განათლების ხარისხის ეროვნულმა ცენტრმა სახელმწიფო 210 943 ლარით აზარალა


ორგანიზაცია „ახალგაზრდა ადვოკატებმა“ 2017-2019 წლის პირველ ნახევარში განათლების ხარისხის განვითარების ეროვნული ცენტრის საქმიანობის შედეგები გამოაქვეყნა. ორგანიზაციის თქმით, საჯარო უწყების მიერ განხორციელებული ხარჯები კითხვებს აჩენს.

„ახალგაზრდა ადვოკატების“ ინფორმაციით, განათლების ხარისხის განვითარების ცენტრი 2017-2018 წლებში 382-ჯერ იყო ჩართული სასამართლო დავაში.

აქედან, 11 საქმე შეეხებოდა საგანმანათლებლო დაწესებულებათა აკრედიტაცია-ავტორიზაციის მინიჭების ან გაუქმების საკითხებს. ამ პერიოდში ცენტრმა 139 საქმე წააგო, რის გამოც სახელმწიფო ბიუჯეტს 210 934 ლარი აზარალა.

„ადგილი აქვს საგანმანათლებლო დაწესებულებების მიმართ უკანონო გადაწყვეტილებების მიღებას, მათი საგანმანათლებლო და კომერციული ინტერესების დაზიანებას, წაგებული დავების საფუძველზე სახელმწიფო ბიუჯეტისთვის მიყენებულ ზიანს, რაც მენეჯმენტის პოლიტიკის კრიზისზე მეტყველებს“, – ნათქვამია ორგანიზაციის კვლევაში.

ამავე წლებში ხარისხის განვითარების ეროვნული ცენტრის დირექტორის, მოადგილეების, სამსახურებისა და სამმართველოს ხელმძღვანელების მიმართ გაცემულ ხელფასებზე, პრემიებსა და სახელმწიფო დანამატებზე 985 677 ლარი დაიხარჯა.

„ორგანიზაციის მიერ შესწავლილი მასალის თანახმად, განათლების ხარისხის განვითარების ეროვნულმა ცენტრმა 2017-2019 წლის პირველ ნახევარში, სამივლინებო ხარჯების სახით, 171 208 ლარი დახარჯა. ქვეყნის შიგნით მივლინებაში 13 473 ლარი, ქვეყნის გარეთ კი – 157 734 ლარი“, – ნათქვამია ახალგაზრდა ადვოკატების კვლევაში.

მივლინებაში გამოხატული ღირებულება, როგორც ორგანიზაციაში აცხადებენ,  გულისხმობს მხოლოდ სასტუმროს ხარჯებს.

„ახალგაზრდა ადვოკატების“ ინფორმაციით, სასამართლომ შეაჩერა ავტორიზაციის საბჭოს მიერ 2018 წლის 25 სექტემბერს მიღებული გადაწყვეტილება, რომლითაც ერთ-ერთ უმაღლეს სასწავლებელს 2019-2020 წლებში სტუდენტების მიღება ეკრძალებოდა.

თუმცა, „საბჭოს მიერ სადავო და შეჩერებული გადაწყვეტილებების თაობაზე, ცენტრი ინფორმაციას არ გასცემს. ამჟამად ცენტრის მიმართ ორგანიზაციის წარმოებაშია საერთო სასამართლოებში მიმდინარე სამი საქმე“, – აცხადებენ „ახალგაზრდა ადვოკატები“.

განათლების ხარისხის განვითარების ეროვნული ცენტრის მიერ სამი წლის მანძილზე, მივლინების დროს სასტუმროებში დახარჯული თანხები

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com