უმაღლესი საბჭოს ხარჯები 2020 წლისთვის 170 ათასი ლარით გაიზრდება – პროექტი


აჭარის უმაღლესი საბჭოს 2020 წლის ბიუჯეტი 5 216 800 ლარით განისაზღვრა, რაც მიმდინარე წლის გეგმით გათვალისწინებულ თანხაზე 170 ათასი ლარით მეტია. უმაღლესი საბჭოს 2020 წლის ბიუჯეტის პროექტი საბჭომ უკვე დაამტკიცა.

აღნიშნული თანხა გათვალისწინებული უნდა იქნეს „აჭარის 2020 წლის რესპუბლიკური ბიუჯეტის შესახებ“ კანონის პროექტში. აჭარის რესპუბლიკურ ბიუჯეტს კი, საბოლოოდ, თავად უმაღლესი საბჭო ამტკიცებს.

უმაღლესი საბჭოს შესაბამისი დადგენილებით, 2020 წლისთვის საბჭოში მომუშავეთა რიცხვი არ იცვლება და ის კვლავ 117 საშტატო ერთეულითაა განსაზღვრული.

რაც შეეხება ხარჯებს. აჭარის 2019 წლის ბიუჯეტის მიხედვით, რეგიონის საკანონმდებლო ორგანოს ხარჯებისთვის 5 006 800 ლარია განსაზღვრული. 2020 წლისთვის კი, ეს თანხა 170 ათასი ლარით იზრდება და 5 176 800 ლარი იქნება.

უმაღლესმა საბჭომ ამ ეტაპზე უცვლელი დატოვა შრომის ანაზღაურებისთვის გათვალისწინებული თანხის ოდენობა. საერთო ხარჯიდან 2020 წელს [ისევე როგორც 2019 წელს] უშუალოდ ხელფასებისთვის 3 433 200 ლარია გათვალისწინებული.

უმაღლესი საბჭოს დადგენილება „აჭარის ავტონომიური რესპუბლიკის უმაღლესი საბჭოს 2020 წლის ბიუჯეტის პროექტის დამტკიცების შესახებ“ 2019 წლის 11 ივნისიდან ამოქმედდა.

 

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com