საქართველოში სუროგაციის გზით დაბადებული ბავშვის ქვეყნიდან გასვლის წესის დამტკიცების თაობაზე, იუსტიციისა და შინაგან საქმეთა მინისტრებმა ერთობლივი ბრძანება გამოსცეს.
„ეს წესი განსაზღვრავს საქართველოში ექსტრაკორპორული განაყოფიერების [სუროგაციის] გზით დაბადებული ბავშვის საქართველოდან გასვლის პროცედურას, პირობებსა და საქართველოდან გასვლის უფლების შეზღუდვის საფუძვლებს ბავშვთა უფლებების დაცვისა და ბავშვთა ტრეფიკინგის თავიდან აცილების მიზნით. ამ წესის მიზნებისათვის ტერმინი „ბავშვი“ გულისხმობს არასრულწლოვანს“ – აღნიშნულია ერთობლივ ბრძანებაში.
ამავე წესისი მიხედვით, სახელმწიფო სერვისების განვითარების სააგენტო საქართველოში სუროგაციის გზით ბავშვის დაბადების თაობაზე სამედიცინო დაწესებულებისაგან მიღებული შეტყობინების საფუძველზე უზრუნველყოფს სუროგაციის გზით დაბადებული ბავშვების აღრიცხვას იმ შემთხვევაში, თუ დაბადების სამოქალაქო აქტის ჩანაწერის რეგისტრაციის მოთხოვნის შესახებ განცხადება სააგენტოში წარმოდგენილია დაბადების სამოქალაქო აქტის ჩანაწერში მშობლებად მისათითებელი პირების მიერ ან მათი სახელით.
სააგენტოს შესაბამის მონაცემთა ბაზაში აისახება სააგენტოს ხელთ არსებული შემდეგი ინფორმაცია: საქართველოში სუროგაციის გზით დაბადებული ბავშვის სახელი და გვარი [ქართულად, ასევე ლათინური ტრანსლიტერაციით, იმის იდენტურად, როგორც ეს ფიქსირდება ბავშვის დაბადების სამოქალაქო აქტის ჩანაწერში მშობლ(ებ)ად მისათითებელი პირ(ებ)ის სამგზავრო დოკუმენტ(ებ)ში], პირადი ნომერი, მოქალაქეობა, დაბადების თარიღი, სქესი; აგრეთვე განცხადებაში ან/და დაბადების სამოქალაქო აქტის ჩანაწერში დაფიქსირებული მშობლ(ებ)ად მისათითებელი, პირ(ებ)ის სახელი და გვარი [ქართულად ან/და ლათინური ტრანსლიტერაციით, რომელიც ფიქსირდება მათი სამგზავრო ან/და პირადობის დამადასტურებელი სხვა დოკუმენტის იდენტურად], პირადი ნომერი, სამგზავრო ან/და პირადობის დამადასტურებელი სხვა დოკუმენტის საიდენტიფიკაციო მონაცემები [მათ შორის – დოკუმენტის ნომერი და სხვა], მოქალაქეობა, დაბადების თარიღი.
ბაზაში ბავშვის შესახებ მონაცემები აისახება მიუხედავად იმისა, სრულად მოეპოვება თუ არა აღნიშნული მონაცემები სააგენტოს. ბაზაში არ აისახება ინფორმაცია მკვდრადშობილი და გარდაცვლილი ბავშვების თაობაზე.
საქართველოში სუროგაციის გზით დაბადებული ბავშვის საქართველოდან გასვლის დროს სასაზღვრო გამტარ პუნქტზე საპასპორტო კონტროლი ხორციელდება საქართველოს კანონმდებლობით და ამ ერთობლივი ბრძანებით დადგენილი წესით.
სააგენტო საქართველოს შინაგან საქმეთა სამინისტროსათვის უზრუნველყოფს შესაბამის მონაცემთა ბაზაში დაცულ პერსონალურ მონაცემებზე წვდომას.
იმ შემთხვევაში, თუ სასაზღვრო გამტარ პუნქტზე წარმოდგენილ ბავშვს, რომელიც ტოვებს საქართველოს ტერიტორიას, არ უფიქსირდება აღნიშვნა „შემოსვლა“, საქართველოს შინაგან საქმეთა სამინისტროს უფლებამოსილი თანამშრომელი ამოწმებს ბავშვის მონაცემებს სააგენტოს ზემოაღნიშნულ მონაცემთა ბაზაში და ახდენს მის იდენტიფიკაციას.
თუ სააგენტოს მონაცემთა ბაზაში დაცული ინფორმაციის საფუძველზე ირკვევა, რომ ბავშვი, რომელიც პირველად ტოვებს საქართველოს ტერიტორიას, არის საქართველოში სუროგაციის გზით დაბადებული და მისი დაბადების სამოქალაქო აქტის ჩანაწერში, რომელიც გაცემულია სააგენტოს მიერ, ორივე მშობელი მითითებული არ არის, ან მის სახელზე სააგენტოს მიერ არ არის რეგისტრირებული დაბადების სამოქალაქო აქტი, საქართველოს შინაგან საქმეთა სამინისტროს უფლებამოსილი თანამშრომელი ვალდებულია მიიღოს გადაწყვეტილება ბავშვის საქართველოდან გაყვანაზე [საზღვრის გადაკვეთაზე] უარის თქმის შესახებ.
საქართველოს იუსტიციისა და შინაგან საქმეთა მინისტრების შესაბამისი ბრძანება 2016 წლის 12 აპროილიდან ამოქმედდა.
