„წიგნის კუთხე“ – ახალი ლიტერატურული კონკურსი ბათუმში [ვიდეო]

გაზეთ „ბათუმელებთან“ არსებული „მედიალაბორატორია” საცდელ რეჟიმში [რეგიონალურ დონეზე] იწყებს პროექტს – „წიგნის კუთხე“. პროექტი წარმოადგენს ლიტერატურული კონკურსის ფორმატის ინტერნეტ გადაცემას.

„წიგნის კუთხეში“ ბათუმის რვა კერძო და რვა საჯარო სკოლის მოსწავლეები მიიღებენ მონაწილეობას, სულ 16 გუნდი. თითოეულ გუნდში, საჯარო განათლების მესამე საფეხურის [IX-XII კლასები] სამი მოსწავლეა.

გადაცემების ჩაწერა მიმდინარეობს შაბათ-კვირას. მონაწილე გუნდები ყოველ კვირა საღამოს, 22:00 საათზე იგებენ იმ ხუთი ლიტერატურული ნაწარმოების ჩამონათვალს, რომლის ირგვლივაც დაისმება შეკითხვები მომდევნო შაბათისა და კვირის თამაშებზე. თუმცა, თუ რომელი ორი გუნდი ითამაშებს ამა თუ იმ კონკრეტულ გადაცემაში, ამას მონაწილეები თამაშამდე ერთი დღით ადრე იგებენ, გუნდები შემთხვევითი შერჩევის პრინციპით გამოვლინდებიან.

თამაშში ასევე შედის ბლიც-ტური, სადაც შეკითხვები არამარტო შერჩეული ხუთი წიგნიდან, არამედ სხვადასხვა ცნობილი ლიტერატურული ნაწარმოებიდან ისმება.

საბოლოოდ, ფინალური თამაშის მონაწილე გუნდები ითამაშებენ მანამდე გამოცხადებული 35 ლიტერატურული ნაწარმოების ირგვლივ.

გადაცემები იწერება ბათუმის საჯარო ბიბლიოთეკის ამერიკულ კუთხეში და ყოველ ოთხშაბათს გამოქვეყნდება batumelebi.ge-ზე.

პროექტის მიზანია მოსწავლეებში ლიტერატურის პოპულარიზაცია და ზოგადად, ახალგაზრდა მკითხველების წახალისება.

 „წიგნის კუთხის“ პირველი და მეორე მერვედფინალური თამაში უკვე გაიმართა. მონაწილეები თამაშობდნენ შემდეგი ხუთი ლიტერატურული ნაწარმოების ირგვლივ: 

• ევრიპიდე -„მედეა“; 
• ნოდარ დუმბაძე – „მე, ბებია, ილიკო და ილარიონი“;  
• ოსკარ უაილდი – „დორიან გრეის პორტრეტი“;  
• დენიელ კიზი – „ყვავილები ელჯერნონისთვის“; 
• „ანა ფრანკის დღიური“.
  

პირველი მერვედფინალური თამაში, ბათუმის მე-6 ფიზიკა-მათემატიკური საჯარო სკოლისა [თაკო ბოლქვაძე; სოფო ბაბიჩევი; მარიამ ცინცაბაძე] და კავკასიის ბიზნესის სკოლის [ლაშა ბაზიაშვილი; ანა კახიძე; თათია ნაგერვაძე] გუნდებს შორის გაიმართა. ამ თამაშის შედეგებით, „წიგნის კუთხის“ მეოთხედფინალში ბათუმის მე-6 ფიზიკა-მათემატიკური საჯარო სკოლის გუნდი გადავიდა, ანგარიშით – 7:4.

მეორე მერვედფინალური თამაში, რ. შაჰინის სახელობის სკოლა-ლიცეუმისა [გვანცა ძიძიგური; რუსუდან დავითაძე; თამუნა ქათამაძე] და ბათუმის #2 საჯარო სკოლის გუნდებს [ანა გათენაძე; ირაკლი ხუხუნაიშვილი; სესილი მეტრეველი] შორის გაიმართა. ამ თამაშის შედეგით, ბათუმის მე-2 საჯარო სკოლა, ანგარიშით – 18:5, გადაცემის მეოთხედფინალში გადავიდა.

„წიგნის კუთხეს“ ყოველ თამაშზე ჰყავს კვირის სტუმარი, ერთი ძირითადი კითხვით. პირველი კვირის თამაშების სტუმარი იყო საქართველოს სახალხო დამცველის აპარატის რეგიონული დეპარტამენტის აჭარის სამმართველოს უფროსი, ციალა ქათამიძე. 

გამარჯვებული გუნდები დასაჩუქრდებიან სიგელებითა და ფასიანი საჩუქრებით [წიგნები, თანამედროვე კომპიუტერული ტექნიკა და სხვ.].