მთავარი,სიახლეები

ბათუმის მერია დახარისხებულ ნარჩენებს გაყიდის

22.04.2019 • 2030
ბათუმის მერია დახარისხებულ ნარჩენებს გაყიდის

22 აპრილს, დედამიწის საერთაშორისო დღესთან დაკავშირებით, ბათუმის უნივერსიტეტთან ნარჩენების დახარისხების სტენდი განთავსდა. ნარჩენების დახარისხების სტენდებთან, ურნებში, შესაძლებელია ქაღალდის, შუშის, პლასტმასისა და ალუმინის დახარისხებული ნარჩენების განთავსება.

ბათუმში ასეთი სულ ხუთი სტენდია – უნივერსიტეტთან, #1 საჯარო სკოლასთან, საბაგირო „არგოს“ მიმდებარე ტერიტორიასთან, დელფინარიუმთან და აკვაპარკის მიმდებარედ.

ბათუმის მერიის შპს „სანდასუფთავების“ უფროსის, დავით დუმბაძის თქმით, სტენდებზე დახარისხებული ქაღალდის, მინისა და ალუმინის ნარჩენებს მათი სამსახური დაასაწყობებს, შემდგომ კი გაყიდის.

„მუნიციპალიტეტისთვის ეს დამატებითი შემოსავლი იქნება. სტენდების განთავსება მიზნად ისახავს ნაგავსაყრელზე შეტანილი ნაგვის რაოდენობის შემცირებას. დახარისხებული ნარჩენები უნდა წავიდეს მეორადი გამოყენებისთვის. ესაა ქაღალდი, პლასტიკი, ალუმინი. უნდა შევიძინოთ პატარა დანადგარები, რომელიც ამ ნარჩენებს დაპრესავს და შემდეგ ოფიციალურად გავყიდით, ტენდერით. ეს არის USAID-ის მიერ შეძენილი სტენდები, ახლა ჩვენ ვგეგმავთ შევიძინოთ დამატებით ურნები, სხვადასხვა ფერის [ნარჩენების დასახარისხებლად] და განვათავსებთ საბავშო ბაღებთან, სკოლებთან, მოსახლეობის ცნობიერების ამაღლების მიზნით“ – ამბობს დავით დუმბაძე.

ფოტო: ბათუმის მერია

ფოტო: ბათუმის მერია

ნარჩენების დახარისხების საჭიროება საქართველო-ევროკავშირს შორის არსებული ასოცირების ხელშეკრულებითაა განსაზღვრული და 2019 წლიდან საქართველოს ყველა მუნიციპალიტეტში უნდა დაიწყოს.

სტენდები USAID-ის მხარდაჭერით მიმდინარე პროგრამის – „ნარჩენების მართვის ტექნოლოგია რეგიონებში“ ფარგლებში დაიდგა. პროგრამას CENN-ი ახორციელებს.

დღესვე, 22 აპრილს, ბათუმის მერიასა და კავკასიის გარემოსდაცვითი არასამთავრობო ორგანიზაციების ქსელს შორის ურთიერთთანამშრომლობის მემორანდუმი გაფორმდა.

ბათუმის მერიის ინფორმაციით, მემორანდუმის საგანია საჯარო, კერძო და სამოქალაქო სექტორის წარმომადგენელი მხარეების ურთიერთთანამშრომლობა მერიის პროექტის ფარგლებში, რომელიც მიზნად ისახავს „ნარჩენების მართვის კოდექსით“ გათვალისწინებული ნარჩენების მართვის იერარქიის პრინციპის შესაბამისად, ბათუმში ნარჩენების სეპარაციის სისტემის ეტაპობრივ დანერგვასა და ნარჩენების ხელახალი გამოყენებისა და რეციკლირების ხელშეწყობას, ბათუმში 5 ადგილას სეპარაციის სტენდების განთავსებისა და მოსახლეობის ცნობიერების ამაღლების გზით.

ნარჩენების სეპარაცია, ანუ გადარჩევა [გამოცალკევება] და შეგროვება 2019 წლის თებერვლიდან მუნიციპალიტეტების ვალდებულებაა. მათ ამას „ნარჩენების მართვის კოდექსი“ ავალდებულებს. ძირითადად, უნდა მოხდეს ქაღალდის, მინის, პლასტიკისა და ლითონის გამოცალკევება.

საქართველოს გარემოსა და სოფლის მეურნეობის სამინისტროში აცხადებენ, რომ ნარჩენების სეპარირებულ შეგროვებას 2019 წლისთვის მაინც პილოტური ხასიათი ექნება და ის რამდენიმე მსხვილ ქალაქში დაიწყება: „არის ეროვნული სტრატეგია და სამოქმედო გეგმა, სადაც ნიშნულებია გაწერილი, რასაც უნდა მიაღწიოს ქვეყანამ გარკვეულ პერიოდში. ძირითად ათვლის წერტილებად აღებულია 2020, 2025 და 2030 წელი. პარალელურად უნდა მოხდეს ცნობიერების ამაღლება, მოსახლეობის მიჩვევა, რომ სეპარირებული იქნეს ნარჩენები და შესაბამისად, ისინი სხვადასხვა კონტეინერში ჩააგდონ“.

მთავარ ფოტოზე: ნარჩენების დახარისხების სტენდი ბათუმის უნივერსიტეტთან. ფოტო: ბათუმის მერია

ვრცლად ამ თემაზე: 

როდის დაიწყება ნარჩენების დახარისხება და რა ვალდებულება ექნება მეწარმეს

გადაბეჭდვის წესი


ასევე: