განათლება,მთავარი,სიახლეები

65 წლის მასწავლებელი, რომელმაც სკოლის დატოვებას გამოცდაზე გასვლა არჩია

31.05.2019 • 5985
65 წლის მასწავლებელი, რომელმაც სკოლის დატოვებას გამოცდაზე გასვლა არჩია

65 წლის ეთერ დუმბაძე ხელვაჩაურის მუნიციპალიტეტის კირნათის საჯარო სკოლის დაწყებითი განათლების პრაქტიკოსი პედაგოგია. ის საგნობრივი კომპეტენციის დამადასტურებელ გამოცდაზე წელს პირველად დარეგისტრირდა. სახელმწიფო პრაქტიკოს პენსიონერ პედაგოგებს ჯილდოს სთავაზობს. თუ პედაგოგი საგნობრივ კომპეტენციას არ დაადასტურებს, მისი ადგილი ვაკანტურად გამოცხადდება. რატომ გადაწყვიტა საგნობრივი გამოცდის ჩაბარება – გთავაზობთ ბლიც-ინტერიუს ეთერ დუმბაძესთან.

  • ქალბატონო ეთერ, რა იყო მთავარი მოტივი თქვენთვის, როცა ამდენი წლის შემდეგ სწორედ ახლა დარეგისტრირდით საგნობრივ გამოცდაზე, მაშინ როცა სახელმწიფო სკოლიდან წასვლის სანაცვლოდ ჯილდოს გთავაზობთ?

ალბათ, პედაგოგად დავიბადე. ასე ვფიქრობ, ძალიან მიჭირს სკოლის მიტოვება, ეს ჩემთვის სენსიტიური თემაა. 65 წლის ვარ, ენერგიაც მაქვს, მინდა საკუთარ თავთან ვიყო მართალი, მინდა დავრწმუნდე, რომ ნამდვილად შემეძლო. ამიტომ გადავწყვიტე გამოცდის ჩაბარება.

  • აქამდე რატომ არ ჩააბარეთ, რა გაკავებდათ?

იცით, პენსიონერ პედაგოგებზე სულ ნეგატიურ კონტექსტში იყო საუბარი. სულ სკოლიდან გაშვების მოლოდინი გვქონდა, რაც არ მაძლევდა მოტივაციას. ვფიქრობდი, სანამ მამუშავებენ, ვიმუშავებ-მეთქი. ჯილდოს ინიციატივა მომეწონა, მაგრამ ისიც ითქვა, რომ გვაქვს უფლება დავრჩეთ. ეს იყო მთავარი მოტივაცია, რომ კიდევ ერთხელ მომესინჯა გამოცდაზე ძალები.

  • რამდენი წელია, რაც სკოლაში ასწავლით?

უნივერსიტეტი 1976 წელს დავამთავრე და მეორე წელს ამ სკოლაში დავიწყე მუშაობა. მე ქალაქში დავიბადე და გავიზარდე, სკოლაც და უნივერსიტეტიც ქალაქში დავამთავრე, თუმცა მასწავლებლად სოფელში წამოვედი. მას შემდეგ, ამ სკოლაში ვმუშაობ. მე მომხრე ვარ იმის, რომ ახალგაზრდებს ადგილი უნდა დავუთმოთ. მეც ხომ ახალგაზრდა შემოვედი სკოლაში? პენსიონერი უნდა წავიდეს სახლში, მაგრამ ვერ მივდიოდით, რადგან ყოფითი პრობლემები ხომ იცით, პენსია რომ მაღალი იყოს, წავიდოდით, ყველა წავიდოდა, მაგრამ როცა იცი, რომ შეიძლება წამალი ვერ იყიდო, ექიმთან ვერ მიხვიდე, ეს ძალიან რთულია.

  • თუმცა იყო ბევრად უფრო რთული წლები, მაშინ რას ფიქრობდით ამაზე?

12 მილიონ კუპონს ვიღებდი. მაშინ ამ ფულით ერთ პურს ვერ იყიდდი. ახლა პურს მაინც ვყიდულობთ და ეს კარგია. სამი შვილი მყავდა, თუმცა სკოლის მიტოვება მაინც არ მიფიქრია. მქონდა მოლოდინი, რომ პენსიას გაზრდიდა სახელმწიფო და ღირსეულად წავიდოდით. 16 საათი მაქვს, ხელზე 450 ლარამდე ვიღებ, არც ეს არის ბევრი, მაგრამ ხელფასისთვის არასდროს მიმუშავია.

  • გიფიქრიათ იმაზე, რაში დახარჯავთ ჯილდოს იმ შემთხვევაში, თუკი სკოლიდან წასვლას მაინც გადაწყვეტთ?

ბავშვობიდან ვოცნებობდი, რომ იტალია, რომი, ვენეცია მენახა. სტამბულში აია სოფია მინდა ვნახო, ერმიტაჟი…  არ ვიცი, ავისულებ თუ არა, ალბათ ისევ ოცნებად დარჩება, რადგან ცხოვრებაში სხვა მოთხოვნებიცაა.

  • ანუ, თავს არ მისცემთ უფლებას, ჯილდო საკუთარი ოცნებებისთვის დახარჯოთ?

ვინ დამიშლის, როგორ არა, მაგრამ … შვილიშვილებსაც გავუნაწილებ ალბათ, რამეს გავაკეთებ, ცხოვრებაში ბევრი საჭიროებაა.  ჩემი მეუღლეც პენსიონერია, გადაწყვიტა სკოლიდან წამოვიდეს. სპორტის მასწავლებელია. ჯერ არ აქვს გადაწყვეტილი რაში გამოიყენებს თავის ჯილდოს, იმდენად მოულოდნელი იყო, რომ ჯერ ისევ ფიქრობს.

ვფიქრობ, სახელმწიფო მაინც სწორად მოიქცა, პენსიონერები რაღაცაში გამოიყენებენ ამ თანხას? – იმისთვის, რომ მშვიდი სიბერე მაინც ჰქონდეთ.

  • როგორ ფიქრობთ, ახალგაზრდები დაინტერესდებიან ამ პროფესიით?

მე პედაგოგობა ჩემმა ქართულის მასწავლებელმა გადამაწყვეტინა. ძალიან გვიყვარდა. მეც ვუჩიჩინებდი ჩემს გოგონებს, რომ მასწავლებლები გამხდარიყვნენ. ერთი სკოლაში მუშაობს, მეორემ სხვა სფერო აირჩია, მაგრამ ზოგჯერ მაინც ნატრობს, ნეტა სკოლაში მემუშავაო. გული მწყდება, რომ მასწავლებლობა დღეს პრესტიჟული პროფესია არ არის, მაგრამ დროთა განმავლობაში ალბათ ინტერესი ახალგაზრდებშიც გაჩნდება.

  • თუ გამოცდის შედეგით კმაყოფილი იქნებით და აიმაღლებთ სტატუსს, დარჩებით სკოლაში?

ახლა მხოლოდ გამოცდაზე ვარ ორიენტირებული, სხვა ვერაფერზე ვფიქრობ. დაგვპირდნენ, რომ გამოცდისთვის უფასოდ გადაგვამზადებენ, ხელს შეგვიწყობენ. ადრეც ვფიქრობდი სკოლიდან წასვლაზე, მაგრამ მაინც ვერ წავედი, ვნახოთ.

ამავე თემაზე:

მიიღებს პედაგოგი ზაფხულის ხელფასს, თუ განაცხადს ჯილდოზე მაისში გააკეთებს

გადაბეჭდვის წესი


ასევე: