ბათუმის საზღვაო აკადემიის სტუდენტები საზღვაო სეზონზე სეზონური მაშველის პოზიციაზე დასაქმდებიან. ამის შესახებ შეთანხმებას შს სამინისტროს საგანგებო სიტუაციების მართვის სამსახურმა და ბათუმის სახელმწიფო საზღვაო აკადემიამ დღეს მოაწერეს ხელი.
სეზონური მაშველის პოზიციის დაკავების მსურველები სპეციალურ მომზადებას გაივლიან და მაშველისთვის აუცილებელ უნარ-ჩვევებს გამოიმუშავებენ. ასევე, მათ ჩაუტარდებათ პირველადი სამედიცინო დახმარების გაწევისთვის საჭირო კურსი, რის შემდეგაც ანაზღაურებად სამსახურს მიიღებენ.
გარდა ამისა, საგანგებო სიტუაციების მართვის სამსახურის ინფორმაციით, წელს, პირველად, აკადემიის სტუდენტ გოგოებს შესაძლებლობა ექნებათ, ხელშეკრულებით დასაქმდნენ წყალზე მაშველის პოზიციაზე. თანამშრომლობის შესაძლებლობა მათ მომავალ წლებშიც ექნებათ.
2018 წელს სანაპირო ზოლში 200 მაშველი მუშაობდა. გასულ წელს საგანგებო სიტუაციების მართვის სამსახურის აჭარის სამმართველოს უფროსმა, ირაკლი თოიძემ „ბათუმელებთან“ საუბარში თქვა, რომ მსურველების მიუხედავად, მათ ქალი მაშველების დასაქმებისგან თავი შეიკავეს – „წელს თავი შევიკავეთ ქალების დასაქმებაზე, რადგან გამოცდილება და დატრენინგება სჭირდებათ.“
