4 თებერვალი კიბოს წინააღმდეგ ბრძოლის საერთაშორისო დღეა. ბათუმში ონკოლოგიურმა კლინიკა „მედცენტრმა“ საკუთარი ინიციატივით გადაწყვიტა ხვალ მოქალაქეებს, ონკო პაციენეტებს უფასო კონსულტაცია გაუწიოს. რა შედის უფასო კონსულტაციაში? – ამის შესახებ „ბათუმელების“ კითხვებს ექიმი-ონკოლოგი მზია ხალვაში პასუხობს.
მზია ხალვაში
ქალბატონო მზია, რატომ გადაწყვიტეთ ხვალისთვის პაციენტების უფასოდ მიღება?
ონკოლოგებმა გადავწყვიტეთ ხვალინდელ დღესთან დაკავშირებით გავერთიანდეთ და მოვემსახუროთ ონკოპაციენტებს, ასევე მათ, ვისაც ამ მიმართულებით აქვს გარკვეული ჩივილები. ჩვენ მათ აუცილებლად მოვემსახურებით უფასოდ.
თქვენი კლინიკის მაგალითზე რომ ვიმსჯელოთ, ონკოპაციენტების მატება არის?
იცით, რომ სახელმწიფო პროგრამები არსებობს და ამ პროგრამის ფარგლებში მიმდინარეობს პაციენტებთან ურთიერთობა. ზოგად მიმოხილვას თუ ავიღებთ, მატების ტენდენცია აღინიშნება – ზუსტი ციფრებს ვერ გეტყვით, მაგრამ, მაგალითად, საშვილისნოს ყელის სკრინინგის პროგრამა აჩვენებს, რომ არის მატება. შარშანდელთა შედარებით არის ფილტვის სიმსივნეების მატება.
ფილტვის კიბოს შემთხვევაში სიგარეტის როლი როგორია?
რა თქმა უნდა, მაღალია თამბაქოს მოხმარების როლი და ასევე ქრონიკული ანთებითი პროცესების გავლენა. ეს ყველაფერი განაპირობებს სიმსივნის ჩამოყალიბებას.
გარდაცვალების სტატისტიკა როგორია?
წინა წლებთან შედარებით ამ მხრივ ცვლილებები არ არის.
რამდენ ადამიანს ელოდებით? – ხვალ ბევრი ხალხი რომ მოვიდეს კლინიკაში, ყველასთვის მომსახურების გაწევას შეძლებთ?
ონკოლოგები ყველა ამ პროცესში ვიქნებით ხვალ ჩართული და ვფიქრობთ, რომ ამას შევძლებთ. ხვალისთვის მხოლოდ უფასო კონსულტაციები გვაქვს ჩანიშნული.
პ.ს. მედცენტრის ინფორმაციით 2015 წელში აჭარა-გურიის რეგიონში გამოვლენილია 936 ონკოპაციენტი.
მედცენტრი ბათუმში, პუშკინის ქუჩის #118-ში მდებარეობს.
მედცენტრის სტატისტიკა აჭარის რეგიონში
