„სულ უნდა იყო გამოსავლის ძიებაში, ყველაფერი უნდა სცადო და ბოლოს აუცილებლად გაგიმართლებს“


მიხეილ პაპუნიძემ რამდენიმე დღის წინ სკოლის წარმატებით დასრულებისთვის ოქროს მედალი მიიღო. მან სკოლა შარშან დაასრულა, თუმცა მედალი წელს გადასცეს. 19 წლის მიხეილი უკვე პირველი კურსის სტუდენტია და ბათუმის რუსთაველის უნივერსიტეტში, ზუსტ მეცნიერებათა ფაკულტეტზე, კომპიუტერულ მეცნიერებებს სწავლობს.

მიხეილ პაპუნიძე შვიდი წელია რაც ეტლით მოსარგებლეა. მიუხედავად იმისა, რომ საჯარო სკოლაში, სადაც ის სწავლობდა, ინფრასტრუქტურა ადაპტირებული არ იყო, საგაკვეთილო პროცესზე დასწრებას თითქმის ყოველთვის ახერხებდა.

მიშას აზრით, განათლება ცხოვრებაში ძალიან მნიშვნელოვანია, რადგან განათლება აძლევს ადამიანს შესაძლებლობას იყოს უფრო მეტად დამოუკიდებელი, თავისუფალი და ჰქონდეს საკუთარი აზრი, შეხედულებები ყველაფერზე.

„ჩემთვის ოქროს მედალი განსაკუთრებული არ არის. უბრალოდ მედალია, მაგრამ მაინც სასიამოვნოა, როცა გაძლევენ. განათლება რომ არა, ვერ ვიქნებოდი ასეთი მებრძოლი და მიზანდასახული“, – გვეუბნება ის.

მიშას აზრით, ძალიან მნიშვნელოვანია ოჯახის წევრების და მეგობრების თანადგომა. „ეს რომ არა, შეიძლება უნივერსიტეტშიც ვერ მესწავლა“, – გვეუბნება ის.

ეტლით მოსარგებლე, ოქროსმედალოსანი სტუდენტი

„განათლება გეხმარებაში იმაში, რომ გქონდეს საკუთარი აზრი ყველაფერზე და არ იყო სხვებზე დამოკიდებული“- ასე ფიქრობს, 19 წლის მიხეილ პაპუნიძე, ზუსტ მეცნიერებათა ფაკულტეტის სტუდენტი, რომელსაც წელს სკოლის წარმატებით დასრულებისთვის ოქროს მედალი გადასცეს. მიხეილის აზრით, მედლის მიღება სასიამოვნოა, თუმცა ცხოვრებაში უფრო მნიშვნელოვანი განათლებაა. „ცხოვრებაში ყველა პრობლემა გამოწვეულია იმით რომ განათლების ნაკლებობაა“- ამბობს მიშა. მიუხედავად იმისა რომ არც სკოლა და არც ქალაქის ინფრასტრუქტურა შშმ პირებისთვის ადაპტირებული არ არის, მას არ შეუწყვეტია ბრძოლა განათლებისთვის.

Posted by ბათუმელები • Batumelebi.ge on შაბათი, 01 ივნისი, 2019

 

მიშას ქალაქში გადაადგილება დამოუკიდებლად არ შეუძლია, რადგან ქალაქის ინფრასტრუქტურა არ არის კარგად ადაპტირებული შშმ პირებისთვის, ამიტომ უნივერსიტეტში დილით მამა აცილებს, წამოსვლის დროს კი დედა ეხმარება.

წინააღმდეგობების მიუხედავად, მიშა ამბობს, რომ სწავლა ცხოვრებაში გადამწყვეტია. „პროგრამირებას ვსწავლობ და ჩემთვის ეს მოსახერხებელია, რადგან ამ პროფესიით სახლიდან მუშაობაც შემიძლია. მთავარია, იყო პროფესიონალი და სამუშაოც გამოჩნდება“, – გვეუბნება ის.

მიშა პაპუნიძეს 70 პროცენტიანი გრანტი აქვს, თუმცა ფიქრობს, რომ შესაძლოა მიიღოს დანარჩენი დაფინანსებაც და ამისთვის კარგად სწავლობს. „მომავალ სემესტრში გავაკეთებ დაფინანსებაზე განცხადებას და ვნახოთ“.

მიშა ამბობს, რომ სამი და ჰყავს და სამივე ოქროსმედალოსანია. „როცა ვხედავდი, რომ ოჯახში ყველა სწავლობდა, ალბათ ამანაც მოახდინა გავლენა. მეც კარგად ვსწავლობდი, ბოლო წელს დამჭირდა მომზადება მხოლოდ რუსულში და ფიზიკაში. ჩემს მდგომარეობაში ბევრი ფიქრობს, რომ „არაფერი არ გამოვა“, მაგრამ სულ უნდა იყო გამოსავლის ძიებაში, ყველაფერი უნდა სცადო და ბოლოს აუცილებლად გაგიმართლებს“, – გვეუბნება ის.

მიხეილ პაპუნიძე გვეუბნება, რომ ბაკალავრიატის დასრულების შემდეგ, სწავლის გაგრძელება სურს, თუმცა ამბობს, რომ მოვლენებს წინ არ გაუსწრებს. „ყველაფერი გამოვა“, – გვეუბნება ის.

მიხეილ პაპუნიძე, ზუსტ მეცნიერებათა ფაკულტეტის სტუდენტი

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com