„ეს არის იმ პროცესის გაგრძელება, რაზეც ჩვენ ვამბობდით, რომ მიმდინარეობდა სარედაქციო პოლიტიკის შეცვლა და ეს სურვილი ჩანდა თავიდანვე. გვეუბნებოდნენ, რომ ვიგონებდით რაღაცებს, ფაქტები სახეზეა – ახლა უკვე ერთადერთი პლატფორმა, რომელიც დამოუკიდებლად ქმნიდა კონტენტს, გამოშიგნეს…“ – ამბობს აჭარის ტელევიზიის ონლაინსამსახურის უფროსი სოფო ჟღენტი. მას ტელევიზიის დირექტორმა ამ კონკრეტული სამსახურის შეცვლილი დებულება გაუგზავნა, რომლის მიხედვითაც, ონლაინსამსახური ახალ ამბებს ვეღარ გაავრცელებს და ამისთვის ცალკე რედაქტორი იმუშავებს.
ნინო ხაჟომია, რომელიც სოფო ჟღენტის ინფორმაციით, ახალი ამბების ონლაინრეჟიმში გავრცელებაზე იზრუნებს, აჭარის ტელევიზიის საინფორმაციო სამსახურის ერთ-ერთ რედაქტორად 24 თებერვალს დანიშნეს, თუმცა, რამდენიმე დღეში მან ეს თანამდებობა დატოვა. სოფო ჟღენტი ონლაინსამსახურის დებულების შეცვლას მიიჩნევს „რეორგანიზაციას რეორგანიზაციის გარეშე“ და გადაწყვეტილების გასაჩივრებას აპირებს.
„გამომიგზავნეს განცხადება, რომლის მიხედვითაც, ნინო ხაჟომია სთხოვდა დირექტორს, აეყვანათ ახალი ამბების სამსახურში ონლაინრედაქტორის პოზიციაზე. რადგან ასეთი პოზიცია მაუწყებელში აქამდე არ არსებობდა, სტრუქტურის მიხედვით კი, ონლაინსამსახურის რედაქტორი ჩემს სამსახურში შედიოდა, დავუკავშირდი დირექტორის თანაშემწეს, ნათია გოგიჩაიშვილს. მითხრა, რომ ასეთი პოზიცია გაჩნდა, რადგან საინფორმაციო სამსახურის ახალი დებულება შეიქმნა. მან ასევე მითხრა, რომ ონლაინსამსახურის დებულებაში შევიდა “მცირედი” ცვლილებები.
ბუნებრივია, ვიკითხე, როგორ შეცვალეს ჩემი სამსახურის დებულება ჩემ გარეშე, რაზეც ნათია გოგიჩაიშვილმა მიპასუხა, რომ ეს დირექტორის დისკრეციული უფლებამოსილებაა. მხოლოდ მეორე დღეს გადმომიგზავნეს დებულება, სადაც აღმოვაჩინე, რომ ამ “მცირედი” ცვლილებებით ჩემს სამსახურს მთლიანად ჩამოერთვა ახალი ამბების წარმოების ფუნქცია და მხოლოდ გადაცემებისა და შექმნილი პროდუქტების სოციალური მენეჯერის ფუნქცია დარჩა. ხელშეკრულების შეცვლის თაობაზე არც მე და არც ჩემს თანამშრომლებს არ დაგვკავშირებია არავინ,“ – ამბობს სოფო ჟღენტი აჭარის ტელევიზიასთან.
სოფო ჟღენტი ამბობს, რომ ტელევიზიის დირექტორმა ამ გზით აარიდა თავი რეორგანიზაციას, რომელსაც მრჩეველთა საბჭოს ხუთი წევრიდან ოთხის თანხმობა სჭირდებოდა.
„მიზანი იყო ის, რომ მე არ ვყოფილიყავი ახალი ამბების შემქმნელი და დამიტოვეს სოცმენეჯერის ფუნქციები, თუმცა ხელშეკრულება ჯერ შეცვლილი არ არის. ვნახოთ, როგორ განვითარდება პროცესი,“ – დასძენს სოფო ჟღენტი.
აჭარის ტელევიზიის ონლაინსამსახურის უფროსის შეფასებით, აჭარის ტელევიზიას უკვე დაეტყო სარედაქციო პოლიტიკის შეცვლა, რომლის დამოუკიდებლობას აქამდე კონკრეტული ადამიანები უზრუნველყოფდნენ და რომლებიც ტელევიზიის მენეჯმენტმა ეტაპობრივად ჩამოიშორა.
„ეს საინფორმაციო პოლიტიკა, რაც იყო დაბალანსებული და აღიარებული მეტ-ნაკლებად ამ პოლარიზებულ გარემოში, იცვლება და საითკენ იცვლება, ამას დიდი მიხვედრა არ სჭირდება. ბოლო კვირას საინფორმაციოს 8 საათის გამოშვებაში ერთმანეთს თორნიკე რიჟვაძე და დავით გაბაიძე ენაცვლებიან და საუბრობენ იმაზე, როგორ ჩარიცხავენ ხელფასის ნაწილს ფონდში…“ – აღნიშნა სოფო ჟღენტმა „ბათუმელებთან“.
მანამდე აჭარის ტელევიზიის დირექტორმა საინფორმაციო სამსახურის ჟურნალისტი თეონა ხარაბაძე ქუთაისის ბიუროში გაამწესა, რედაქტორი – მაია მერკვილაძეს, რომელსაც იგი საჯაროდ საუკეთესოდ მიიჩნევდა, არარსებული გადაცემა ჩააბარა. ტელევიზიის დირექტორმა სამეურვეო საბჭოს უმრავლესობის პრაქტიკული მხარდაჭერით საინფორმაციო სამსახურს ჩამოაშორა თეონა ბაკურიძე, რომელსაც მთავარი საინფორმაციო გამოშვება მიჰყავდა, მის ნაცვლად კი დანიშნეს აჭარის გზების დეპარტამენტის საზოგადოებასთან ურთიერთობის სამსახურის თანამშრომელი. საინფორმაციოს ჩამოაშორეს ამ სამსახურის უფროსი – შორენა ღლონტი, ასევე ნათია ზოიძე, რომელიც დირექტორის მოადგილე იყო და დირექტორმა მხოლოდ ანგარიშების წერის ფუნქცია დაუტოვა და რედაქტორი ნათია შავაძე.
პანდემიის მიზეზით გააჩერეს კრიტიკული გადაცემა „ჰეშთეგი“.
აჭარის ტელევიზიის საინფორმაციო სამსახურს მალე ახალი უფროსი ეყოლება – გამოცხადებულ კონკურსში განცხადება მხოლოდ ვახო ხუზმიაშვილმა შეიტანა, რომელიც ცოტა ხნის წინ დანიშნეს ტელევიზიის დირექტორის მოადგილედ და ერთ-ერთი გადაცემის წამყვანად. მას ტელევიზიის მიერ დაკომპლექტებული კომისია უახლოეს დღეებში გაესაუბრება.
აჭარის ტელევიზიიდან გათავისუფლებულმა თანამშრომლებმა სასამართლოს უკვე მიმართეს. სხვადასხვა ორგანიზაცია, მათ შორის, საერთაშორისო ორგანიზაცია, „რეპორტიორები საზღვრებს გარეშე“ აჭარის ტელევიზიაში მიმდინარე პროცესს პოლიტიკურ ზეწოლად აფასებს.
ამ თემაზე:
