომპანია „დს გრუპის“ წარმომადგენელმა დავით სალაძემ.

აღნიშნული ტერიტორია ზუბალაშვილის 37-ში [ჭავჭავაძის, ლუკა ასათიანისა და ზუბალაშვილის ქუჩებს შორის] აჭარის ფინანსთა და ეკონომიკის სამინისტრომ 2009 წელს პირობებით გაასხვისა შპს „კ.მ გრუპზე“ [კომპანიის ძირითადი ვალდებულება იყო აეშენებინა და ექსპლუატაციაში შეეყვანა საცხოვრებელი სახლი და მოეწყო სკვერი].

2015 წლის ბოლოს, როგორც რეესტრის დოკუმენტებით ირკვევა, ხელშეკრულებაში გარკვეული ცვლილებები შევიდა, რის შემდეგაც ტერიტორია შემოღობეს და მშენებლობისთვის მოსამზადებელი სამუშაოებიც დაიწყო.

რეესტრის ამონაწერით „კ.მ გრუპ“-მა აღნიშნული ტერიტორია 2016 წლის აპრილში გარიგების საფუძველზე საკუთრებაში გადასცა შპს „დს გრუპი DS GROUP“-ს.

„დს გრუპმა“ კი ტერიტორია საკუთრებაში 2016 წლის 27 აპრილს დაირეგისტრირა საჯარო რეესტრში [„ბათუმელების“ ინფორმაციით, კულტურული მემკვიდრეობის ძეგლი 16 აპრილს დაანგრიეს].

სამინისტროსთან გაფორმებული ხელშეკრულებით, „კ.მ გრუპ“-ს ვალდებულების შესრულებამდე, ანუ საცხოვრებელი სახლის აშენებამდე, არ ჰქონდა უფლება აჭარის ფინანსთა და ეკონომიკის სამინისტროსთან შეთანხმების გარეშე განეკარგა ან დაეტვირთა აღნიშნული ქონება.

სამინისტროში „ბათუმელებს“ განუცხადეს, რომ მათი მხრიდან თანხმობა – ერთი კომპანიის მიერ ქონების სხვა კომპანიისთვის გადაცემაზე – ვალდებულების შესრულების პირობით, დაახლოებით ერთი თვის წინ გაიცა. სამინისტროში ასევე განაცხადეს, რომ ტერიტორიაზე კულტურული მემკვიდრეობის ძეგლის შესახებ ინფორმაციას არ ფლობდნენ.

საჯარო რეესტრის ამონაწერის მიხედვით, „დს გრუპი“ „კ.მ გრუპს“ ასაშენებელ სახლში პირველ სართულზე გადასცემს: ორ არასაცხოვრებელ ფართობს – ჯამში 900 კვ/მ-ს; ასევე სხვადასხვა სართულზე 11 ბინას – ჯამში 1449 კვ/მ-ს; მანსარდის სართულზე – 104,1 კვ/მ ბინას და ტერასაზე – 529 კვ/მ ფართობს.

„დს გრუპი“ ასაშენებელ საცხოვრებელ კომპლექსში, რომელიც, მინიმუმ 10-სართულიანი მაინც იქნება, ბინებს უკვე ყიდის – 1 კვ მეტრს – 650 აშშ დოლარიდან. ჩვენი ინფორმაციით, ბინებს მიიღებს აჭარის მთავრობაც – ხელშეკრულების ერთ-ერთი პირობით, ამავე კომპლექსში კომპანიამ აჭარის ავტონომიურ რესპუბლიკას საკუთრებაში უნდა გადასცეს ჯამში 400 კვ/მ საცხოვრებელი ფართობი.

ყოფილი ძეგლის შენობიდან ლუკა ასათიანის ქუჩამდე [ასევე ამ ადგილიდან „თიბისი“ ბანკის შენობის მხარეს, რომელიც ასევე ძეგლია] არსებული მონაკვეთი [ზუბალაშვილის ქუჩის გასწვრივ] ბათუმის საკრებულოს მიერ 2013 წელს დამტკიცებული „კონკრეტული ფუნქციური ზონირების რუკის“ მიხედვით, ქალაქის სარეკრეაციო ზონაა.

მშენებარე კომპლექსთან სკვერის მოწყობის ვალდებულება კომპანიას ხელშეკრულებით აქვს, თუმცა აქვე, სარეკრეაციო ზონაში მდებარე ზემოაღნიშნული სკვერი [ზუბალაშვილისა და ასათიანის ქუჩების კვეთაში] მიმდინარე სამუშაოების შედეგად, უკვე განადგურებულია.

„არავითარ სარეკრეაციო ზონაზე ინფორმაცია არ გვაქვს. მანდ იყო პატარა ბუჩქნარი. საერთოდ, ტერიტორიიდან გამწვანების სამსახურმა რვა მანქანა მცენარე გაიტანა და გადარგო. სკვერი იქ მოეწყობა, სადაც ამჟამად მრავალწლიანი მაგნოლიებია, ანუ ეს მაგნოლიები დარჩება. ეს პროექტი 2010 წლიდან არის მზად, უბრალოდ „კ.მ გრუპმა~ ვერ მოახერხა მშენებლობის დაწყება და გადავადდა… ამასთან, ყველა დოკუმენტაცია დევს სახელმწიფო უწყებებში. თუ სარეკრეაციო ზონა იყო, თუ ძეგლი იყო, ამაზე საუბარი აქამდე უნდა დაწყებულიყო,“ – აღნიშნა დავით სალაძემ.

აღსანიშნავია, რომ ჯავახიშვილისა და აბუსერიძის ქუჩების კვეთაში „დს გრუპს“ აჭარის მთავრობამ [ბუნებრივია, ბათუმის მერიისა და საკრებულოს თანხმობით და ნებართვით], ასევე სარეკრეაციო ზოლის, ფაქტობრივად, სკვერის ნაწილი მიჰყიდა. აქ კომპანია მრავალსართულიან კომპლექსს აშენებს.

„დს გრუპი“ კიდევ ერთი ცათამბჯენის აშენებას ძველ ბულვართან აპირებს.

ნეტგაზეთის მასალების სხვა გამოცემებში გადაბეჭდვის წესი


ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com