შპს „სასტუმრო სანატორიუმი ოაზისი“, რომელიც ბათუმის ბულვარის კონცეფციაზე მუშაობდა, 24 დეკემბრიდან ცალკე იურიდიულ კომპანიად აღარ არსებობს. რეორგანიზაციის შედეგად მოხდა სამი კომპანიის, მათ შორის „სასტუმრო სანატორიუმი ოაზისის“ შერწყმა და ახალი კომპანია დარეგისტრირდა. „სასტუმრო სანატორიუმი ოაზისი“ და „ჰოტელ ოაზისი“ შეერწყა „კომპანია საქტურკურორტს“, რეორგანიზაციის შედეგად კი ფუნქციონირებას აგრძელებს ახალი კომპანია სახელწოდებით: შპს „დრიმლენდ ოაზისი“.
კომპანიების რეორგანიზაციის გადაწყვეტილება ავსტრიაში, ქალაქ ვენაში 2015 წლის 20 ოქტომბერს მიიღო შპს „კომპანია საქტურკურორტის“ წილის 91,7%-ის მფლობელი ავსტრიული კომპანია „ალბერეტას“ დირექტორმა ფლორიად კოშათმა [ჰოლანდიის მოქალაქე]. თავის მხრივ „სასტუმრო სანატორიუმი ოაზისი“ და „ჰოტელ ოაზისი“ „კომპანია საქტურკურორტის“ შვილობილი კომპანიები იყო.
ვენაში ასევე გადაწყდა, რომ შპს „დრიმლენდ ოაზისი“ იყოს ყოფილი სამი საწარმოს სამართალმემკვიდრე, „ანუ ყველა საწარმოს აქციები და ობლიგაციები პირდაპირ გადატანილია ახალ კომპანიაში“.
რეესტრის მონაცემებით, შპს „დრიმლენდ ოაზისის“ 91,7%-ის მფლობელად რჩება ავსტრიული კომპანია „ალბერეტა“, ხოლო 8,3%-ს კვლავ ფლობს საქართველოს მოქალაქე ნათია ბუკია.
„დრიმლენდ ოაზისის“ დირექტორია ნიკოლოზ გეგუჩაძე, რომელიც „სასტუმრო სანატორიუმი ოაზისის“ დირექტორი იყო.
ნიკოლოზ გეგუჩაძემ ვენაში მიღებული გადაწყვეტილების საფუძველზე საწარმოთა რეორგანიზაციის შესახებ საჯარო რეესტრს განცხადებით 2015 წლის 14 დეკემბერს მიმართა. საჯარო რეესტრმა საქმის წარმოება შეაჩერა და „საქტურკურორტის“ წილის 8,3%-ის მფლობელის ნათია ბუკიას თანხმობა მოითხოვა.
ნათია ბუკიას თანხმობის განცხადება „საქართველოში რეგისტრირებული „კომპანიის“ შვილობილი კომპანიების დედა კომპანიასთან შერწყმაზე“ საჯარო რეესტრს 2015 წლის 23 დეკემბერს წარედგინა.
ბულვარის ადმინისტრაციამ ბათუმის ბულვარის ტოპოგრაფიული გეგმისა და კონცეფციის შემუშავება-დაგეგმარებაზე ხელშეკრულება [თანხა 240 ათასი ლარი] გამარტივებული შესყიდვის წესით, ყოველგვარი ტენდერისა თუ კონკურსის გარეშე, შპს „სასტუმრო სანატორიუმი ოაზისთან“ 2015 წლის 7 ოქტომბერს გააფორმა.
ინფრასტრუქტურული პროექტის „დრიმლენდ ოაზისის“ მმართველი კომპანია კი იყო შპს „საქტურკურორტი“, რომელიც 2015 წლის 24 დეკემბრიდან ფუნქციონირებას აგრძელებს ახალი იურიდიული სახელით – შპს „დრიმლენდ ოაზისი“.
