ესმა ონიანის სახელობის კონკურსი ლიტერატურასა და მხატვრობაში სამ ნომინაციაში გაიმართება: პოეზიაში, ესეისტიკასა და მხატვრობაში. კონკურსში მონაწილეობა შეუძლიათ 18-დან 30 წლამდე ასაკის ახალგაზრდებს. კონკურსის თემაა: „თავისუფლების მკაცრი საკანი“. თემის მიხედვით მსურველებს ერთი თვის განმავლობაში შეეძლებათ შექმნან ნაწარმოებები.
საკონკურსოდ წარდგენილი ესე არ უნდა აღემატებოდეს word-ის ფაილში შესრულებულ 3 გვერდს.
ნაწარმოებების წარდგენის ბოლო ვადაა 26 აპრილი. თითოეულ ნომინაციაში ჟიური ხუთ ფინალისტს გამოავლენს, ფინალისტებს შორის გამოვლინდება 1 გამარჯვებული თითოეულ ნომინაციაში, სამი გამარჯვებულისთვის თითოეული ნომინაციიდან განსაზღვრულია საპრიზო თანხა 1000 ლარი, ასევე დაწესდება 1 სპეციალური პრიზი.
სხვადასხვა პრიზი გადაეცემათ ფინალისტებსაც და დაიბეჭდება ბროშურა, სადაც შევა 10-10 საუკეთესო ტექსტი (პოეზია, ესე) და 10 ნახატი.
ფინალისტებისა და გამარჯვებულების ვინაობა 12 მაისის შემდეგ გახდება ცნობილი.
პოეზიისა და ესეისტიკის ნომინაციაში მონაწილეებმა საკონკურსო ტექსტები უნდა გაგზავნონ მეილზე: art.khomli@gmail.com
მხატვრობის ნომინაციაში მონაწილეებმა საკონკურსო ნახატები (ფერწერა, გრაფიკა) უნდა წარადგინონ მისამართზე: თბილისი, გ.ტაბიძის 21. საკონტაქტო ტელ: 597 02 82 33, 577 20 10 15.
კონკურსის ორგანიზატორები არიან სტუდია „ხომლი“ და თბილისის მერია; კონკურსის პარტნიორია გამომცემლობა „ინტელექტი“.