ქობულეთი

იბიარდი ქობულეთის წყალკანალისთვის სესხის ოდენობას გაზრდის

ქობულეთის მუნიციპალიტეტს, საქართველოსა და ევროპის რეკონსტრუქციისა და  განვითარების ბანკს [EBRD] შორის გაფორმებული ხელშეკრულების მიხედვით,  სესხი მთლიანად ხმარდება ,,ქობულეთის წყალანირების პროექტი“-ს მხარდაჭერას, რომელიც ჩოლოქის დასახლებაში არსებული გამწმენდი ნაგებობის თანამედროვე დანადგარებით აღჭურვას და ახალი ტექნოლოგიით ფუნქციონირებას ითვალისწინებს.

ქობულეთის გამგებლის, სულხან ევგენიძის ინფორმაციით, სესხის ოდენობა ამჯერად 900 ათასი ევროთი იზრდება. პროექტის ღირებულება თავდაპირველად 3,6 მილიონ ევროს შეადგენდა, საიდანაც 1,5 მილიონი ევრო იბიარდის გრანტი, ხოლო 1 597 000 ევრო სესხი იყო [თანხის დანარჩენი აჭარისა და ქობულეთის ბიუჯეტებიდან დაფინანსდება].

ქობულეთის მუნიციპალიტეტის  გამგებლისათვის შესაბამის ხელშეკრულებებზე [შესატანი ცვლილებების გამო] ხელმოწერის  უფლების მიცემაზე თანხმობის საკითხი ქობულეთის მუნიციპალიტეტის საკრებულომ დღევანდელ სხდომაზე განიხილა.

გამგებლის ინფორმაციით უცხოურმა კომპანიამ, რომელთანაც ხელშეკრულება იყო გაფორმებული, ნაკისრი ვალდებულებები ვერ შეასრულა. სამუშაოებს, საქართველოს ინფრასტრუქტურისა და რეგიონული განვითარების სამინისტრო ზედამხედველობს. გამწმენდი ნაგებობის მშენებლობა 2014 წელს დაიწყო და პროექტის მიხედვით, 2020 წელს უნდა დასრულდეს.

ქობულეთის გამგებლის განცხადებით, ქალაქის ძირითად ნაწილში საკანალიზაციო ქსელი მოწესრიგებულია და მიმდინარე წლის ბოლომდე დარჩენილი უბნებიც [ჩოლოქის ჩათვლით] მოწესრიგდება.

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი ტელ.: [0422] 27 45 12 ელ/ფოსტა: tedobatumi@gmail.com