ხვალ, 4 თებერვალს, ორგანიზაცია: „ბათუმში ახალი მეჩეთის მშენებლობის საინიციატივო ჯგუფი“, ბათუმის ცენტრალური მეჩეთის ეზოში მედიისთვის პრესკონფერენციას გამართავს. თემა, რომელზეც საინიციატივო ჯგუფი აპირებს საუბარს, ბათუმში ახალი მეჩეთის მშენებლობას ეხება – თემი ამ მოთხოვნით ხელისუფლებას მიმართავს. საინიციატივო ჯგუფმა თავისი პოზიცია წერილობით გაავრცელა, რომლის ტექსტსაც „ბათუმელები“ უცვლელად აქვეყნებს:
„ქართველი მუსლიმი თემი წლების განმავლობაში ითხოვს ხელისუფლებისგან ბათუმში ახალი მეჩეთის მშენებლობის პროცესის მხარდაჭერას. ბათუმის ცენტრში მოქმედი ისტორიული მეჩეთის „ორთა ჯამეს“ სივრცე არ იტევს ბათუმში მცხოვრებ და სტუმრად ჩამოსულ მუსლიმ მლოცველებს. ამის გამო, რეგულარულად რამდენიმე ასეულ მლოცველს ლოცვა არასათანადო პირობებში, წვიმასა და თოვლში, ღია ცის ქვეშ, ქუჩაში უწევს. სივრცის პრობლემა განსაკუთრებით მწვავედ პარასკევის ლოცვისა და სადღესასწაულო (ბაირამების) ლოცვების დროს დგება. ისლამის დოგმატიკური სწავლების თანახმად ლოცვა მხოლოდ მეჩეთში უნდა შესრულდეს. თუმცა უადგილობის გამო ასეულობით მლოცველ მამაკაცს მეჩეთის მიმდებარე ტერიტორიაზე ქუჩაში გამოტანილ ხალიჩებზე უწევს ლოცვა. ლოცვაში მონაწილეობის მიღება თითქმის სრულად ეზღუდებათ მუსლიმ ქალებს, რომელთა რიცხვი ასევე ძალიან მაღალია. მსგავს პირობებში ლოცვის ჩატარება წინააღმდეგობაში მოდის ისლამში დადგენილ რელიგიურ ეტიკეტთან და ეს არის შეურაცხმყოფელი.
ბოლო წლებში საქართველოს ხელისუფლებამ მუსლიმ თემს არაერთხელ მოგვცა დაპირება ახალი მეჩეთისთვის მიწის ნაკვეთის გამოყოფისა და მეჩეთის ასაშენებლად შესაბამისი დახმარების გაწევის თაობაზე. მსგავსი დაპირება ხელისუფლებისგან თემმა უკანასკნელად 2013 წელს მიიღო, თუმცა, აღნიშნული პერიოდის შემდეგ საკითხს პროგრესი არ განუცდია.
აღნიშნულიდან გამომდინარე, ორი თვის წინ შეიქმნა „ბათუმში ახალი მეჩეთის მშენებლობის საინიციატივო ჯგუფი“, რომელშიც გაწევრიანებული არიან როგორც სასულიერო ისე, საერო პირები. საინიციატივო ჯგუფმა ორგანიზება გაუწია ბათუმში მეჩეთის მშენებლობის მოთხოვნით მუსლიმი თემის ხელმოწერების შეგროვებას. 12 ათასზე მეტი ხელწერის დამადასტურებელი დოკუმენტაცია გაეგზავნება საქართველოს პრეზიდენტს, პრემიერ-მინისტრს, პარლამენტის თავმჯდომარეს, აჭარის უმაღლეს საბჭოს, აჭარის მთავრობის თავმჯდომარეს, ბათუმის მერს, ასევე დიპლომატიურ კორპუსა და საერთაშორისო ორგანიზაციებს. აღსანიშნავია ის, რომ ხელწერის გზით მოთხოვნას ასევე უერთდებიან ის სასულიერო პირებიც, რომლებმაც 2014 წელს ხელი მოაწერეს მეჩეთის ალტერნატივად სხვა შენობა ნაგებობების მიღების მოთხოვნას, რომელიც პრაქტიკულად არ შეესაბამებოდა მუსლიმი თემის მოთხოვნას მეჩეთის მშენებლობის შესახებ.
ბათუმში ახალი მეჩეთის მშენებლობის ხელშეწყობის მიზნით საინიციატივო ჯგუფი გეგმავს აქტიური ადვოკატირების პროცესს ხელისუფლების წარმომადგენლებთან, მათ შორის მოლაპარაკებების, მიწის ნაკვეთის გადმოცემისა და მშენებლობის პროცესთან დაკავშირებით სამართლებრივი მექანიზმების გამოყენების გზით“.
