სკოლა ევრო-2000-ის მოსწავლეებმა გერმანიაში იმოგზაურეს


უკვე მეხუთედ ეწვია სკოლა ევრო 2000-ის 25 მოსწავლე (მე–10 და მე-11 კლასები) გერმანული ენის პედაგოგების ირმა დავითაძისა და მაია დუმბაძის ხელმძღვანელობით პარტნიორ სკოლას გერმანიაში. ქალაქ ელმსჰორნის ბისმარკის სახელობის გიმნაზია სკოლა ევრო-2000-ის ოფიციალური პარტნიორია, რაც საშუალებას აძლევს ჩვენს მოსწავლეებს, გაცვლითი პროგრამის ფარგლებში გაემგზავრონ გერმანიაში, ერთი წლის შემდეგ კი თავად უმასპინძლონ გერმანელ თანატოლებს.

პირველი მაისიდან ათი მაისის ჩათვლით განხორციელებული პროექტი მრავალმხრივად დატვირთული იყო და მოიცავდა როგორც სასწავლო-შემეცნებით, ასევე კულტურულ და გასართობ აქტივობებს.

სკოლა ევრო-2000-ის მოსწავლეებმა გერმანიაში იმოგზაურეს

სკოლა ევრო-2000-ის მოსწავლეებმა გერმანიაში იმოგზაურეს

ქართველი მოსწავლეები გაეცნენ გერმანული განათლების სისტემას და გახდნენ გერმანული სასკოლო ცხოვრების უშუალო თანამონაწილენი, გერმანელ მოსწავლეებთან ერთად ჯგუფებში იმუშავეს პროექტზე „დავიცვათ ჩვენი გარემო“ და  წარადგინეს საინტერესო პრეზენტაციები. ერთობლივი ექსკურსიები ჰამბურგში, ლუბეკსა და ლუნებურგში შესანიშნავი საშუალება იყო არა მხოლოდ გერმანიის სამი ქალაქის და მათი ღირსშესანიშნოებების  გასაცნობად, არამედ გერმანელ თანატოლებთან დაახლოების და მათთან გერმანულ ენაზე საუბრის.

წინასწარ გაწერილი და საკმაოდ მრავალფეროვანი პროგრამის მიუხედავად, მოსწავლეებს მაინც ჰქონდათ თავისუფალი დრო, რომელიც კარგად გამოიყენეს ერთობლივი გასართობი აქტივობების ჩასატარებლად. მნიშვნელოვანია ის ფაქტიც, რომ ქართველი მოსწავლეები გერმანიაში ყოფნის დროს ცხოვრობენ გერმანულ ოჯახებში, საუბრობენ მხოლოდ გერმანულად და საკუთარი თვალით ეცნობიან გერმანულ ყოფა-ცხოვრების, არიან საქართველოს წარმომადგენლები და აცნობენ გერმანელ მასპინძლებს ჩვენს ქვეყანას. საქართველოს ტრადიციებისა და ჩვენი კულტურის მრავალფეროვნების ფართო მასშტაბით წარდგენის საშუალება ჩვენს მოსწავლეებს მიეცათ სკოლაში გამართულ გერმანულ-ფრანგულ-ქართულ საღამოზე, სადაც მათ ქართული ჰანგებითა და ცეკვის ხელოვნებით არა თუ გერმანელი მასპინძლები, არამედ მოწვეული ფრანგი სტუმრებიც კი აღაფრთოვანეს.

სკოლა ევრო-2000-ის მოსწავლეებმა გერმანიაში იმოგზაურეს

სკოლა ევრო-2000-ის მოსწავლეებმა გერმანიაში იმოგზაურეს

გაცვლითი პროგრამის მიზანი მიღწეულია. უამრავი დადებითი შთაბეჭდილებით, ბევრი ახალი ინფორმაციით დატვირთული, გაფართოებული თვალსაწიერით და რაც მთავარია, ახალი მეგობრების შეძენით  გამოწვეული სიხარულის განცდით დაბრუდნენ ევრო 2000-ის მოსწავლეები მშობლიურ სკოლაში. ახლა გერმანელი სტუმრების რიგია. ჩვენ მოუთმენლად ველოდებით მომავალი სასწავლო წლის მაისს, რათა ჩვეული მასპინძლობა გავუწიოთ ჩვენს უცხოელ სტუმრებს და კიდევ უფრო გავამყაროთ ქართულ-გერმანული მეგობრობა ორივე სკოლის მოსწავლეებს შორის.

მოსწავლეთა შთაბეჭდილებები

ირაკლი ვარშანიძე, მე-10 ბ კლასი: გაცვლითი პროგრამა გერმანიაში, საერთო ჯამში, იყო ძალიან კარგი და ნამდვილად გვაჩუქა დაუვიწყარი დღეები როგორც გერმანელ, ასევე ქართველ ბავშვებს. პირველ რიგში, პროექტი და პროგრამა იყო ძალიან კარგად დაგეგმილი და ნამდვილად საინტერესო აქტივობებს ითვალისწინებდა. პროექტმა, რომელიც ბუნების დაცვას უკავშირდებოდა, ძალიან ბევრი რამ გვასწავლა. მუშაობა იყო ნამდვილად სახალისო და, რა თქმა უნდა, საინტერესო. გერმანელ ბავშვებთან კონტაქტი არ გაგვიჭირდა და საკმაოდ დიდი გამოცდილება მივიღეთ. ასევე ძალიან კარგად გავატარეთ თავისუფალი დრო და საბოლოოდ ძალიან დადებითი ემოციებით დავბრუნდით შინ.

