მთავარი,სიახლეები

დეპუტატის სასტუმროდან ენმ-ის წევრის გაძევებაზე გამოძიება დაიწყო

08.05.2019 • 1345
დეპუტატის სასტუმროდან ენმ-ის წევრის გაძევებაზე გამოძიება დაიწყო

იძულების მუხლით ხულოს სასტუმროს ინციდენტზე გამოძიება დაიწყო. შინაგან საქმეთა სამინისტროს ინფორმაციით, ამ დროისთვის დაკავებული არავინაა და მიმდინარეობს საგამოძიებო მოქმედებები.

შემთხვევა წუხელ, 7 მაისს, სასტუმრო „ხულოში“ მოხდა. სასტუმროს მესაკუთრემ, პარლამენტის წევრმა ანზორ ბოლქვაძემ სასტუმროს ნორმის დაცლა „ნაციონალური მოძრაობის“ აქტივისტს – ხათუნა ბერიძეს მოსთხოვა. დეპუტატს არ განუმარტავს მიზეზი, რის გამო მოსთხოვა მან სტუმარს სასტუმროს დატოვება. დეპუტატმა სასტუმროს ოთახი მას შემდეგ დატოვა, რაც მისმა თანხმლებმა პირმა, ბათუმის მერიის თანამშრომელმა თემურ ხასიამ დააფიქსირა, რომ აქტივისტი ვიდეოს იღებდა.

თემურ ხასიამ დღეს „ბათუმელებს“განუცხადა, რომ სასტუმროში წყალი არ იყო და „ქალის უსაფრთხოებაზე ზრუნავდნენ, როცა მას სასტუმროს დატოვებას აიძულებდნენ.

დეპუტატის სასტუმროში მომხდარ ინციდენტზე გამოძიება სისხლის სამართლის კოდექსის იმ მუხლით დაიწყო, რაც გულისხმობს „ადამიანისთვის ქმედების თავისუფლების უკანონო შეზღუდვას, მის ფიზიკურ, ან ფსიქიკურ იძულებას, შეასრულოს, ან არ შეასრულოს მოქმედება, რომლის შესრულება, ან რომლის შესრულებისაგან თავის შეკავება მისი უფლებაა, ანდა საკუთარ თავზე განიცადოს თავისი ნება-სურვილის საწინააღმდეგო ზემოქმედება“.

ამ მუხლის დარღვევა ისჯება ჯარიმით, ან გამასწორებელი სამუშაოთი ვადით ერთ წლამდე, ან შინაპატიმრობით ვადით 6 თვიდან 2 წლამდე, ანდა თავისუფლების აღკვეთით ერთ წლამდე.

გადაბეჭდვის წესი


ასევე: