მთავარი,სიახლეები

ფრანგი სტუდენტი ბათუმში, რომელიც მსურველებს ფრანგულს ასწავლის

06.05.2019 • 2477
ფრანგი სტუდენტი ბათუმში, რომელიც მსურველებს ფრანგულს ასწავლის

მაისან ელ აზუი 23 წლის ფრანგი სტუდენტია, რომელიც ბათუმის სახელმწიფო უნივერსიტეტში პროგრამა ერაზმუს + ის ფარგლებში ჩამოვიდა. ის მონპელიეს უნივერსიტეტში საბაკალავრო პროგრამის ,,ფრანგული, როგორც უცხო ენა“ მეორე კურსზე სწავლობს. წელს მისთვის უცხოეთში სავალდებულო სტაჟირების წელია. მაისანმა პრაქტიკული საქმიანობის დასაწყებად საქართველო აირჩია და უკვე რამდენიმე თვეა ბათუმში მსურველებს ფრანგულ ენას ასწავლის. თავიდან სტაჟირებას თბილისში გეგმავდა, თუმცა შემდეგ ზღვისპირეთისკენ გამომგზავრება არჩია.

„როცა სტაჟირების დაწყებისას სასურველი ქვეყნის არჩევა დავიწყეთ, მე რატომღაც საქართველოში მომინდა წამოსვლა – სრულიად უცხო გარემოში, რაზეც თითქმის არაფერი მსმენოდა. ჩემს კურსელებს ერჩიათ დიდ ქვეყნებში: ამერიკაში, ავსტრალიაში და ა.შ. წასვლა. არ მინდა მუდმივად საფრანგეთში ვიცხოვრო. მოგზაურობა მინდა, ისე, რომ ეს ჩემს პროფესიას შევუთავსო. უცხოელებს ფრანგული ენა უნდა ვასწავლო, ეს არის ჩემი  პროფესია, რაც ბევრგან წასვლის შესაძლებლობას მაძლევს. საქართველო პირველი ქვეყანაა, ბათუმი პირველი ქალაქი, სადაც მარტო მოგზაურობა გავრისკე“, – ამბობს მაისანი.

მაისანს ბათუმში 30-მდე სტუდენტი ჰყავს. მასთან ფრანგული ენის გაკვეთილებზე დასწრება, გარდა სტუდენტებისა, სხვა მსურველებსაც შეუძლიათ.

გაკვეთილზე ცდილობს მხოლოდ ფრანგულად ისაუბროს, თუ მსმენელები რაიმეს ვერ იგებენ, ჟესტებზეც გადადიან, მედიუმ ენად მაისანი ქართველ სტუდენტებთან ფრანგულის გაკვეთილებზე ძალიან იშვიათად ინგლისურსაც იყენებს. მაისანი ამბობს, რომ ინგლისური სავალდებულო ენაა, რასაც ჩვენს ეპოქაში ადამიანები მექანიკურად სწავლობენ, ფრანგული ენა კი პრაქტიკულად ბევრგან გამოსადეგი არ არის, ამიტომ, ძირითადად, სიამოვნებისთვის სწავლობენ. „ამას ერთი დადებითი მხარე აქვს“, – ამბობს მაისანი, – „ვისაც ვასწავლი, ვიცი, რომ ყველას მართლა ძალიან უნდა და მოსწონს ჩემი ენა“.

მაისანის ენის სწავლების მეთოდი, როგორც ამბობს, მარტივი და ეფექტურია, პრაქტიკული მეცადინეობები, თამაში და თეატრალური წარმოდგენები, იმიტაცია – აღწერითი, თეორიული გაკვეთილების ნაცვლად მაისანი ენის შესწავლის მსურველებს მაქსიმალურად რთავს გაკვეთილის პროცესში, ბევრს ათამაშებს და პრაქტიკულ სავარჯიშოებს სთავაზობს.

ფრანგი სტუდენტი, მაისან ალ აზუი ბათუმის სახელმწიფო უნივერსიტეტის სტუდენტებთან ერთად

საფრანგეთი განსაკუთრებით ზრუნავს ფრანგული ენის საზღვარგარეთ პოპულარიზაციაზე. ამ მიმართულებით ქვეყანა არაერთ სახელმწიფო პროგრამას ახორციელებს, აფინანსებს ფრანგულ ინსტიტუტებსა და ცენტრებს სხვადასხვა ქვეყანასა და ქალაქში. თუმცა ასეთი საქართველოში მხოლოდ ერთია – ფრანგული ინსტიტუტი და მედიათეკა თბილისში. მეისანი გვიყვება, რომ ბათუმელ ლექტორებთან ერთად ხშირად განიხილავს ბათუმში ფრანგული ცენტრის დაარსების იდეას, რაც ქალაქისთვის ძალიან მნიშვნელოვანი იქნებოდა.

„კარგი იქნებოდა, არსებობდეს თუნდაც პატარა კუთხე, ბიბლიოთეკა, სადაც ენის მცოდნეებს ერთმანეთთან ექნებათ კავშირი, შეხვედრები, დისკუსიები. სხვადასხვაგვარი კავშირების გაღრმავება საფრანგეთის ქალაქებსა და ბათუმს შორის ხელსაყრელი იქნებოდა“, – ამბობს მაისანი.

ამბობს, რომ მისი მშობლიური ქალაქი, რეიმსი ბათუმივით მყუდრო და მშვიდია, იმ განსხვავებით, რომ რეიმსში ზღვა არ არის, პარიზის ჩრდილოეთითაა და შედარებით ცივა.

მაისანისთვის კულტურული შოკი ბათუმში ქუჩის მოუვლელი ძაღლები იყო.

„ძალიან მეცოდებიან, უპატრონოდ რომ ვხედავ. საფრანგეთში ასეთ ძაღლებს თავშესაფარში უვლიან, ბანენ, პატრონობენ და მკურნალობენ. ძალიან მიყვარს ძაღლები და მეცოდებიან, უპატრონოდ რომ ვხედავ“, – ამბობს მაისანი. საქართველოში ფრანგი სტუდენტი კიდევ ერთ თვეს დარჩება, შემდეგ ტაილანდში გაემგზავრება და ზაფხულში ისევ ბათუმში დაბრუნებას აპირებს.

მაროკო, ესპანეთი, ლუქსემბურგი, ბელგია, ნორვეგია, ჩინეთი, სამხრეთ კორეა, ტუნისი და საქართველო – ეს ის ქვეყნებია, სადაც 23 წლის მაისან ალ აზუიმ აქამდე იმოგზაურა. ამბობს, რომ საქართველო ძალიან აგონებს მაროკოს, საიდანც მისი მშობლები არიან წარმოშობით: „ხალხი იქაც უფრო ფამილარულია და უცხოებთან ახლობელივით იქცევიან. „გამარჯობა ბატონო“ – ასე გესალმებიან საფრანგეთში, მაროკოელი იტყვის ,,გამარჯობა ძმაო“ – ისევე, როგორც საქართველოში. მაროკოშიც, ისევე როგორც საქართველოში, კაფეებში ახლობლები ხშირად უმასპინძლდებიან ერთმანეთს ან ერთმანეთს შეკვეთილ კერძებს უნაწილებენ, საფრანგეთში ასე არ ხდება“, – ამბობს ფრანგი სტუდენტი.

გადაბეჭდვის წესი


ასევე: