მოვაჭრეები: მოვიდეს ბათუმის მერი და საკუთარი თვალით ნახოს, რაც აქ ხდება


ბათუმელი გარემოვაჭრეები, რომლებიც მერიამ წერეთლის ქუჩიდან ავტოსადგურის შენობაში გადაიყვანა, პირობებით უკმაყოფილონი არიან. დღეს, 21 მაისს, ისინი მერიის წარმომადგენელს შეხვდნენ და სავაჭრო ადგილის შეცვლა მოითხოვეს. მოვაჭრეები ამბობენ, რომ ავტოსადგურის ტერიტორიაზე აგებულ სავაჭრო ცენტრში მყიდველი არ შედის, რის გამოც შემოსავლის გარეშე დარჩნენ.

ერთ-ერთი მოვაჭრე, ლია შაინიძე „ბათუმელებთან“ ამბობს, რომ ისინი მერთან შეხვედრას და პირობების შეცვლას მოითხოვენ.

„ვითხოვთ მერთან შეხვედრას, იქნებ უკეთესი გამოსავალი მოძებნოს. მოვიდეს და ნახოს, რომ აქ მყიდველი არ შემოდის. მუშაობა არ არის, როდემდე ვიქნებით ასე.

მოვაჭრეები ბათუმის მერთან შეხვედრას მოითხოვენ. მათი თქმით, ავტოსადგურის ტერიტორიაზე მყიდველი არ შედის.

კლიენტი არ შემოდის, რადგან მიუდგომელი ადგილია, დახურულია სივრცე. ერთი მხრიდან სამშენებლო მასალები გვადგას, მეორე კუთხიდან – მიკროავტობუსები და არც ჩანს გარედან. არ გაამართლა ამ ადგილმა,“ – გვეუბნება ის.

ლია შაინიძე ამბობს, რომ თავდაპირველად შეთანხმება იყო იმაზე, რომ გარემოვაჭრეებს დაუთმობდნენ წინა ხედს რკინიგზის მხრიდან, სადაც განთავსდებოდა მოვაჭრეებისთვის ჯიხურები.

„შემდეგ არ ვიცი, რატომ მოგვცეს უკანა მხარე სამშენებლო მასალების ტერიტორიაზე. გამოდის, საწყობში ვზივართ. ავტოსადგურის წინა მხარეს თუ დავსხდებით, ხალხი დაგვინახავს და ვაჭრობაც იქნება.“

ერთ-ერთი მოვაჭრე აქციის დროს შეუძლოდ გახდა.

ავტოსადგურის ტერიტორიაზე მერიის მიერ მომზადებული სიის მიხედვით, 104 მოვაჭრეა, თუმცა, როგორც ლია შაინიძემ გვითხრა, ადგილზე მხოლოდ 20 მოვაჭრეა. „იძულებული არიან ქუჩა-ქუჩა იარონ, რომ საღამოს პურის ფული მიიტანონ. ჩვენ გვინდა კანონმორჩილი ვიყოთ, თუმცა არ გვინდა მშიერი დაგვირჩეს ოჯახი,“ – გვეუბნება ლია შაინიძე.

ლია შაინიძე ამბობს, რომ თუ მერია პირობებს არ შეცვლის, იძულებული იქნებიან, პერმანენტული აქციები დაიწყონ.

სადგურის ტერიტორიაზე გადასვლის შემდეგ გარემოვაჭრეებმა აქცია ორ მაისს გამართეს. ბათუმის მერიამ წერეთლის ქუჩის გათავისუფლება გარემოვაჭრეებისგან მიმდინარე წლის თებერვალში დაიწყო, რასაც გარემოვაჭრეების პროტესტი მოჰყვა.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com