რატომ ბინძურდება არდაგანის ტბა



არდაგანის ტბა მექანიკურად [სპეციალური ტექნიკით] „ბათუმის წყალმა“ რამდენიმე დღის წინ გაწმინდა, თუმცა, დღეს ტბას, ისევ ტექნიკის გამოყენებით წმენდდნენ. „ბათუმის წყალში“ ამბობენ, რომ ტბის ზედაპირული გაწმენდა მიმდინარეობს ყოველდღე, მექანიკური გაწმენდა კი ხდება ტბაზე არსებული მდგომარეობის შეფასების მიხედვით. ტბა განსაკუთრებით „მაგნოლიას“ მხარეს ბინძურდება.

„დღეს, სპეცტექნიკით მოხდა ზედაპირზე არსებული დაბინძურებული მასის ამოტუმბვა“, – გვითხრეს „ბათუმის წყლის“ პრესსამსახურში. რა იწვევს ტბის ხშირ დაბინძურებას? – ამ კითხვაზე კონკრეტული პასუხი არც ქალაქის მერიას აქვს და არც მერიის შპს „ბათუმის წყალს“.

ხომ არ იწვევს ტბის დაბინძურებას მასში სანიაღვრე არხიდან მოხვედრილი წყალი? – ბათუმის მერის მრჩეველი მუნიციპალური ინფრასტრუქტურის რეაბილიტაციის პროექტის საკითხებში ჯაბა ტუღუში ამბობს, რომ სანიაღვრე არხიდან ტბაში მოხვედრილი წყალი ტბას ასე არ უნდა აბინძურებდეს.

„ჯავახიშვილის სანიაღვრე არხიდან [რომელსაც გიორგი ბრწყინვალის არხი უერთდება ჭაობში] ტბის დაბინძურება გამორიცხულია. ამ არხებზე თვითნებური დაერთებები რაც იყო საკანალიზაციო ქსელის, ყველა ჩაიჭრა 2017 წელს. ასე, რომ ფეკალიების მოხვედრაც კი ტბაში, უკვე გამორიცხულია. ტბასთან მშენებარე სატუმბი სადგურის გამო ნინოშვილის არხიდანაც აღარ მოდის წყალი ტბამდე – დელფინარიუმის მიმდებარედ ჩადის ზღვაში დროებით. ჩემი აზრით, ტბას სჭირდება გამოკვლევა სპეციალისტების ჩართულობით, რათა დადგინდეს დაბინძურების რეალური მიზეზი. ტბის ფსკერის პრობლემა უნდა იყოს  და ალბათ საჭირო იქნება მისი მოწყობა სპეციალური ბალასტით“, – ამბობს ჯაბა ტუღუში.

„ბათუმის წყლის“ ინფორმაციით, მათ ასეთი კვლევის შედეგი არ აქვთ და არც უახლოეს პერიოდშია დაგეგმილი ტბის შესწავლა ამ კუთხით.

„კვლევა, თუ რა აბინძურებს ტბას, არ ჩატარებულა, მაგრამ ხდებოდა და ხდება გარკვეული პერიოდულობით ტბის წყლის ხარისხის შემოწმება. ამ მონაცემებს ვამუშავებთ და ვგეგმავთ, უახლოეს მომავალში გავასაჯარაოთ. შემოწმებებით გვაქვს მაჩვენებელი, რომელიც არ არის სახარბიელო, მაგრამ არის მაჩვენებელი, რომელიც კარგია, მაგალითად, ჟანგბადის შემცველობა“, – გვითხრეს „ბათუმის წყალში“.

ბათუმში, არდაგანის ტბასა და საცხოვრებელ კორპუს „მაგნოლიას“ შორის არსებულ ტერიტორიაზე სატუმბი სადგური შენდება, რომელიც 2020 წლის აპრილში უნდა დასრულდეს. 2020 წლის პირველ კვარტალში უნდა დასრულდეს ჯავახიშვილის არხის მშენებლობაც.

ნინოშვილის ქუჩიდან გამომავალი სანიაღვრე არხი და ასევე არხი ჯავახიშვილის ქუჩიდან, რომელსაც თავის მხრივ, „ჭაობის“ დასახლებაში უერთდება კიდევ ერთი ცენტრალური სანიაღვრე არხი [რომელიც გიორგი ბრწყინვალის ქუჩიდან გამოდის], უშუალოდ ტბას არ უერთდება, ზღვაში ჩადის. მაგრამ არხს აქვს ე.წ. ფანჯარა [ფარდები], რომლიდანაც დიდი წვიმის დროს სანიაღვრე არხიდან წყალი ტბაში გადადის [ეს ფარდები იხსნება და იკეტება]. ტბას სხვა, მცირე სანიაღვრე არხებიც უერთდება.
ბათუმის წყლის ტექნიკური სამსახურის ინფორმაციით, დღეს ეს ფარდები გახსნილია.

არდაგანის ტბა / 22.04.2019 / გურამ მურვანიძის ფოტო

არდაგანის ტბა / 22.04.2019 / გურამ მურვანიძის ფოტო

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com