მოქალაქეების თხოვნა ჟურნალისტებს: აკონტროლეთ შესრულებული სამუშაოს ხარისხი


ქედის მუნიციპალიტეტის  სოფელ ხარაულაში  „თავისუფალ ჟურნალისტთა სახლის“ ორგანიზებით გამართულ შეხვედრას  მედიის  წარმომადგენლები ესწრებოდნენ. მოქალაქეებმა აჭარის  ტელევიზიისა და „გაზეთ  ბათუმელების“ წარმომადგენლებს თავიანთ სოფელში არსებული პრობლემები და  მოსაზრებები გააცნეს.

ადგილობრივებმა პრობლემებზე საუბრისას, პირველ  რიგში, სხვადასხვა პროექტის ფარგლებში  შესრულებული სამუშაოების ხარისხი გამოყვეს. მაგალითისთვის მათ გზის მოწესრიგება დაასახელეს. მათ  მედიის  წარმომადგენლებს სთხოვეს, მეტად ადევნონ  თვალი ამ პროცესს – რამდენად  ხარისხიანად სრულდება ესა თუ  ის სამუშაო სოფლებში.

ზაურ ხარაძე, ადგილობრივი მცხოვრები: ჩვენს სოფელში გზის პრობლემაა. იყო რაღაც პროექტი, განხორციელდა სამუშაოები, მაგრამ მთავარია, რასაც აკეთებენ, ხარისხიანი  იყოს, გაძლოს სამი წელი მაინც. ასევე გვაქვს  წყლის პრობლემა, ავზი გააკეთეს, თუმცა უხარისხოდ.

მარი ტაკიძე, „საზოგადოებრივი მაუწყებლის აჭარის ტელევიზია და  რადიო“,  გადაცემა  „ჰეშთეგის“ წამყვანი: ჩვენი მთავარი მიზანია, ერთი მხრივ, მოსახლეობის ინფორმირება და მეორე მხრივ, მაუწყებელი არის ის სივრცე, სადაც თქვენ შეგიძლიათ გააჟღეროთ თქვენი პრობლემები, ყოველდღიური გამოწვევები. ეს შეიძლება იყოს სოფლის კლუბი, სადაც იკრიბებით ყოველდღიურად, მაგრამ საღამოს შეიძლება ვერ შეიკრიბოთ იმის გამო, რომ შუქი არ არის. მოკლედ, ჩვენი მაუწყებელი არის ფოკუსირებული ადამიანებზე და მათ გამოწვევებზე, მიუხედავად იმისა, სად ცხოვრობენ, რომელ რელიგიურ მიმდინარეობას მიეკუთვნებიან და ა.შ.

ნათელა ფარტენაძე, ადგილობრივი მცხოვრები:  სასმელი წყალი ეზოში ყველას  გვაქვს, მაგრამ, რადგან დაკავშირებული ვართ ბახჩა-ბოსტანთან, სარწყავი წლის საჭიროებაც არის. თუ ამდენი თანხა იხარჯება, სად არის გაკეთებული, ვინმემ ხომ უნდა შეამოწმოს? ამ კლუბში, სადაც ვიმყოფებით,  არ არის შუქი, არც გაზი და წყალი. არანაირი გასართობი საშუალება არ არსებობს. გვინდა ვინმემ მოგვაქციოს ყურადღება.

მურმან  ზაქარაძე: სოფელში პატარა ჩანჩქერი გვაქვს, მაგრამ ერთ თვეში აღარ იქნება. არ გვაქვს სველი წერტილები. წყლის რესურსი რაც არის, ვცდილობთ, სკოლას მოვახმაროთ, რომ იქ მაინც იყოს წყალი. ჩემი სურვილია, რომ მედიამ გააშუქოს ნებისმიერი შესრულებული სამუშაოს ხარისხი, იქნება ეს მინიპროექტი თუ სხვა.

ზაურ ხარაძე: სახელმწიფომ უნდა იზრუნოს, რომ მოქალაქეები ადგილობრივად დაასაქმოს და ქვეყნიდან გასვლა არ მოუწიოთ. იქაც რთულ პირობებში უწევთ მუშაობა. დილის 6 საათიდან 8 საათამდე მუშაობენ უცხო ქვეყანაში. ხალხი მიეჩვია დღიურ შემოსავალს და საკუთარი გვერდზე რჩება. სკოლებიც ცარიელდება. მიგრაციაა სოფლებში. ადრე 300 მოსწავლე სწავლობდა, დღეს 77 მოსწავლე სწავლობს ჩვენს სკოლაში.

ნაზი ზოსიძე, „გაზეთი ბათუმელები“: რამდენი მოსწავლე ამთავრებს წელს სკოლას და რამდენს სურს სწავლის გაგრძელება უმაღლეს სასწავლებლებში?

მურმან ზაქარაძე, ადგილობრივი მცხოვრები:   წელს მხოლოდ 9 მეთორმეტეკლასელი  გვყავს.  შემდეგ კლასებში კიდევ უფრო იკლებს რაოდენობა. ველოდები, რომ 5-6 აუცილებლად ჩააბარებს. სამინისტროც ეხმარება მაღალმთიანის სტატუსის მქონე ახალგაზრდებს, რაც ძალიან კარგია.  სწავლის საფასურისგან თავისუფლდებიან და ქალაქში აბარებენ. ძირითადად ეს ახალგაზრდები სკოლის ბაზაზე ემზადებიან, არ ჰყავთ დამატებითი რეპეტიტორები.

მარი ტაკიძე, „საზოგადოებრივი მაუწყებლის აჭარის  ტელევიზია და  რადიო“,  გადაცემა  „ჰეშთეგი“: თქვენ რაში ხედავთ სოფლის განვითარების პერსპექტივას და რა გინდათ, რომ გაკეთდეს?

მურმან ზაქარაძე, ადგილობრივი მცხოვრები:  კარგი იქნება, თუ შესყიდვის მიკროპუნქტებს შექმნიან. ასე გლეხს აღარ მოუწევს მიღებული პროდუქტის ქალაქში ჩატანა და ჩაბარება. ქედაში არის საწარმო,  მაგრამ ქედამდეც გვჭირდება ტრანსპორტირება. კარგი იქნება, თუ აქ, ადგილზე, იქნება ჩაბარება. მაგალითად, 100 კილოგრამი ტყემალი რომ ჩააბარო ქალაქში, სადღაც 50 ლარი გამოდის და ტრანსპორტირება ითვისებს ამ თანხასაც. სოფლიდან ქალაქში და უკან  მგზავრობა 10 ლარი ჯდება.

მურმან  ზაქარაძე, ადგილობრივი  მცხოვრები: აქ რომ მოსახლეობა გაჩერდეს, ხელი უნდა შევუწყოთ თამბაქოს მოყვანას და რეალიზაციას. სხვა ისეთი არაფერი მოდის, რომ გაყიდო, ნიადაგი არ არის ნოყიერი.

ზაურ  ხარაძე: ჩემი შვილი მეუბნებოდა, რომ პროექტი დავწეროთ და სათბური გავაკეთოთო.  ჩვენთან არ არის ისეთი პირობები, რომ სათბურმა იმუშაოს. შეიძლება ნოემბერ-ოქტომბერში ჩამოთოვოს. საოჯახო ტიპის სასტუმროს აშენება უფრო მარტივია ამ პირობებში. ტურისტული მარშრუტის არარსებობის გამო ჩვენთან არ არის ასეთი სასტუმროები. ჩვენ ტრადიციული მეთოდებით ვაწარმოებთ ბოსტნეულსაც, მაგრამ ვეღარ მოგვყავს. შესაწამლი პრეპარატები უკონტროლოდ იყიდება და ყველგან ხელმისაწვდომია. არავინ კითხულობს, რამდენად ხარისხიანია. მაგალითად, ვიყიდე შაბიამანი და არ გამოდგა. გაფუჭდა პომიდორი. ვის უნდა მოვთხოვო პასუხი? ბოლოს ისევ ხელისუფლებასთან მივდივართ.

______

შეხვედრას  არ  ესწრებოდნენ  ახალგაზრდები, მიზეზი,  ისევე, როგორც  სხვა  არაერთ  სოფელში, ერთია –  ყველა თურქეთშია სამუშაოდ.  როგორც  ადგილობრივი  ნათელა  ფარტენაძე  ამბობს,  სოფელი  ხარაულაც  ცარიელდება ზაფხულში.

კიდევ  ერთი  პრობლემა, რაც აქ მცხოვრებლებს  აწუხებთ, სოფლებში – ხარაულასა და  უჩამბაში შიდა სასოფლო გზების დამცავი კედლების ჩამოსხმაზე მომუშავე მშენებლების უხელფასოდ დატოვებაა. აღნიშნულ საკითხზე  ვრცელ სტატიას  შეგიძლიათ  გაეცნოთ აქ: (http://batumelebi.netgazeti.ge/news/201514/)

სოფელ ხარაულას საჯარო სკოლაში სამუზეუმო ექსპონატებიც აქვთ შენახული, რომელთათვის ცალკე სივრცის მოწყობა და მათი ტურისტულ ღირსშესანიშნაობად  გამოყოფა სურთ.

დისკუსიის  ვიდეოჩანაწერი:  https://www.facebook.com/media.org.ge/videos/874132242939315/

_______

დისკუსიათა ციკლი „მედია და საზოგადოება“ იმართება „სიტყვის თავისუფლების მხარდაჭერის“ პროექტის ფარგლებში, ამერიკული ფონდის „ეროვნული წვლილი დემოკრატიისთვის“ [NED] დაფინანსებით.

ნეტგაზეთის მასალების სხვა გამოცემებში გადაბეჭდვის წესი
ავტორი
გაზეთი "ბათუმელები" გამოდის 2001 წლიდან.