უნდა ჰქონდეს თუ არა კომერციული რეკლამა საზოგადოებრივ მაუწყებელს, როცა ის ბიუჯეტიდან ყოველწლიურად ფინანსდება? – ამ შეკითხვას საკონსტიტუციო სასამართლომ უნდა უპასუხოს, სადაც სარჩელის განხილვა დღეს, 23 მაისს, დაიწყო.
„ეს არის შეუსაბამო, როცა ერთი კონკრეტული სუბიექტი იღებს ბიუჯეტიდან მსხვილ ფინანსურ დახმარებას და დანარჩენი მაუწყებლები არ არიან კონკურენტულ გარემოში… მაგალითად, 2017 წელს საზოგადოებრივმა მაუწყებელმა მარტო ბიუჯეტიდან მიიღო 50 მილიონზე მეტი, სხვა დანარჩენმა 98-მა არხმა კი ჯამში 89 მილიონი…“ – ამბობს თენგიზ ომანაძე, მოსარჩელეების ინტერესების დამცველი.
სარჩელის ავტორები მიიჩნევენ, რომ ეს მიდგომა არღვევს კონსტიტუციით გარანტირებულ თავისუფალი მეწარმეობის განვითარების უფლებას, ასევე თანასწორობას.
„ეს მიდგომა სრულად მოდის შესაბამისობაში საქართველოს კონსტიტუციასთან,“ – არ ეთანხმება მოსარჩელეებს პარლამენტის იურისტი, ქრისტინე კუპრავა. მან კომუნიკაციების ეროვნული კომისიის მონაცემებისკენ მიგვითითა, სადაც აღნიშნულია, რომ საზოგადოებრივი მაუწყებლის კომერციული რეკლამის შემოსავლებს არ მოუმატია 2018 წელს კანონში შესული ცვლილებების შემდეგ.
„აღნიშნული ცვლილებები შეფასდა დადებითად ევროპის სამაუწყებლო კავშირის მიერ, ასევე ევროპის საბჭოს მიერ. მოცემული კანონმდებლობა სრულად შეესაბამება საერთაშორისო სტანდარტებს,“ – გვითხრა ქრისტინე კუპრავამ.
სარჩელი სასამართლოში ორგანიზაციამ „ჟურნალისტები და იურისტები დემოკრატიის და ადამიანის უფლებებისთვის“ და ტელეკომპანია „თრიალეთმა“ შეიტანეს. დღევანადელ პროცესზე მოსამართლეები საზოგადოებრივი მაუწყებლის სარეკლამოს და იურიდიული სამსახურების უფროსების პოზიციებსაც მოისმენს.
გასაჩივრებულია „მაუწყებლობის შესახებ“ კანონი, რომლის მიხედვითაც საზოგადოებრივ მაუწყებელს ეთერში კომერციული რეკლამის განთავსების უფლება აქვს სპორტული რეპორტაჟების, საერთაშორისო ფესტივალების და კონკურსების დროს.
იურისტი თენგიზ ომანაძე მიიჩნევს, რომ სადავო ნორმა ბიუჯეტიდან დაფინანსებულ საზოგადოებრივ მაუწყებელს პრივილეგირებულ მდგომარეობაში აყენებს.
„ყველაზე ყურებადი რაც არის, იქ აქვთ რეკლამის განთავსების უფლება… მათ შორის, მსოფლიო ჩემპიონატებზე, რაზეც ექსკლუზივი აქვს საზოგადოებრივ მაუწყებელს,“- დასძენს თენგიზ ომანაძე.
რა ოდენობის სარეკლამო შემოსავლები მიიღო საზოგადოებრივმა მაუწყებელმა მსოფლიო ჩემპიონატის დროს, რა პირობებით და რა ხელშეკრულებებით – ეს საჯარო ინფორმაცია სრული სახით „ბათუმელებმა“ საზოგადოებრივი მაუწყებლისგან ვერ მიიღო. „ბათუმელები“ მაუწყებლისგან ამ ინფორმაციის მიღებას უკვე სასამართლოში ცდილობს.
