„ბებიას უთხრეს, რომ გეი ვარ და მომკლავენ“


„ბებიას უთხრეს, რომ გეი ვარ და მომკლავენ. ამოათრიე აქ და ლინჩის წესით გავასამართლებთო…“ – ამბობს ბათუმში მცხოვრები ივა ყურშუბაძე. ივას თქმით, სოფელ ჩაისუბანში მარტოდ მცხოვრებ მის ბებიას შვილიშვილის ფიზიკური განადგურებით ახლობლები 18 მაისს დაემუქრნენ. 17 მაისს სოფელში „აჭარის ტელევიზიის“ გადაცემა „ჰეშთეგი“ ნახეს, სადაც ივა ჰომოფობიის წინააღმდეგ ბრძოლაზე და თანასწორობაზე საუბრობდა.

„მუქარის გარდა, ბებიას სიტყვიერი შეურაცხყოფაც მიაყენეს… განსაკუთრებით ბებიას ძმისშვილი აქტიურობდა, როგორც მითხრეს. ამ დრომდე გრძელდება ჩემი ბულინგი სოციალურ ქსელში, მლანძღავენ და მემუქრებიან, ჭკუას გასწავლით და საგიჟეში წაგიყვანთო. ამიტომ პროკურატურას განცხადებით უკვე მივმართე.“ – გვიყვება ივა ყურშუბაძე, – „შეშინებული ვარ, რაადგნ საფრთხე ელოდება საჯარო სივრცეში ჩემს თავისუფლად გადაადგილებას… ბებიას მასაუბრეს. მითხრა, შენთან ვარო. მე მოვუსმინე იმ ვიდეოს და შენ თურმე ჩაგრულებს იცავ და სიმართლის მხარეს დგახარო. აქ კი მთელი სოფელი შემიყარესო“.

ივას დედ-მამა სხვა ქვეყანაში ცხოვრობს. ივა ამბობს, რომ ნათესავმა ქალმა ამ ამბის შემდეგ თურქეთში მის დედასაც მისწერა, კაცები არ გყოლიათ საგვარეულოში, მე ჩავალ ბათუმში და ვასწავლი მაგას ჭკუასო.

მთავარი ფოტო: ივა ყურშუბაძის ფეისბუქგვერდიდან

 

ნეტგაზეთის მასალების სხვა გამოცემებში გადაბეჭდვის წესი
ავტორი