მთავარი,სიახლეები

„ოცნების ქალაქის“ ულტიმატუმი არჩილ ხაბაძეს

14.04.2016 • 1430
„ოცნების ქალაქის“ ულტიმატუმი არჩილ ხაბაძეს

14 აპრილს, ე.წ. „ოცნების ქალაქში“ მცხოვრებლებმა  საპროტესტო აქცია გამართეს. მათი თქმით ისინი ეხმაურებიან სახალხო დამცველის ანგარიშში წარმოდგენილ ინფორმაციაზე აჭარის ავტონომიური რესპუბლიკის მთავრობის თავმჯდომარის არჩილ ხაბაძის მიერ გაკეთებულ განცხადებას:

„უჩა ნანუაშვილმა „მუყაოს დასახლების“ პრობლემა ნომერ პირველად დაასახელა, რაზეც არჩილ ხაბაძემ განაცხადა, რომ სახალხო დამცველის მონიტორინგის ჯგუფმა არასწორად იმუშავა ოცნების ქალაქის შესახებ და თურმე ათ პროცენტზე მეტს აქ არ ეკუთვნის დახმარება. ამას ჩვენ ვაპროტესტებთ, – ამბობს აქციის მონაწილე მარინა ბერიძე და ამატებს, რომ ოცნების ქალაქში სხვადასხვა სტატუსის მქონე ადამიანები ცხოვრებენ, რომლებსაც ესაჭიროებათ დახმარება – აქ მცხოვრებთა დიდ ნაწილს, შესწავლის შემდეგ დაენიშნათ სოციალური დახმარება და თუ არ გვეკუთვნის დახმარება და მხოლოდ 10%-ია დასახმარებელი, მაშინ დახმარებას რატომ გვინიშნავდნენ?! ჩვენთან შესაძლოა მხოლოდ 10% იყოს ვისაც არ ეკუთვნოდეს დახმარება, მაგრამ დანარჩენი 90% უკიდურეს გაჭირვებაში ცხოვრობს, მცირეწლოვან ბავშვებთან და ჯანმრთელობის პრობლემების მქონე ოჯახის წევრებთან ერთად, გაუსაძლის პირობებში. ბატონი არჩილი კი ერთხელაც არ მოსულა ადგილზე რომ ენახა 600 ბავშვი როგორ ცხოვრობს სასიცოცხლო რისკის პირობებში “.

აქციის მონაწილეებმა არჩილ ხაბაძეს ათი დღის ვადა მისცეს: „ველოდებით  მისგან სწორ განცხადებას, წინააღმდეგ შემთხვევაში შესახლებულები ყველანი ერთად გავერთიანდებით და მასშტაბურ მოძრაობას დავიწყებთ“, – აღნიშნავს მარინა ბერიძე და დასძენს, რომ აქციას ასობით ადამიანი ესწრებოდა.

აჭარის მთავრობის პრესსამსახურის ინფორმაციით, აღნიშნულ საკითხზე მთავრობის თავმჯდომარის  კომენტარი მოგვიანებით გავრცელდება.

დასახლება სამი წლის წინ გაჩნდა ბათუმთან ახლოს, ხელვაჩაურში. აქ თვითნებურად ჩასახლებული ასობით ოჯახი ცხოვრობს სახელდახელოდ აგებულ ქოხებში, წყლისა და კანალიზიაციის გარეშე. მათი უმრავლესობა აცხადებს, რომ ისინი ეკომიგრანტები არიან. აჭარის მთავრობამ მათი საკითხი შეისწავლა, თუმცა ქმედითი ნაბიჯები ამ ადამიანების ყოფის გასაუმჯობესებლად არ გადადგმულა.

იგივე თემაზე იხილეთ:

დატბორილი „ოცნების ქალაქი“;

ლაპარაკობენ ბავშვები

გადაბეჭდვის წესი


ასევე: