15 დეკემბეს batumelebi.ge-ზე გამოქვეყნებულ, ბათუმის ბავშვთა საავადმყოფოში 6 წლის ბავშის გარდაცვალების ამბავს, უბნის ექიმი მაია ბოლქვაძე გამოეხმაურა.
მან „ბათუმელებს“ განუცხადა, რომ ბავშვს წითელას სავარაუდო დიაგნოზი დაუსვა და მშობლებს რეკომენდაცია მისცა, რომ ინფექციურ საავადყოფოში გადაეყვანათ.
მაია ბოლქვაძე, უბნის ექიმი: „ბავშვს პარასკევს საღამოს ჰქონდა სიცხე, დავალევინეთ წამალი. იმის მერე აღარ ჰქონდა. მერე კვირა საღამოს, სოფლის ექთანმა დამირეკა მაღალი სიცხე აქვს და გამონაყარიცო. ორშაბათს, დაახლოებით 11 საათზე ვიყავი უბანზე, ვნახე ბავშვი და სავარაუდო დიაგნოზი – წითელა დავუსვი, მშობლებს რეკომენდაცია მივეცი, რომ გადაეყვანათ ბათუმის ინფექციურ საავადმყოფოში, მაგრამ გადაყვანაზე ოჯახმა უარი განაცხადა, ჯანდაცვასაც ვუთხარი, რომ გადაყვანაზე უარი განაცხადეს და ისინიც ელაპარაკნენ ოჯახს – ბავშვი პირდაპირ ინფექციურში წაეყვანათ.
ბავშვი აქტიური იყო კარგად მესაუბრა, დარბოდა, ვესაუბრე, შენი სიარული არ შეიძლება, კარგად უნდა ჭამო, სითხე უნდა მიიღო-მეთქი. სამშაბათ დილით, როცა დავრეკე და ვიკითხე ბავშის მდგომარეობა, ძლივს სუნთქავსო-მითხრეს და მაშინვე მოხდა სასწრაფოს გამოძახება, ბავშვი სასწრაფოთი ჯერ შუახევის საავადმყოფოში შემდეგ კი ბათუმში ბავშვთა საავადმყოფოში გადაიყვანეს“.
მაია ბოლქვაძის თქმით, გარდაცვლილი ბავშვის ზუსტი დიაგნოზი 14 დღეში ანალიზების პასუხის შემდეგ დადგინდება.
