„ერთიანი ნაციონალური მოძრაობის“ წევრი გია აბულაძე აცხადებს, რომ ხულოში „ოცნების“ კოორდინატორებს დასურათებული სიები გამოართვა და მას ამის დამადასტურებელი ვიდეო კადრებიც აქვს. ვიდეოში, რომელიც ენმ-მ გაავრცელა, ჩანს როგორ ართმევს გია აბულაძე სავარაუდოდ კოორდინატორს დასურათებულ სიას.
გია აბულაძე ასევე აცხადებს, რომ სოფელ ტაბახმელაში მობილიზებულია სპეცრაზმი და პერიოდულად გადაადგილდება, ამის დასადასტურებლად მან ჟურნალისტებს ფოტო და ვიდეო მასალა წარუდგინა, ერთ ფოტოზე ჩანს პოლიციის პიკაპი, მეორეზე კი – ვილისი.
გია აბულაძე ამბობს, რომ ამ მანქანებში სამოქალაქო ფორმაში ჩაცმული სპეცრაზმელები იმყოფებიან.
შს სამინისტროს პრესსამსახურში კი გვითხრეს, რომ არჩევნებთან დაკავშირებით ქვეყნის მასშტაბით ხდება საპოლიციო ძალების გადაადგილება და შს სამინისტრომ ამის შესახებ საგანგებო განცხადებაც გაავრცელა.
დღეს, 19 მაისს ხულოში, მერს ირჩევენ. ხულოს მერობისთვის 14 კანდიდატი იბრძვის.
ამომრჩეველთა აქტივობა ხულოში დილიდანვე მაღალია.
ხულოში არჩევნები მას შემდეგ დაინიშნა, რაც პირდაპირი წესით არჩეული მერი გოჩა მელაძე 2018 წლის 17 ოქტომბერს თანამდებობიდან გადადგა.
______________
მთავარ ფოტოზე: გია აბულაძე ბრიფინგზე, ხულო. ფოტო: „ბათუმელები“, ცაგო კახაბერიძე