ანა ციხელაშვილი, მე-11 გ კლასი: გაცვლითი პროგრამა, რომელშიც სულ ცოტა ხნის წინ მივიღე მინაწილეობა, დაუვიწყარი გამოცდილება იყო ჩემთვის. პირველად მინდა დავიწყო იმ თბილი დახვედრით, რომელიც ბავშვებმა მოგვიწყვეს, ძალიან მეგობრულ კლასთან მოგვიწია ურთიერთობა, თითოეული ბავშვი ცდილობდა, ყველა კითხვაზე ამომწურავი პასუხი გაეცა და მაქსიმალურად დაგვხმარებოდნენ იმაში, რომ უცხო გარემოში არ გვეგრძნო თავი. გერმანელ მოსწავლეებთან ერთად ვიმუშავეთ საინტერესო თემებზე და გავაკეთეთ პრეზენტაციები, ბევრი ახალი და განსხვავებული ინფორმაცია მივიღე მუშაობის პროცესში. მასწავლებელი, მიხაელი, ძალიან მოწესრიგებული და მომზადებული იყო ამ გაცვლითი პროგრამისთვის, თითოეული წუთი წინასწარ განსაზღვრული ქონდა. დავათვალიეთ სამი ძალიან ლამაზი ქალაქი: ჰამბურგი, ლუბეკი და ლუნებურგი. ძალიან მომეწონა სამივე ქალაქის არქიტექტურა, ქუჩები, ხიდები. ერთ-ერთი დადებითი მხარე, რაც გერმანიას აქვს, ვფიქრობ, ყველაზე ღირსეული მხარეც კი, არის ის, რომ ქვეყანა ძალიან ზრუნავს გარემოზე, თითოეულ ოჯახში, სკოლსა და ქუჩებშიც კი იგრძნობა, რომ ბუნების მეგობრები არიან გერმანელები. ასევე აუცილებლად უნდა ვისაუბრო ჩემს ოჯახზე გერმანიაში. გოგონა, რომლის ოჯახშიც ეს ათი დღე გავატარე, ძალიან მეგობრული აღმოჩნდა, საერთო ინტერესები აღმოვაჩინეთ და ხშირად ვსაუბრობდით უამრავ თემაზე. ოჯახის სხვა წევრებიც ძალიან მზრუნველები და მეგობრულები იყვნენ, განსაკუთრებით დედას დავუმეგობრდი. საბოლოოდ კი მინდა ვთქვა, რომ ეს 10 დღე მართლაც ძალიან კარგად გავატარე, გავიუბჯობესე გერმანული ენის ცოდნა, ბევრი ახალი რამ ვისწავლე, ბევრი მეგობარიც შევიძინე და ახალი მიზნებით დავბრუნდი საქართველოში.

სკოლა ევრო-2000-ის მოსწავლეებმა გერმანიაში იმოგზაურეს

სკოლა ევრო-2000-ის მოსწავლეებმა გერმანიაში იმოგზაურეს

ნიკა ბერიძე, 10 ბ კლასი: ბავშვობიდანვე გადავწყვიტე ევროპაში მიმეღო განათლება, შესაბამისად გამიხარდა იმის გაგება, რომ მომეცა საშუალება წავსულიყავი გერმანიაში მოსწავლეთა გაცვლითი პროგრამით. რადგან ბავშვს მანამდეც ვეკონტაქტებოდი სოციალური ქსელის მეშვეობით, დარწმუნებული ვიყავი,რომ ხასიათით კარგად შევეწყობოდით ერთმანეთს და ასეც მოხდა. უმეტესობა მოზარდებისა ძალიან თავაზიანი და მეგობრულია. მომეწონა, თუ როგორ მიმიღეს ოჯახში-ძალიან თბილად, ერთად დავსხედით დიდ მაგიდასთან, მივირთვით გერმანელი დედის მიერ გამოცხობილი ნამცხვარი და გავეცანი მათ. მომეწონა გერმანელთა პუნქტუალურობა და მათი მოპყრობა ნივთებთან (თუნდაც ნაგავთან). ისინი აფასებენ ყველანაირ შრომას და იქ არა არის დისკრიმინაცია. 10 დღის განმავლობაში კარგად გავეცანი ევროპელთა ცხოვრებას, გავავრცე ენის ცოდნა და მივხვდი, რომ ქართულ საჭმელს არაფერი სჯობს. მთლიანობაში, პროგრამამ კარგი შთაბეჭდილება დამიტოვა და დაზუსტებით გადავწყვიტე, განათლება გავაგრძელო გერმანიაში, რის საშუალებასაც მაძლევს სკოლა. ასევე, დიდ მადლობას ვუხდი სკოლის დირექციასა და მასწავლებლებს, რომელთა გარეშე არაფერი მოხერხდებოდა.

რუსუდან ბეჟანოვა, მე-10 ბ კლასი: გერმანიაში წასვლა ჩემთვის დამოუკიდებელი ცხოვრების პირველი გამოცდილება იყო. პროგრამის ფარგლებში,  ვეწვიეთ სხვადასხვა ქალაქს, სადაც გავიცანით უამრავი ხალხი, დავათვალიერეთ ისტორიული ადგილები და გავიგეთ ბევრი რამ, რაც უჩვეულოდ და განსხვავებულად მოგვეჩვენა. მიმაჩნია, რომ, საქართველოსა და გერმანიის წესები და ცხოვრების სტილი ერთმანეთისგან განსხვავდება. რაც მთავარია, მივიღე ისეთი გამოცდილება, რომელიც დამეხმარება ჩემი მომავალი ცხოვრების დაგეგვმაში.

სკოლა ევრო-2000-ის მოსწავლეებმა გერმანიაში იმოგზაურეს

სკოლა ევრო-2000-ის მოსწავლეებმა გერმანიაში იმოგზაურეს

ნეტგაზეთის მასალების სხვა გამოცემებში გადაბეჭდვის წესი
ავტორი