მთავარი,სიახლეები

ანზორ ბოლქვაძის ოჯახს სასტუმრო „ხულოდან“ შემოსავალი არ მიუღია – ქონებრივი დეკლარაცია

08.05.2019 • 3638
ანზორ ბოლქვაძის ოჯახს სასტუმრო „ხულოდან“ შემოსავალი არ მიუღია – ქონებრივი დეკლარაცია

დეპუტატ ანზორ ბოლქვაძის ქონებრივ დეკლარაციაში სასტუმრო „ხულო“ მხოლოდ წელს აისახა. დეკლარაციაში ანზორ ბოლქვაძე უთითებს, რომ მისი მეუღლე, თინა ბოლქვაძე, ფლობს შპს „ფონი+“-ის 100% წილს. სწორედ ამ კომპანიას ეკუთვნის სასტუმრო „ხულო“. კომპანია 2012 წელს არის დარეგისტრირებული, თუმცა დეპუტატის დეკლარაციაში მხოლოდ წელს გვხვდება.

ანზორ ბოლქვაძის მიერ 2019 წელს შევსებული დეკლარაციის გრაფაში – „საწარმოს საქმიანობით წინა წლის პირველი იანვრიდან 31 დეკემბრის ჩათვლით მიღებული შემოსავალი (ხელზე აღებული თანხა)“ – 0 ლარია მითითებული, ანუ დეკლარაციის თანახმად, ანზორ ბოლქვაძის ოჯახს ამ სასტუმროდან შემოსავალი არ მიუღია.

„ბათუმელების“ ინფორმაციით, დეპუტატის ოჯახის სასტუმროში საოფისე ფართობი აქვს დაქირავებული ა.ა.ი.პ. ჩეხეთის რესპუბლიკის „კარიტას საქართველოს“ (Caritas Czech Republic in Georgia). ეს ორგანიზაცია ევროკავშირის 2-მილიონიან პროექტს ახორციელებს, რომლის მიზანიც ხულოში სიღარიბის შემცირებაა.

„ბათუმელების“ ინფორმაციით, ორგანიზაცია სასტუმროს ყოველთვიურად 1500 ევროს ეკვივალენტ ლარს უხდის. „ENPARD ხულოს“ პროექტის მენეჯერი გიორგი მურვანიძე ინფორმაციას თანხის რაოდენობის შესახებ არ ადასტურებს, თუმცა ამბობს, რომ შპს „ფონი+“-სთან ხელშეკრულება აქვთ გაფორმებული და თანხასაც ნამდვილად უხდიან.

გიორგი მურვანიძეს ასევე ვკითხეთ, ხულოს მოსახლეობის სიღარიბის შემცირების პროექტის ფარგლებში მაინც და მაინც  დეპუტატის სასტუმროში რატომ იქირავა ოფისი, მაშინ როდესაც დაბაში სხვა სასტუმროებიც არის. თავდაპირველად გიორგი მურვანიძემ გვითხრა, რომ ეს სასტუმრო არ ეკუთვნის დეპუტატს, მას კომპანიასთან აქვს გაფორმებული ხელშეკრულება და ხელშეკრულების გაფორმების ეტაპზე არ გამოუკვლევიათ, თუ ვის ეკუთვნის სასტუმრო. გიორგი მურვანიძემ ასევე დაადასტურა, რომ არაერთხელ შეხვედრია ამ სასტუმროში თავად ანზორ ბოლქვაძეს.

გიორგი მურვანიძე ამბობს, რომ ეს სასტუმრო ორი ნიშნით აარჩია: „იყო საუკეთესო შემოთავაზება კომფორტის და ფასის მიხედვით“.

რაც შეეხება უშუალოდ სასტუმროს ნომრის ფასებს – აქ ერთი ღამის გათევა 60, 80 ლარად არის შესაძლებელი.

ანზორ ბოლქვაძე თერთმეტი წელია დეპუტატია. იგი საქართველოს პარლამენტის წევრია 2008 წლიდან დღემდე. 2008-2012 წლებში იგი საარჩევნო ბლოკის – „ერთიანი ნაციონალური მოძრაობის“ მაჟორიტარი იყო, თუმცა „ქართული ოცნების“ ხელისუფლებაში მოსვლის შემდეგ პოლიტიკური გემოვნება შეიცვალა და „ოცნების“ დეპუტატი გახდა.

წუხელ ანზორ ბოლქვაძემ თავისი სასტუმროდან ენმ-ის წევრის გაძევება სცადა. იძულების მუხლით ხულოს სასტუმროს ინციდენტზე გამოძიება დაიწყო. შინაგან საქმეთა სამინისტროს ინფორმაციით, ამ დროისთვის დაკავებული არავინაა და მიმდინარეობს საგამოძიებო მოქმედებები.

დეპუტატი ანზორ ბოლქვაძე საკუთარი სასტუმროდან ენმ-ის წევრს აძევებს [ვიდეო]

 

გადაბეჭდვის წესი


ასევე: